ମେଡିକାଲ କଲେଜରେ ନାହାଁନ୍ତି ଡାକ୍ତରୀ ଶିକ୍ଷକ: ଖାଲି ପଡିଛି ୨୧% ଶିକ୍ଷକ ପଦବି

କନକ ବ୍ୟୁରୋ: ସରକାର ଗୋଟିଏ ପରେ ଗୋଟିଏ ଜିଲ୍ଲାରେ ମେଡିକାଲ କଲେଜ୍ ଘୋଷଣା କରି ଚାଲିଛନ୍ତି । ରାଜ୍ୟବାସୀଙ୍କୁ ଭଲ ସ୍ୱାସ୍ଥ୍ୟ ସେବା ଯୋଗାଇ ଦେବାକୁ ଅଧିକ ଡାକ୍ତର ସୃଷ୍ଟି କରିବା ଲକ୍ଷ୍ୟରେ ମେଡିକାଲ କଲେଜ୍ ସ୍ଥାପନ କରାଯାଉଥିବା ସରକାରଙ୍କ ପକ୍ଷରୁ କୁହାଯାଉଛି । କିନ୍ତୁ ବିଧାନସଭାରେ ସ୍ୱାସ୍ଥ୍ୟମନ୍ତ୍ରୀ ନିରଞ୍ଜନ ପୂଜାରୀ ଦେଇଥିବା ତଥ୍ୟ, ମେଡିକାଲ କଲେଜର ବାସ୍ତବ ଚିତ୍ରକୁ ପଦାରେ ପକାଇ ଦେଇଛି ।

ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କ ଏକ ଲିଖିତ ପ୍ରଶ୍ନର ଉତରରେ ଏଭଳି ଚିନ୍ତାଜନକ ତଥ୍ୟ ଦେଇଛନ୍ତି ସ୍ୱାସ୍ଥ୍ୟମନ୍ତ୍ରୀ ନୀରଞ୍ଜନ ପୂଜାରୀ । ସ୍ୱାସ୍ଥ୍ୟମନ୍ତ୍ରୀ ଦେଇଥିବା ତଥ୍ୟ ଅନୁସାରେ, ସରକାରୀ ମେଡିକାଲ କଲେଜରେ ୨୯୦ଟି ପ୍ରଫେସର ପଦବୀ ରହିଛି, ସେଥିରୁ ୭୪ଟି ଖାଲି ପଡିଛି । ସେହିପରି ଆସୋସିଏଟ୍ ପ୍ରଫେସର ପାଇଁ ୪୬୩ଟି ପଦବୀ ଥିବାବେଳେ ୧୭୧ଟି ଖାଲି ପଡିଛି । ସହକାରୀ ପ୍ରଫେସର ପାଇଁ ୯୦୩ଟି ପଦବୀ ଥିବାବେଳେ ୧୧୦ଟି ପଦବୀ ଖାଲି ରହିଛି । ଯାହାକୁ ନେଇ ରାଜ୍ୟ ସରକାରଙ୍କୁ ଘେରିଛି ବିଜେପି । ରାଜ୍ୟରେ ମେଡିକାଲ ଶିକ୍ଷାର ଅଧୋଗତି ହୋଇଛି ବୋଲି କହିଛନ୍ତି ବିଜେପି ବିଧାୟକ ।

ଗୁରୁତ୍ୱପୂର୍ଣ୍ଣ କଥା ହେଉଛି ନୂଆ ମେଡିକାଲ କଲେଜ ନୁହେଁ, ଭିମସାର, ବୁର୍ଲା ମେଡିକାଲ କଲେଜରେ ସବୁଠାରୁ ଅଧିକ ସଂଖ୍ୟକ ଡାକ୍ତରୀ ଶିକ୍ଷକ ପଦ ଖାଲି ରହିଛି । ଏଠାରେ ପ୍ରଫେସର ପାଇଁ ୪୧ଟି ପଦବୀ ଥିବାବେଳେ, ୧୪ଟି ଖାଲି ପଡିଛି । ଆସୋସିଏଟ ପ୍ରଫେସର ପାଇଁ ୭୬ ପଦବିରୁ ୨୭ ଓ ସହକାରୀ ପ୍ରଫେସର ପାଇଁ ୧୪୯ ପଦବିରୁ ୩୦ ଖାଲି ପଡିଛି । ତେବେ ଭୁବନେଶ୍ୱର କ୍ୟାପିଟାଲ ହସ୍ପିଟାଲ ପିଜି ଇନଷ୍ଟିଚ୍ୟୁଟରେ ଧାର୍ଯ୍ୟ ପଦବିଠାରୁ ଅଧିକ ଡାକ୍ତରୀ ଶିକ୍ଷକ ରହିଛନ୍ତି । ଏଠାରେ, ଆସୋସିଏଟ ପ୍ରଫେସର ପାଇଁ ୮ପଦବି ଥିବାବେଳେ ୧୦ ଜଣ ଓ ସହକାରୀ ପ୍ରଫେସର ପାଇଁ ୧୧ ପଦବି ପାଇଁ ୧୬ ଜଣ ଡାକ୍ତରୀ ଶିକ୍ଷକ ରହିଛନ୍ତି ।

ଗୋଟିଏ ପରେ ଗୋଟିଏ ଜିଲ୍ଳାରେ ମେଡିକାଲ କଲେଜ ପ୍ରତିଷ୍ଠା ନେଇ ଘୋଷଣା କରୁଛନ୍ତି ରାଜ୍ୟ ସରକାର । କିନ୍ତୁ ମେଡିକାଲ କଲେଜରେ ଡାକ୍ତରୀ ଛାତ୍ରଛାତ୍ରୀଙ୍କୁ ଶିକ୍ଷା ଦେବା ପାଇଁ ଯେଉଁ ଡାକ୍ତର ଶିକ୍ଷକମାନଙ୍କର ମୂଳ ଆବଶ୍ୟକତା ରହିଛି, ତାହା ପୂରଣ ନହେବା ଓ ଖାଲି ପଡିବା ସରକାରଙ୍କ ଆଭିମୁଖ୍ୟ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।