ପ୍ରଭାବ ପକାଉନି ଆକାଶଛୁଆଁ ପିଆଜ ଦର ! ପିଆଜ ପାଇଁ ସାରା ଦେଶ କାନ୍ଦୁଥିବା ବେଳେ ଏହି ଗାଁର ଲୋକଙ୍କୁ ପଡୁନି ଏହାର ପ୍ରଭାବ ,ଜାଣନ୍ତୁ କ’ଣ ରହିଛି ରହସ୍ୟ
ପିଆଜ ଦର ଯେଉଁଠି ସାରା ଦେଶକୁ କନ୍ଦାଉଛି, ସେଠି ପିଆଜକୁ ନେଇ ଏହି ଗାଁର ଲୋକେ ଏବେ ଅଚିନ୍ତାରେ । ବର୍ତ୍ତମାନ ଦେଶରେ ପିଆଜର ଦରକୁ ନେଇ ଗୃହିଣୀଙ୍କ ବଜେଟ ଖାଲି ହେବାରେ ଲାଗିଛି । ପିଆଜର ବ୍ୟବହାର ମଧ୍ୟ କମ୍ କରିଦେଇଛନ୍ତି ସାଧାରଣ ଲୋକ । କିନ୍ତୁ ବିହାରରେ ରହିଛି ଏକ ଏପରି ଗାଁ ଯେଉଁଠି ଏହାର କୌଣସି ପ୍ରଭାବ ପଡୁନାହିଁ । କାରଣ ଏଠି ଏଭଳି ପରମ୍ପରା ରହିଛି ଯାହା ଶୁଣିଲେ ଆପଣ ମଧ୍ୟ ଆଶ୍ଚର୍ଯ୍ୟ ହେବେ । ଜହାନାବାଦ ଜିଲ୍ଲା ଠାରୁ ୩୦ କିମି ଦୂର ତ୍ରିଲୋକୀ ବିଗ୍ରହୀ ଗାଁରେ ପିଆଜକୁ ନେଇ କିଛି ସମସ୍ୟା ନାହିଁ । କାରଣ ପୁରା ଗାଁରେ କେହି ପିଆଜ ଖାଆନ୍ତି ନାହିଁ । ଏହି ଗାଁରେ ପାଖାପାଖି ୩୦ ରୁ ୩୫ ଟି ଘର ରହିଛି । ଏଠାରେ ଅଧିକାଂଶ ଲୋକ ଯାଦବ ଜାତିର ଅଟନ୍ତି । ଏହି ଘରର ଲୋକମାନେ ପିଆଜ ରସୁଣ ଖାଆନ୍ତି ନାହିଁ ।
Kanak News is now on WhatsApp
Join and get latest news updates delivered to you via WhatsApp
ଗ୍ରାମର ଜଣେ ବୃଦ୍ଧଙ୍କ କହିବାନୁଯାୟୀ, ଏହାର କାରଣ ରସୁଣ ଓ ପିଆଜ ଦର ବୃଦ୍ଧି କାରଣରୁ ନୁହେଁ ବରଂ ଏଠିକାର ଲୋକ ବର୍ଷ ବର୍ଷ ଧରି ପିଆଜ, ରସୁଣ ଖାଆନ୍ତି ନାହିଁ । ଆମର ପୂର୍ବ ପୁରୁଷମାନେ ମଧ୍ୟ ପିଆଜ ରସୁଣ ଖାଉନଥିଲେ । ସେଥିପାଇଁ ଏହି ପରମ୍ପରା ଆଜି ଯାଏଁ ମଧ୍ୟ ଚାଲିଆସିଛି । ଠାକୁର ପୂଜା କରୁଥିବା କାରଣରୁ ସେମାନେ ପିଆଜରସୁଣ ଖାଆନ୍ତି ନାହିଁ ବୋଲି ଗାଁର ଲୋକ ମତ ଦେଇଛନ୍ତି । ଏଥି ସହିତ ଗାଁର ଅନ୍ୟ ଜଣେ ଲୋକ କହିଛନ୍ତି, ଗାଁରେ ଠାକୁରଙ୍କ ମନ୍ଦିର ରହିଛି । ସେଥିପାଇଁ ତାଙ୍କ ଗାଁ ଲୋକେ ପରମ୍ପରା ଅନୁଯାୟୀ ଏହାକୁ ପ୍ରଥା ଭାବେ ମାନିଆସିଛନ୍ତି । ତେବେ ୪୦-୪୫ ବର୍ଷ ପୂର୍ବେ ଜଣେ ବ୍ୟକ୍ତି ଏହି ନିୟମକୁ ଭାଙ୍ଗି ପିଆଜ ରସୁଣ ଖାଇଦେଇଥିଲେ ଯାହାଦ୍ୱାରା କୌଣସି ସମସ୍ୟାର ସମ୍ମୁଖିନ ହୋଇଥିଲେ ବୋଲି ଗାଁ ଲୋକ କହିଆସୁଛନ୍ତି । ସେହିଦିନଠାରୁ ଆଜି ଯାଏଁ ଗାଁର କେହି ଲୋକ ଏପରି ସାହାସ କରିନାହାନ୍ତି । ଗାଁରେ ଏହି ପରମ୍ପରା ପିଢି ପିଢି ଧରି ଚାଲି ଆସିଛି ବୋଲି ଗାଁ ସରପଞ୍ଚ କହିଛନ୍ତି । କିଛି ଲୋକ ଏହାକୁ ଅନ୍ଧବିଶ୍ୱାସ କହୁଥିଲେ ମଧ୍ୟ ଗାଁ ଲୋକ ଏହାକୁ ପରମ୍ପରା ବୋଲି ମାନି ଆସିଛନ୍ତି ।