କନକ ବ୍ୟୁରୋ: ମୋବାଇଲ ଟାୱାର ନାହିଁ ତ ଭୋଟ୍ ନାହିଁ । ଗାଁକୁ ମୋବାଇଲ ନେଟୱର୍କ ଦାବିରେ ଭୋଟ ବର୍ଜନ କରିଛନ୍ତି ଦେଇଜ୍ଞଙ୍ଗ ଜିଲ୍ଲା ତିଲେଇବଣି ବ୍ଲକର ୫ଟି ପଞ୍ଚାୟତ । ଡିମିରିକୁଦା, ଗଣ୍ଡମ, ଝରାଗୋଗୁଆ, ପାରପୋଷି ଏବଂ ଝାରମୁଣ୍ଡା ଗାଁ ଲୋକ ଏଥର ପଞ୍ଚାୟତ ନିର୍ବାଚନରେ ଭୋଟେ ଦେବେନାହିଁ ବୋଲି ନିଷ୍ପତ୍ତି କରିଛନ୍ତି । ଫଳରେ ନାମାଙ୍କନ ଦାଖଲର ଶେଷ ଦିନରେ ମଧ୍ୟ କୌଣସି ପ୍ରାର୍ଥୀ ମାନାଙ୍କନ ପତ୍ର ଦାଖଲ କରିନାହାନ୍ତି । ଏପରିକି କୌଣସି ଆଶାୟୀ ଯେଭଳି ପ୍ରାର୍ଥିପତ୍ର ଦାଖଲ କରିନପାରିବେ, ସେଥିପାଇଁ ଗତ ୧୭ ତାରିଖରୁ ପଞ୍ଚାୟତବାସୀ ପଞ୍ଚାୟତ କାର୍ଯ୍ୟାଳୟ ଆଗରେ ଧାରଣରେ ବସିଥିଲେ । ତେବେ କେବଳ ଜିଲ୍ଲା ପରିଷଦ ପାଇଁ ତିନି ପ୍ରମୁଖ ରାଜନୈତିକ ଦଳର ପ୍ରାର୍ଥୀ ନାମାଙ୍କନ କରିଥିବା ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ସରକାର ଦେଶବ୍ୟାପୀ ଡିଜିଟାଲ ଇଣ୍ଡିଆର ନାରା ଦେଉଥିଲେ ମଧ୍ୟ ଏହି ପଞ୍ଚାୟତଗୁଡିକର ଲୋକେ ମୋବାଇଲ ସେବା ପାଇପାରୁ ନାହାନ୍ତି । ତେଣୁ ଯେପର୍ଯ୍ୟନ୍ତ ମୋବାଇଲ ଟାୱାର ବସା ନ ହୋଇଛି ସେପର୍ଯ୍ୟନ୍ତ ଏମାନେ ତ୍ରିସ୍ତରୀୟ ପଞ୍ଚାୟତରେ ଭାଗ ନେବେ ନାହିଁ ବୋଲି ନିଷ୍ପତି କରିଛନ୍ତି । ସମାନ ଢଙ୍ଗରେ ପଞ୍ଚାୟତରେ ମୋବାଇଲ ନେଟୱାର୍କ ଓ ସ୍ୱାସ୍ଥ୍ୟକେନ୍ଦ୍ର ନିର୍ମାଣ ଦାବି କରି ଭୋଟ ବର୍ଜନ ନିଷ୍ପତ୍ତି କରିଛନ୍ତି କନ୍ଧମାଳ ଜିଲ୍ଲା ଖଜୁରୀପଡା ବ୍ଲକ ଆଡାସିପଡା ପଞ୍ଚାୟତବାସୀ । ମିଳିତ ଭାବେ ଆଡାସିପଡା ପଞ୍ଚାୟତବାସୀ ଗଡିଛନ୍ତି ଜନ ସଚେତନ ମଞ୍ଚ । ଦାବି ସଂପର୍କରେ ପୂର୍ବରୁ ବହୁବାର ସେମାନେ କନ୍ଧମାଳ ଜିଲ୍ଲାପାଳଙ୍କୁ ଜଣାଇଥିଲେ ମଧ୍ୟ କୌଣସି ପଦ କ୍ଷେପ ନିଆଯାଇ ନାହିଁ । ତେଣୁ ଚଳିତ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ପାଇଁ ୧୭ରୁ ୨୧ ତାରିଖ ଯାଏଁ ସରପଞ୍ଚ, ସମିତି ସଭ୍ୟ ଓ ୱାର୍ଡମେମ୍ବର ପଦବୀ ପାଇଁ ପ୍ରାର୍ଥିପତ୍ର ଦାଖଲ ପ୍ରକ୍ରିୟା ଚାଲିଥିବା ବେଳେ କେହି ପ୍ରାର୍ଥୀ ନାମାଙ୍କନ କରିନାହାନ୍ତି । ଏନେଇ କନ୍ଧମାଳ ଜିଲ୍ଲାପାଳଙ୍କ କହିବା ହେଲା, ଭୋଟ ବର୍ଜ ନେଇ ତାଙ୍କ ପାଖରେ ଖବର ନାହିଁ । କିନ୍ତୁ ଜିଲ୍ଲା ପରିଷଦ ସଦସ୍ୟ ପାଇଁ ସେହି ଜୋନରୁ ନାମାଙ୍କନ ପତ୍ର ଦାଖଲ ହୋଇଥିବା କହିଛନ୍ତି ଜିଲ୍ଲାପାଳ ।