ନା ଗାଁକୁ ମିଳିଛି କାମ, ନା ମାଆକୁ ମିଳିଲା ସମ୍ମାନ। ଆମ୍ବୁଲାନ୍ସ ପାଇବାକୁ ଚାଲିଛି କସରତ। ପାହାଡ, ପାଣି ପାରି ହେଲେ ମିଳିବ ମାତୃତ୍ୱ
କନକ ବ୍ୟୁରୋ: ପାହାଡ ଚଢି ପାଣି ପାରି ହେଲେ ମିଳିବ ମାତୃତ୍ୱ । ଗର୍ଭରେ ଥିବା ସନ୍ତାନ ଦେଖିବ ଦୁନିଆର ଆଲୋକ । ଏହି ଆଶା ରଖି ୫ କିଲୋମିଟର ପାହାଡିଆ ରାସ୍ତା ଚାଲି, ନଦୀରେ ପଶି ପାଣି ପାରି ହୋଇ, ଖଟିଆରେ ବୁହା ହୋଇ, ଆମ୍ବୁଲାନ୍ସ ପାଖରେ ପହଂଚିଲେ ଗର୍ଭବତୀ ମହିଳା । ଏଭଳି କିଛି ଚିତ୍ର ଆସିଛି କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ଅଂଚଳରୁ । ଯଦିଓ ଏହା କିଛି ନୂଆ ଘଟଣା ନୁହେଁ କିନ୍ତୁ ସରକାରଙ୍କ ଗାଁକୁ କାମ ମାଆକୁ ସମ୍ମାନ ନାରାର ବାସ୍ତବ ଚିତ୍ର ।
Kanak News is now on WhatsApp
Join and get latest news updates delivered to you via WhatsApp
ଏମିତି କିଛି ଆଶା ନେଇ ପାହାଡ ଚଢି ନଦୀ ପାର୍ ହୋଇ କାଦୁଅ ପଚପଚ ରାସ୍ତାରେ ଖଟିଆରେ ବୁହା ହୋଇ ଡାକ୍ତରଖାନା ଅଭିମୁଖେ ବାହାରିଥିଲେ ଗର୍ଭବତୀ ମହିଳା । ପ୍ରାୟ ପାଂଚ କିଲୋମିଟର ଅତି ଖରାପ ରାସ୍ତା ଅତିକ୍ରମ କରି ଆମ୍ବୁଲାନ୍ସ ପାଖରେ ପହଂଚିଥିଲେ କୋରାପୁଟ ଦଶବନ୍ତପୁର ବ୍ଳକ ଡ଼ୁମ୍ବାଗୁଡ଼ା ଗାଁର ହର୍ଷମଣି ବିଷୋଇ । ଆମ୍ବୁଲାନ୍ସ ଯୋଗେ ହର୍ଷମଣିଙ୍କୁ ଡାକ୍ତରଖାନା ନିଆଯିବା ପରେ ସେ ସେଠାରେ ଏକ ସନ୍ତାନ ଜନ୍ମ ଦେଇଛନ୍ତି । କେବଳ ଗର୍ଭବତୀ ମହିଳା ନୁହେଁ, ଜର ରୋଗୀଙ୍କୁ ମଧ୍ୟ ଏମିତି ଖଟିଆରେ ବୋହି ଡାକ୍ତରଖାନାକୁ ନିଆଯାଇଥାଏ ।
ଦଶବନ୍ତପୁରରେ ଡାକ୍ତରଖାନା ଥିବା ବେଳେ କୋଲାବର ଶାଖା ନଦୀ ସେପଟେ ରହିଛି ଡ଼଼ୁମ୍ବାଗୁଡ଼ା, ହାତିମୁଣ୍ଡା, କାଳିଆମ୍ବ, ଡ଼େଙ୍ଗାଗୁଡ଼ା, ଫୁଣ୍ଡାଗୁଡ଼ା, ଭଣ୍ଡିସିଲି, ସଙ୍ଗାବାଡ଼, ଡ଼କ୍ରିସିଲି ଭଳି ୧୬ରୁ ଅଧିକ ଗାଁ । ପାହାଡ ଘେରି ରହିଥିବା ଏସବୁ ଅଂଚଳରେ ଗମନାଗମନ ପାଇଁ ସୁବିଧା ନାହିଁ ତେଣୁ ସବୁ ବେଳେ ଏମିତି ଅସୁବିଧାର ସମ୍ମୁଖନୀ ହୋଇଥାନ୍ତି ସ୍ଥାନୀୟ ବାସିନ୍ଦା ।