ପାହାଡି ମଣିଷଙ୍କ ଦୁଃଖ । ସ୍ୱାଧିନତାର ଦୀର୍ଘ ବର୍ଷ ପରେ ବି ମୌଳିକ ସୁବିଧାରୁ ବଞ୍ଚିତ ନିୟମଗିରି ଅଧିବାସୀ । ମ୍ୟାଲେରିଆ ପୀଡିତଙ୍କୁ ମିଳୁନି ଚିକିତ୍ସା !
କନକ ବ୍ୟୁରୋ: ନିୟମଗିରି ପାହାଡ଼। ଆଦିମ ଜନଯାତି ଡଙ୍ଗରିଆ କନ୍ଧଙ୍କ ବସବାସ, ନିୟମଗିରିକୁ ନେଇ ଅନେକ ସମୟରେ ଅନେକ ଖବର ପ୍ରସାରଣ ହୋଇଛି। ଡଙ୍ଗରିଆଙ୍କ ପାଇଁ ସରକାର କୋଟିକୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ଲୋକେ ସୁଫଳ ପାଉନଥିବା ଅଭିଯୋଗ କରିଛନ୍ତି । ରାୟଗଡା କଲ୍ୟାଣସିଂହପୁର ବ୍ଳକ ଅନ୍ତର୍ଗତ ନିୟମଗିରି ଅଞ୍ଚଳରେ ରହିଛି ୩୨ଟି ଗାଁ । ସେଠାରେ ରହୁଥିବା ଡଙ୍ଗରିଆଙ୍କ ପାଖରେ ଏବେ ବି ଅପହଞ୍ଚ ସରକାରୀ ଯୋଜନା। ଶିକ୍ଷା, ସ୍ୱାସ୍ଥ୍ୟ ଓ ଗମନାଗମନ ବ୍ୟବସ୍ଥା ନଥିବାରୁ ଲୋକେ ନାହିଁ ନଥିବା ଅସୁବିଧା ଭୋଗୁଥିବା ଅଭିଯୋଗ କରିଛନ୍ତି। ଡଙ୍ଗରିଆ ସମ୍ପ୍ରଦାୟର ପିଲାମାନେ ପାଠପଢ଼ାରୁ ବଞ୍ଚିତ ହେଉଛନ୍ତି। ଅଙ୍ଗନୱାଡି କେନ୍ଦ୍ର ନଥିବାରୁ କୁନିକୁନି ପିଲାଙ୍କୁ ପୁଷ୍ଟିକର ଖାଦ୍ୟ ମିଳୁନାହିଁ । ସ୍ୱାସ୍ଥ୍ୟ ସେବା ପାଇଁ ୧୬ କିଲୋମିଟର ଚାଲିଚାଲି ବାମନଗୁଡା ଉପକେନ୍ଦ୍ର ନଚେତ୍ କଲ୍ୟାଣସିଂହପୁର ଯିବାକୁ ପଡୁଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ନିୟମଗିରି ଅଚଂଳରେ ଏବେ ପ୍ରାୟ ୫୦ରୁ ଅଧିକ ଲୋକ ମ୍ୟାଲେରିଆରେ ଆକ୍ରାନ୍ତ ହୋଇଥିବା ବେଳେ ଚିକିତ୍ସା ମିଳୁନଥିବା ଅଭିଯୋଗ ହୋଇଛି । ଦିନେ ନିୟମଗିରି ଅଚଂଳ ନକ୍ସଲଙ୍କ ଗଡ ପାଲଟିଥିବାରୁ ସରକାରୀ ଅଧିକାରୀ ଉକ୍ତ ଅଚଂଳକୁ ଯିବାକୁ ନାରାଜ । ଅନେକ ଗାଁରେ ବିଜୁଳି ଆଲୁଅ ସାତ ସ୍ୱପ୍ନ। କିଛି ଗାଁରେ ବିଦ୍ୟୁତ ବିଭାଗ ପକ୍ଷରୁ ଖୁଂଟ ପୋତାଯାଇଛି, କିନ୍ତୁ ବିଜୁଳି ସେବା ମିଳିପାରି ନାହିଁ । ନକ୍ସଲ ଅଚଂଳ କହି ଉନ୍ୱୟନ କାର୍ୟ୍ୟ ବନ୍ଦ ହୋଇ ଯାଇଛି । ଏହିସବୁ ସମସ୍ୟାର ସମାଧାନ ପାଇଁ ନିୟମଗିରିବାସୀ ଅନେକ ଥର ପ୍ରଶାସନକୁ ଜଣାଇଥିଲେ ସୁଦ୍ଧା କୌଣସି ପ୍ରତିକାର ହୋଇନାହିଁ ।
ତେବେ ରାଜ୍ୟରେ ସରକାର ବଦଳିବା ପରେ ମୌଳିକ ସୁବିଧା ମିଳିବା ଆଶଙ୍କରେ ରାୟଗଡା ଜିଲ୍ଲାପାଳଙ୍କୁ ଭେଟିଛନ୍ତି ୩ ଖଣ୍ଡ ଗାଁର ଗ୍ରମବାସୀ । ଅନ୍ୟପଟେ ଯୁଦ୍ଧକାଳୀନ ଭିତିରେ ନିୟମଗିରି ଅଚଂଳର ଲୋକଙ୍କୁ ସମସ୍ତ ପ୍ରକାର ସୁବିଧା ଯୋଗାଇ ଦିଆଯିବ ବୋଲି ଜିଲ୍ଲାପାଳ ପ୍ରତିଶୃତି ଦେଇଛନ୍ତି । ଡଙ୍ଗରିଆ କନ୍ଧ ସଂପ୍ରଦାୟକୁ ସ୍ୱାବଲମ୍ବୀ କରିବା ପାଇଁ ପାର୍ସାଲି ଗାଁରେ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା କାର୍ୟ୍ୟ କରୁଛି। ତଥାପି ସମସ୍ତ ଡଙ୍ଗରିଆ ସଂପ୍ରଦାୟ ଏଯାଏଁ ବିକାଶର ଧାରାରେ ସାମିଲ ହୋଇପାରି ନାହାନ୍ତି ।