ବିହାରରେ ଭାଙ୍ଗିବ କି ଆରଜେଡି-ଜେଡିୟୁ ମେଣ୍ଟ? ପୁଣି ବିଜେପି ସହ ମେଣ୍ଟ କରିବେ କି ନୀତିଶ?
କନକ ବ୍ୟୁରୋ: ବିହାରରେ ଭାଙ୍ଗିଯିବ କି ମହାମେଣ୍ଟ ସରକାର? ମୁଖ୍ୟମନ୍ତ୍ରୀ ଆସନରୁ ହଟିବେ କି ନୀତିଶ କୁମାର? ବଦଳୁଥିବା ସମୟ ସହ ବିହାର ରାଜନୀତି ମଧ୍ୟ ଏବେ କଡ ଲେଉଟାଇବା ଆରମ୍ଭ କରିଛି । ଆଉ କୁହାଯାଉଛି ଖୁବଶୀଘ୍ର ବିହାରରେ କିଛି ବଡ ଧରଣର ପରିବର୍ତ୍ତନ ଦେଖିବାକୁ ମିଳିପାରେ । ଏପରିକି ନୀତିଶ କୁମାର ଆରଜେଡି ସହ ସମ୍ପର୍କ ଭାଙ୍ଗି ବିଜେପି ସହ ପୁଣି ଥରେ ମେଣ୍ଟ କରିପାରନ୍ତି ବୋଲି ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଲାଲୁ ଯାଦବଙ୍କ ଝିଅ ରୋହିଣୀ ଆଚାର୍ଯ୍ୟ ସୋସିଆଲ୍ ମିଡିଆରେ ନୀତିଶଙ୍କୁ ଟାର୍ଗେଟ କରି ଏକ ପୋଷ୍ଟ ସେୟାର କରିଛନ୍ତି । ଏହି ପୋଷ୍ଟ ପରେ ବିହାର ରାଜନୀତିରେ ଏବେ ସବୁକିଛି ଠିକ୍ ଚାଲିନଥିବା ସ୍ପଷ୍ଟ ହେଇଯାଇଛି । କୁହାଯାଉଛି ଆରଜେଡି ସହ ସମ୍ପର୍କ ଛିନ୍ନ କରି ନୀତିଶ ପଦ୍ମ ସହ ପୁଣି ମେଣ୍ଟ କରିପାରନ୍ତି । ଅନ୍ୟପଟେ ବିଜେପିର କହିବା କଥା, ନୀତିଶଙ୍କୁ ସେ ସେତେବେଳେ ସାଙ୍ଗରେ ନେବେ, ଯେତେବେଳେ ସେ ମୁଖ୍ୟମନ୍ତ୍ରୀ ପଦ ଛାଡିବେ ।
ସୂତ୍ରରୁ ମିଳିଥିବା ସୂଚନା ମୁତାବକ, ନୀତିଶ କୁମାର ଯଦି ମୁଖ୍ୟମନ୍ତ୍ରୀ ପଦ ଛାଡି ବିଜେପି ସହ ମେଣ୍ଟ କରିବେ, ତେବେ ଯାଇ ବିଜେପି ନୀତିଶଙ୍କୁ ଗ୍ରହଣ କରିପାରେ । ଏପରି ସ୍ଥଳେ ମେଣ୍ଟ ସରକାରରେ ବିଜେପି ନିଜର ମୁଖ୍ୟମନ୍ତ୍ରୀ ବାଛିବ । ଯଦି ସେପରି ନହୁଏ ତେବେ ବିଧାନସଭା ଭାଙ୍ଗିବା ହିଁ ଏକମାତ୍ର ବିକଳ୍ପ ରହିବ । ଏପରି ହେଲେ, ବିହାରରେ ଲୋକସଭା ନିର୍ବାଚନ ସହିତ ବିଧାନସଭା ନିର୍ବାଚନ ମଧ୍ୟ ଦେଖିବାକୁ ମିଳିପାରେ ।
ସୂଚନାଯୋଗ୍ୟ ଯେ, ବିହାରରେ ଏବେ ମହାମେଣ୍ଟ ସରକାର ଭେଣ୍ଟିଲେଟରରେ ଥିବା ଭଳି ମନେ ହେଉଛି । ବୁଧବାର ନୀତିଶ କୁମାର ଲାଲୁ ଯାଦବଙ୍କ ନାଁ ନନେଇ ପରିବାରବାଦକୁ ଟାର୍ଗେଟ କରଥିଲେ । ଏହାପରେ ଲାଲୁଙ୍କ ଝିଅ ରୋହିଣୀ ଆଚାର୍ଯ୍ୟ ମଧ୍ୟ ସମାନ ଢଙ୍ଗରେ ନୀତିଶ କୁମାରଙ୍କୁ ତେରେଛା ତୀର ମାରିଥିଲେ । ଯାହାପରେ ବିହାରରେ ଜେଡିୟୁ-ଆରଜେଡି ମେଣ୍ଟରେ ଫାଟ ସୃଷ୍ଟି ହେଇଥିବା କଥା ପକ୍କା ହେଇଯାଇଥିଲା ।
ଏହାପୂର୍ବରୁ ବିଜେପି ପ୍ରଦେଶ ଅଧ୍ୟକ୍ଷ ସମ୍ରାଟ ଚୌଧୁରୀ କହିଥିଲେ ଯେ, ନୀତିଶ କୁମାର ଯାହା ସହ ରୁହନ୍ତି, ତା ବିରୋଧରେ ହିଁ ଷଡଯନ୍ତ୍ର କରନ୍ତି । ନୀତିଶ କୁମାର କେବଳ ନିଜ ପାଇଁ ହିଁ ଜିଅନ୍ତି । ପରିବାରବାଦ ବିଷୟରେ ଜାଣି ମଧ୍ୟ ସେ ଲାଲୁଙ୍କ ସହ ରହିଛନ୍ତି । ତାଙ୍କର ଏହା ହେଉଛି ଦୋଗଲାପଣ । ନୀତିଶ କୁମାରଙ୍କର ନିଜସ୍ୱ କୌଣସି ରାଜନୈତିକ ଚରିତ୍ର ଏବଂ ବିଚାରଧାରା ନାହିଁ ବୋଲି ସେ କହିଛନ୍ତି ।