ଚୀନକୁ ସାବାଡ କରିବାକୁ ଭାରତର ଆଉ ଏକ ବଡ ପଦକ୍ଷେପ । ସରକାରୀ ପ୍ରକଳ୍ପରେ ଭାଗ ନେଇପାରିବେନି ଚୀନ କିମ୍ବା ପାକିସ୍ତାନର କୌଣସି ସଂସ୍ଥା ।
କନକ ବ୍ୟୁରୋ : ଚୀନକୁ ଚାରିପଟୁ ଘେରିବା ପାଇଁ ମୋଦି ସରକାରଙ୍କ ରଣନୀତିର ଆଉ ଏକ କୂଟନୈତିକ ପଦକ୍ଷେପ । ୫୯ ଆପ ବ୍ୟାନ ପରେ ଚୀନ ନିବେଶ ଉପରେ ଲାଗିଲା କଟକଣା । ସରକାରୀ ପ୍ରକଳ୍ପରେ ଭାଗ ନେଇପାରିବେନି ଚୀନ କିମ୍ବା ପାକିସ୍ତାନର କୌଣସି ସଂସ୍ଥା । ସୀମାରେ ଉତ୍ପାତ କରୁଥିବା ଚୀନକୁ ଆର୍ଥିକ ମୋର୍ଚ୍ଚାରେ ଦୁର୍ବଳ କରିଦେବା ପାଇଁ ଆଉ ଏକ ବଡ ପଦକ୍ଷେପ ନିଆଯାଇଛି । ଯାହାର ପରିଣାମ ବେଜିଂ ଭୋଗିବାକୁ ଯାଉଛି ।
Kanak News is now on WhatsApp
Join and get latest news updates delivered to you via WhatsApp
ଚୀନ ସହିତ ସୀମାରେ ଉତେଜନା ଲାଗି ରହିଥିବାବେଳେ ଭାରତ ସରକାର ଗୁରୁବାର ବିଳମ୍ବିତ ରାତିରେ ଏକ ନୂଆ ନିର୍ଦ୍ଦେଶ ଜାରି କରିଛନ୍ତି । ଏଥିରେ ଚୀନ ଓ ପାକିସ୍ତାନ ଉପରେ ଲଗାଯାଇଛି ନୂଆ କଟକଣା । ନିର୍ଦ୍ଦେଶ ଅନୁସାରେ –
– ଚୀନ କିମ୍ବା ପାକିସ୍ତାନର କୌଣସି ସଂସ୍ଥା ଭରତର ସରକାରୀ ସଂସ୍ଥାରେ ନିବେଶ କରିପାରିବେ ନାହିଁ
– ସରକାରୀ କିମ୍ବା ରାଷ୍ଟ୍ରାୟତ ସଂସ୍ଥାର କୌଣସି ପ୍ରକଳ୍ପରେ ଭାଗ ନେଇପାରିନି ଦୁଇ ଦେଶର ସଂସ୍ଥା
– ଚୀନ ଓ ପାକିସ୍ତାନୀ ସଂସ୍ଥାର ସାମଗ୍ରୀ କିମ୍ବା ସେବା ଯୋଗାଣ ଉପରେ ଭାରତ ଲଗାଇଲା କଟକଣା
– କିନ୍ତୁ ନେପାଳ ଓ ଭୂଟାନର କୌଣସି ସଂସ୍ଥା ପାଇଁ ଏଭିଳି ନିବେଶରେ ରିହାତି ଦେଇଛି କେନ୍ଦ୍ର
କେନ୍ଦ୍ର ସରକାରଙ୍କ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି ଯେ, ପ୍ରତିରକ୍ଷା ଏବଂ ଜାତୀୟ ସୁର କ୍ଷା ଦୃଷ୍ଟିରୁ ଏଭଳି ପଦକ୍ଷେପ ନେଇଛି ଭାରତ । ଏଥିପାଇଁ ଜେନେରାଲ ଫାଇନାନ୍ସ ରୁଲ- ୨୦୧୭ରେ ଆବଶ୍ୟକ ସଂଶୋଧନ ମଧ୍ୟ କରାଯାଇଛି । ଫଳରେ କୌଣସି ସରକାରୀ କିମ୍ବା ସରକାରଙ୍କ ଅଧିନରେ କାମ କରୁଥିବା କୌଣସି ପ୍ରକଳ୍ପରେ କାମ କରିପାରିବେ ନାହିଁ ଚୀନ କମ୍ପାନି । ଏପରିକି ଯେଉଁ ସଂସ୍ଥା ବା କମ୍ପାନି ସରକାରଙ୍କଠାରୁ ଆର୍ଥିକ ସହାୟତା ପାଉଛନ୍ତି ସେମାନେ ମଧ୍ୟ ଚୀନ ଓ ପାକିସ୍ତାନ କମ୍ପାନି ସହିତ କାରବାର କରିପାରିବେ ନାହିଁ । ଏପରିକି ଏହି ନୂଆ କଟକଣା ପାଳନ କରିବା ପାଇଁ ରାଜ୍ୟ ସରକାରଗୁଡିକୁ ନିର୍ଦ୍ଦେଶ ଦିଆଯାଇଛି । ହେଲେ ଘରୋଇ କମ୍ପାନି ଉପରେ ଏହି କଟକଣା ଲାଗୁ ହେବନାହିଁ ବୋଲି କୁହାଯାଇଛି । ପ୍ରତିଶ୍ରୁତି ଦେଇ ଚୀନ ସେନା ଏଲଏସିରେ ପଛକୁ ହଟୁନଥିବାରୁ ବେଜିଂକୁ ଆର୍ଥିକ ମୋର୍ଚ୍ଚାରେ ଆଘାତ ପାଇଁ ଏଭଲି କୂଟନୈତିକ ପଦକ୍ଷେପ ନିଆଯାଇଛି ।
ସଇତାନ ଚୀନର ଘେରାବନ୍ଦୀ ପାଇଁ ଗୋଟିଏ ପରେ ଗୋଟିଏ କୂଟନୈତିକ ପଦକ୍ଷେପ ନେଇସାରିଛି ଭାରତ । ସୀମାରେ ଶକ୍ତି ଦେଖାଉଥିବା ଚାଲାକ ଚୀନକୁ ଆର୍ଥିକ ମୋର୍ଚ୍ଚାରେ ଦୁର୍ବଳ କରିଦେବା ପାଇଁ ଏହାରି ଭିତରେ ଅନେକ କଟକଣା ଘୋଷଣା କରିସାରିଛି । ଭାରତୀୟ ବଜାର ଉପରେ ବିଶେଷ ଭାବେ ନିର୍ଭର କରୁଥିବା ଚୀନ ଅର୍ଥନୀତିକୁ ପ୍ରଭାବିତ କରିବା ପାଇଁ ଏଭଳି ଘୋଷଣାମାନ କରାଯାଇଛି ।
ଆର୍ଥିକ ମୋର୍ଚ୍ଚାରେ ଚୀନର ଘେରାବନ୍ଦୀ!
୧- ଟିକଟକ୍ ଭଳି ଭାରତରେ ଚୀନର ଲୋକପ୍ରିୟ ୫୯ଟି ଆପକୁ ବ୍ୟାନ କରିଦେଇଛନ୍ତି ଭାରତ ସରକାର
୨- ହୁୱେଇ ସହ ଭାରତରେ ୫-ଜି ସେବା ଯୋଗାଣ ପାଇଁ ଟେଣ୍ଡର ନବୀକରଣକୁ ବାତିଲ କରାଯାଇଛି
୩- ଭାରତରେ ହାଇୱେ ପ୍ରଜେକ୍ଟରେ ଚୀନ କମ୍ପାନି ଭାଗ ନେଇପାରିବେ ନାହିଁ ବୋଲି କଟକଣା ଜାରି
୪- ୪-ଜି ଅପଗ୍ରେଡେସନ୍ ପାଇଁ ଚୀନ କମ୍ପାନି ସହ ଚୁକ୍ତି ବାତିଲ କରିଛନ୍ତି ବିଏସଏନଏଲ ଓ ଏମଟିଏନଏଲ
ଭାରତ-ଚୀନ ପ୍ରକୃତ ନିୟନ୍ତ୍ରଣ ରେଖାରେ ଉତେଜନା କମ୍ କରିବାକୁ ଦୁଇ ଦେଶ ବିବାଦୀୟ କ୍ଷେତ୍ରରୁ ସେନା ପ୍ରତ୍ୟାହାର କରିବାକୁ ରାଜି ହୋଇଥିଲେ । ହେଲେ ଚୀନ ସେନା କିଛିବାଟ ହଟିବା ପରେ ପୁଣି ଅଟକି ଯାଇଥିବାରୁ ଏବଂ କେତେକ ସ୍ଥାନରୁ ସଂପୂର୍ଣ୍ଣ ସେନା ପ୍ରତ୍ୟାହାର ପାଇଁ ଅମଙ୍ଗ ହେଉଥିବାରୁ ଭାରତ ସରକାର ଚାପ ପ୍ରୟୋଗ ପାଇଁ ଏଭଳି ପଦକ୍ଷେପ ନେଇଥିବା କୁହାଯାଉଛି ।