୨୮୭ବର୍ଷ ପରେ ପୁରୀରେ ହେବ ନାହିଁ ରଥଯାତ୍ରା । ସୁପ୍ରିମକୋର୍ଟ କହିଲେ, ଲୋକଙ୍କ ସୁରକ୍ଷା ପାଇଁ ନିଆଗଲା ନିଷ୍ପତ୍ତି, କ୍ଷମା କରିଦେବେ ଜଗନ୍ନାଥ ।
କନକ ବ୍ୟୁରୋ : ୨୮୭ ବର୍ଷ ପରେ ଚଳିତବର୍ଷ ମହାପ୍ରଭୁଙ୍କ ସବୁଠୁ ବଡ ପର୍ବ ରଥଯାତ୍ରା ହେବ ନାହିଁ । ରଥଯାତ୍ରା ଆୟୋଜନ ଉପରେ ରୋକ ଲଗାଇଛନ୍ତି ସୁପ୍ରିମକୋର୍ଟ । ଓଡିଶା ବିକାଶ ପରିଷଦର ଆବେଦନର ଶୁଣାଣି କରି ପ୍ରଧାନ ବିଚାରପତିଙ୍କୁ ନେଇ ଗଠିତ ଖଣ୍ଡପୀଠ ରଥଯାତ୍ରା ବନ୍ଦ ରଖିବାକୁ ରାୟ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୁପ୍ରିମକୋର୍ଟ ପ୍ରଧାନ ବିଚାରପତି କହିଛନ୍ତି, କରୋନା ମହାମାରୀ ସମୟରେ ରଥଯାତ୍ରା ପାଇଁ ଅନୁମତି ଦେଲେ ଜଗନ୍ନାଥ କ୍ଷମା କରିବେ ନାହିଁ । ଜନତାଙ୍କ ନିରାପତା ଓ ସ୍ୱାସ୍ଥ୍ୟକୁ ଆଖିରେ ରଖି ଚଳିତବର୍ଷର ରଥଯାତ୍ରାକୁ ସ୍ଥଗିତ ରଖାଯାଇଛି । ସୁପ୍ରିମକୋର୍ଟଙ୍କ ରାୟ ପରେ ଆସନ୍ତା ୨୩ ତାରିଖରେ ଶ୍ରୀଜିଉଙ୍କ ରଥଯାତ୍ରା ଉପରେ ରୋକ ଲାଗିଛି । ଏଥିସହ ଓଡିଶାର କୌଣସି ସ୍ଥାନରେ ବି ରଥଯାତ୍ରା ଅୟୋଜନ ହୋଇପାରିବନି ବୋଲି ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି ।
ରଥଖଳାରେ ଯେତେବେଳେ ରଥ ନିର୍ମାଣ ଆରମ୍ଭ ହେଲା, ସେତେବେଳେ ରଥଯାତ୍ରା ହେବା ନେଇ ଏକ ନୂଆ ଆଶା ସୃଷ୍ଟି ହୋଇଥିଲା । ଆଉ ଯେତେବେଳେ ସ୍ନାନଯାତ୍ରାରେ ଟିଭି ପରଦାରେ ଭକ୍ତ ଶ୍ରୀଜିଉଙ୍କୁ ଦର୍ଶନ କଲେ, ସେତେବେଳେ ସମସ୍ତେ ଭାବିବା ଆରମ୍ଭ କରିଦେଲେ ଯେ ଚଳିତବର୍ଷ ବିନା ଭକ୍ତରେ ହୁଏତ ରଥଯାତ୍ରା ହୋଇଯିବ ।
ରଥଯାତ୍ରା ଉପରେ ଲାଗିଲା ରୋକ୍ । ଅନୁମତି ଦେଲେ ନାହିଁ ସୁପ୍ରିମକୋର୍ଟ । ରଥଯାତ୍ରା ନେଇ ସମସ୍ତଙ୍କ ନଜର ସୁପ୍ରିମକୋର୍ଟ ଉପରେ ଥିବାବେଳେ ପ୍ରଧାନ ବିଚାରପତି ରଥଯାତ୍ରା ଉପରେ ରୋକ ଲଗାଇଛନ୍ତି । ଏହାସହ ଦ୍ରୁତ ଗତିରେ ଆଗେଇ ଚାଲିଥିବା ରଥ କାମ ଅଟକି ଯାଇଛି ।
ପ୍ରଧାନ ବିଚାରପତି ଜଷ୍ଟିସ ଏସ ଏ ବୋବଡେ, ଜଷ୍ଟିସ ଦୀନେଶ ମାହେଶ୍ୱରୀ ଓ ଜଷ୍ଟିସ ଏ ଏସ ବୋପାନ୍ନାଙ୍କୁ ନେଇ ଗଠିତ ଖଣ୍ଡପୀଠ ଚଳିତବର୍ଷ ରଥଯାତ୍ରା ନକରିବା ପାଇଁ ନିର୍ଦ୍ଦେଶ ଦେଇଛନ୍ତି । ଓଡିଶା ବିକାଶ ପରିଷଦର ଆବେଦନର ଶୁଣାଣି କରି ଏହି ରାୟ ଦେଇଛନ୍ତି ସୁପ୍ରିମକୋର୍ଟ ।
ନଜର ପକାନ୍ତୁ ରଥଯାତ୍ରା ବନ୍ଦ କରିବା ପାଇଁ ହୋଇଥିବା ଆବେଦନର ଣୁଣାଣି ବେଳେ ସର୍ବୋଚ୍ଚ ନ୍ୟାୟାଳୟରେ କଣ ସବୁ ଯୁକ୍ତି ସାମ୍ନାକୁ ଆସିଛି । ଓଡିଶା ବିକାଶ ପରିଷଦର ଓକିଲ ମୁକୁଲ ରୋହତଗି କହିଥିଲେ ରଥଯାତ୍ରା ପାଇଁ ୧୦ଲକ୍ଷ ଲୋକଙ୍କ ସମାବେଶକୁ ଅନୁମତି ଦିଆ ନଯାଉ । ଏହା ଦ୍ୱାରା କରୋନା ସଂକ୍ରମଣ ବଢିବାର ଆଶଙ୍କା ରହିଛି । ଏଥିରେ ସହମତି ପ୍ରକାଶ କରି ପ୍ରଧାନ ବିଚାରପତି କହିଥିଲେ, ଆମେ ଏହାକୁ ଅନୁମତି ଦେବୁ ନାହିଁ । ରଥଯାତ୍ରା କାର୍ଯ୍ୟ ଆଗକୁ ବଢିଲେ ମହାପ୍ରଭୁ ଶ୍ରୀଜଗନ୍ନାଥ ଆମକୁ କ୍ଷମା ଦେବେ ନାହିଁ । ଏହାରି ଭିତରେ ସଲିସିଟର ଜେନେରାଲ ତୁଷାର ମେହେଟା ଅନୁରୋଧ କରିଥିଲେ ଯେ, କୋର୍ଟ ରଥଯାତ୍ରା ଉପରେ ସମ୍ପୂର୍ଣ୍ଣ କଟକଣା ଲଗାନ୍ତୁ ନାହିଁ । ବିନା ଜନସମାବେଶରେ ଏକ ବିକଳ୍ପ ବ୍ୟବସ୍ଥାରେ ନୀତିକାନ୍ତି ପାଇଁ ଅନୁମତି ଦିଅନ୍ତୁ ।
ସବୁପକ୍ଷକୁ ଶୁଣିବା ପରେ ସୁପ୍ରିମକୋର୍ଟଙ୍କ ଖଣ୍ଡପୀଠ କହିଥିଲେ, ଲୋକଙ୍କ ସ୍ୱାସ୍ଥ୍ୟ ଓ ସୁରକ୍ଷାକୁ ଦୃଷ୍ଟିରେ ରଖି ରଥଯାତ୍ରା ଆୟୋଜନରୁ ନିବୃତ୍ତ ରୁହନ୍ତୁ । ଚଳିତବର୍ଷ ଓଡିଶାରେ ରଥଯାତ୍ରା ହୋଇପାରିବ ନାହିଁ । ଲୋକଙ୍କ ସୁରକ୍ଷା ଦୃଷ୍ଟିରୁ ଏଭଳି ନିଷ୍ପତ୍ତି ନିଆଯାଇଥିବାରୁ ଶ୍ରୀଜଗନ୍ନାଥ ଆମକୁ କ୍ଷମା କରିବେ ।
କେବଳ ଶ୍ରୀକ୍ଷେତ୍ର ନୁହେଁ ଓଡିଶାର କୌଣସି ସ୍ଥାନରେ ବି ରଥଯାତ୍ରା ଆୟୋଜନ ହୋଇ ପାରିବ ନାହିଁ ବୋଲି କହିଛନ୍ତି ସୁପ୍ରିମକୋର୍ଟ । ଲୋକଙ୍କ ସୁରକ୍ଷା ଦୃଷ୍ଟିରୁ ଏଭଳି ନିଷ୍ପତ୍ତି ନିଆଯାଇଥିବାରୁ ଶ୍ରୀଜଗନ୍ନାଥ କ୍ଷମା କରିବେ ବୋଲି କହିଥିଲେ ପ୍ର୍ରଧାନ ବିଚାରପତି । ରଥଯାତ୍ରା ସହ ରଥଯାତ୍ରା ସମ୍ପର୍କୀତ କୌଣସି କାର୍ଯ୍ୟକ୍ରମ ନକରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ଫଳରେ ଶହ ଶହ ବର୍ଷର ପରମ୍ପରାରେ ରୋକ ଲାଗିଛି ।