ଘରୋଇ ପାଣିପାଗ ସଂସ୍ଥା ସ୍କାଏମେଟର ଅନୁମାନ: ଚଳିତବର୍ଷ ସ୍ୱାଭାବିକଠାରୁ ହୋଇପାରେ କମ ବର୍ଷା

କନକ ବ୍ୟୁରୋ: ଚଳିତବର୍ଷ ସ୍ୱାଭାବିକଠାରୁ ହୋଇପାରେ କମ ବର୍ଷା । ଏଭଳି ପୂର୍ବାନୁମାନ କରିଛି ଘରୋଇ ପାଣିପାଗ ସଂସ୍ଥା ସ୍କାଏମେଟ । ସ୍କାଏମେଟର ପୂର୍ବାନୁମାନ ଅନୁଯାୟୀ ଜୁନରୁ ସେପ୍ଟେମ୍ବର ମାସ ମଧ୍ୟରେ ଦେଶର ୫୫ ପ୍ରତିଶତ ଅଂଚଳରେ ସ୍ୱାଭାବିକଠାରୁ କମ୍ ବୃଷ୍ଟିପାତ ହେବାର ସମ୍ଭାବନା ରହିଛି । ୩୦ ପ୍ରତିଶତ ଅଂଚଳରେ ସ୍ୱାଭାବିକ ଓ ୧୫ ପ୍ରତିଶତ ଅଂଚଳରେ ଅନାବୃଷ୍ଟି ହେବ ।

ପୂର୍ବ ଓ ଉତରପୂର୍ବ ଭାରତରେ ୯୨ ପ୍ରତିଶତ ଲଙ୍ଗ ପିରିୟଡ ଆଭରେଜ ଅର୍ଥାତ ମୌସୁମୀ ସମୟରେ ୧୪୩୮ ମିଲିମିଟର ବର୍ଷା ହେବାର ସମ୍ଭାବନା ରହିଛି । ଉତରପଶ୍ଚିମ ଭାରତରେ ୯୬ ପ୍ରତିଶତ ବର୍ଷା ଅର୍ଥାତ ୬୧୫ ମିମି, କେନ୍ଦ୍ରୀୟ ଭାରତରେ ୯୧ ପ୍ରତିଶତ ଅର୍ଥାତ ୯୭୬ ମିମି ଓ ଦକ୍ଷିଣ ଉପଦ୍ୱୀପରେ ୯୫ପ୍ରତିଶତ ଅର୍ଥାତ ୭୧୬ ମିମି ବୃଷ୍ଟିପାତ ହେବାର ଆକଳନ କରାଯାଇଛି । ପ୍ରକାଶ ପାଇଥିବା ରିପୋର୍ଟ ଅନୁସାରେ ମେ’ ୨୨ରେ ମୌସୁମୀ ଆଣ୍ଡାମାନ ନିକୋବର ଛୁଇଁବ । ଜୁନ ୪ରେ କେରଳ ଛୁଇଁବ ।

ଆହୁରି କୁହାଯାଇଛି ଯେ, ସ୍ବାଭାବିକ ଭାବେ ଜୁନ୍ ୧ରେ ମୌସୁମୀ କେରଳ ଛୁଇଁଥାଏ। ଏଥର ମୌସୁମୀ ସାରା ଦେଶରେ ସ୍ବାଭାବିକଠାରୁ କମ ରହିବ। ଚଳିତ ଋତୁରେ ଦେଶର ୪ଟି ଯାକ ଅଞ୍ଚଳରେ ସ୍ବାଭାବିକଠାରୁ କମ୍ ବର୍ଷା ହୋଇପାରେ। ଉତ୍ତର ପଶ୍ଚିମ ଭାରତ ଓ ଦକ୍ଷିଣ ପେନିନସୁଲା ଅପେକ୍ଷା ପୂର୍ବ ଓ ଉତ୍ତରପୂର୍ବ ଓ କେନ୍ଦ୍ରୀୟ ଭାରତରେ କମ ବର୍ଷା ହେବ। ପଞ୍ଜାବ, ହରିୟାଣା, ରାଜସ୍ଥାନ ଓ ଦିଲ୍ଲୀ-ଏନ୍ସିଆର ତୁଳନାରେ ଜମ୍ମୁ କାଶ୍ମୀର, ହିମାଞ୍ଚଳ ପ୍ରଦେଶ ଓ ଉତ୍ତରାଖଣ୍ଡରେ ଭଲ ବର୍ଷା ହେବ। କେନ୍ଦ୍ରୀୟ ଭାରତ ଯଥା ବିଦର୍ଭ, ମଧ୍ୟପ୍ରଦେଶ, ଗୁଜୁରାଟରେ ୯୧ ପ୍ରତିଶତ ରହିବ। ବିହାର, ଝାଡ଼ଖଣ୍ଡ ଓ ପଶ୍ଚିମବଙ୍ଗ ପାଇଁ ରିସ୍କ ରହିଛି। ଓଡ଼ିଶାରେ ସ୍ବାଭାବିକଠାରୁ କମ୍ ବୃଷ୍ଟିପାତ ହୋଇପାରେ ବୋଲି ରିପୋର୍ଟରେ କୁହାଯାଇଛି।