କନକ ବ୍ୟୁରୋ : କ୍ରିକେଟ ହେଉଛି ଅନିଶ୍ଚିନ୍ତତାର ଖେଳ । କେତେବେଳେ ବାଜି କାହା ସପକ୍ଷକୁ ପଲଟିଯାଏ ତାହାର ଆକଳନ କରିବା ଭାରି ମୁସ୍କିଲ । ଠିକ୍ ଯେମିତି ଆଜି ଭାରତ-ଦକ୍ଷିଣ ଆଫ୍ରିକା ମହିଳା ବିଶ୍ୱକପରେ ଦେଖିବାକୁ ମିଳିଛି । ଗୋଟିଏ ନୋ-ବଲ ଭାରତର ବିଶ୍ୱକପ ସ୍ୱପ୍ନକୁ ଭାଙ୍ଗି ଦେଇଛି । କେବଳ ଏତିକି ନୁହେଁ କୋଟି କୋଟି କ୍ରିକେଟପ୍ରେମୀଙ୍କ ଆଶା ଓ ଭରସା ମଧ୍ୟ ଭାଙ୍ଗିଛି ଏହି ଗୋଟିଏ ନୋ ବଲ ।

Advertisment

ଦକ୍ଷିଣ ଆଫ୍ରିକା ବିପକ୍ଷରେ ଆଜି ଶେଷ ଲିଗ୍ ମ୍ୟାଚ୍ ଖେଳୁଥିଲା ଭାରତ । ଏହି ମ୍ୟାଚରେ ବିଜୟୀ ହୋଇ ଟିମ୍ ଇଣ୍ଡିଆ ସେମିଫାଇନାଲ ଖେଳିବାକୁ ଆଶା ରଖିଥିଲା । ଆଉ ଏହି ଆଶା ଶେଷ ଓଭରର ଶେଷ ବଲ ପର୍ଯ୍ୟନ୍ତ ବଳବତ୍ତର ଥିଲା । କିନ୍ତୁ ମ୍ୟାଚର ୫୦ ତମ ଓଭରର ପଞ୍ଚମ ବଲରେ ଗୋଟିଏ ନୋ-ବଲ ହିଁ ଏହି ସ୍ୱପ୍ନ ଓ ଆଶାକୁ ଧୂଳିସାତ କରିଛି । ରୋମାଞ୍ଚକର ମୁକାବିଲାକୁ ୩ ୱିକେଟରେ ଜିତିବା ସହ ସେମିଫାଇନାଲରୁ ଭାରତକୁ ବିଦା କରିଛି ଦକ୍ଷିଣ ଆଫ୍ରିକା ।

ଶେଷ ୨ଟି ବଲରେ ଦକ୍ଷିଣ ଆଫ୍ରିକାକୁ ବିଜୟ ପାଇଁ ୩ ରନର ଆବଶ୍ୟକତା ରହିଥିଲା । ଯାହା ବିଶ୍ୱକପର ଏହି ମ୍ୟାଚର ରୋମାଞ୍ଚକୁ ବହୁଗୁଣିତ କରିଥିଲା । ଶେଷ ଓଭରର ପଞ୍ଚମ ବଲରେ ଦକ୍ଷିଣ ଆଫ୍ରିକାର ବ୍ୟାଟର ବଡ ସଟ୍ ଖେଳିବାକୁ ଯାଇ ହରମନପ୍ରୀତଙ୍କ ହାତରେ କ୍ୟାଚ୍ ହୋଇଥିଲା । ଆଉ ଏହା ଭାରତୀୟ କ୍ରିକେଟପ୍ରେମୀଙ୍କ ଶିବିରରେ ଖୁସିର ମାହୋଲ ଭରି ଦେଇଥିଲା । କିନ୍ତୁ କ୍ୟାମେରା ରିପ୍ଲେରେ ଏହା ନୋ ବଲ ଜଣାପଡିବା ଦକ୍ଷିଣ ଆଫ୍ରିକା ପାଇଁ ବରଦାନ ସାବ୍ୟସ୍ତ ହୋଇଥିଲା । ଆଉ ଶେଷ ୨ ବଲରେ ୨ ରନ୍ କରିବା ସହ ଦକ୍ଷିଣ ଆଫ୍ରିକା ଏହି ରୋମାଞ୍ଚକର ମୁକାବିଲାକୁ ନିଜ ନାଁରେ କରିଥିଲା । ଆଉ ଏହାସହ ଭାରତର ବିଶ୍ୱକପ ଅଭିଯାନ ଶେଷ ହୋଇଥିଲା ।