ଦୀପାବଳି ପରେ ବିହାର ମୁଖ୍ୟମନ୍ତ୍ରୀ ଭାବେ ଶପଥ ନେବେ ନୀତିଶ କୁମାର : ହେଲେ ସବୁ ଓଲଟାଇଦେଲା ନିର୍ବାଚନୀ ଫଳାଫଳ, ବଡଭାଇରୁ ନିତୀଶ ପାଲଟିଗଲେ ସାନଭାଇ
ଏପଟେ ଦିଲ୍ଲୀ ବିଜୟ ଉତ୍ସବରେ ମୋଦି କହିଲେ, ଗଣତନ୍ତ୍ର ପାଇଁ ବିପଦ ପରିବାର ନିୟନ୍ତ୍ରଣରେ ଥିବା ଦଳ
କନକ ବ୍ୟୁରୋ : ବିହାରରେ ପୁଣି ଥରେ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ନୀତିଶ କୁମାର । ରାଜ୍ୟରେ ଏନଡିଏକୁ ସ୍ପଷ୍ଟ ବହୁମତ ମିଳିଛି । ତେଣୁ ଦୀପାବଳି ପରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ ନୀତିଶ । ଖବର ଅନୁସାରେ, ୧୬ ନଭେମ୍ବରରେ ନୀତିଶଙ୍କ ଶପଥଗ୍ରହଣ ସମାରୋହ ହୋଇପାରେ । ସପ୍ତମ ଥର ଲାଗି ନୀତିଶ କୁମାର ବିହାରର ମୁଖ୍ୟମନ୍ତ୍ରୀ ହେବେ । ୨ ହଜାର ମସିହାରୁ ସେ ବିହାରର ମୁଖ୍ୟମନ୍ତ୍ରୀ ରହିଆସିଛନ୍ତି । ବିହାରରେ ଏନଡିଏ ମେଂଟରେ ବିଜେପି ସବୁଠାରୁ ବଡ ଦଳ ହେବା ପରେ ଅନୁମାନ କରାଯାଉଥିଲା ବିଜେପି ମୁଖ୍ୟମନ୍ତ୍ରୀ ପଦ ଦାବି କରିପାରେ ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ଗତକାଲି ବିଜେପି ମୁଖ୍ୟାଳୟରେ କର୍ମୀଙ୍କୁ ସମ୍ବୋଧନ ବେଳେ ମୋଦି ସ୍ପଷ୍ଟ କରିଥିଲେ ଯେ, ନୀତିଶଙ୍କ ନେତୃତ୍ୱରେ ହିଁ ବିହାରରେ ଏନଡିଏ ସରକାର ହେବ । ଗତକାଲି ସନ୍ଧ୍ୟାରେ ନିର୍ବାଚନ ଫଳାଫଳ ନେଇ ନୀତିଶ ପ୍ରତିକ୍ରିୟା ଦେଇଥିଲେ । ସେ ବିଜୟ ପାଇଁ ବିହାରବାସୀ ଓ ମୋଦିଙ୍କୁ ଧନ୍ୟବାଦ ଦେଇଥିଲେ । ଏଥର ବିହାର ବିଧାନସଭାରେ ଏନଡିଏକୁ ୧୨୫ ଆସନ ମିଳିଛି । ପ୍ରାୟ ଦୁଇଦଶକ ପରେ ଜେଡିୟୁକୁ ପଛରେ ପକାଇ ବିଜେପି ବଡ ଦଳ ହୋଇଛି । ବିଜେପିକୁ ୭୪ ଆସନ ମିଳିଥିବାବେଳେ ଜେଡିୟୁକୁ ୪୩ ଆସନ ମିଳିଛି । ବିଜେପି ମନ୍ତ୍ରିମଣ୍ଡଳରେ ଅଧିକ ଭାଗ ଦାବି କରିପାରେ ।
ନିର୍ବାଚନୀ ସଫଳତା ପରେ ଏନ୍ଡିଏର ସମସ୍ତ କର୍ମକର୍ତାଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ ମୋଦି କହିଛନ୍ତି-ଦେଶର ବିକାଶ ଓ ଲୋକଙ୍କ ବିକାଶକୁ ଲକ୍ଷ୍ୟରେ ରଖି ଏନ୍ଡିଏ ଅଗ୍ରସର ହେଉଛି । ଏବେ ଦେଶରେ ସେମାନଙ୍କୁ ସେବା କରିବାର ସୁଯୋଗ ମିିଳିବ ଯେଉଁମାନେ ଦେଶର ବିକାଶକୁ ଲକ୍ଷ୍ୟରେ ରଖି ନିଷ୍ଠାପର ଓ ସ୍ୱଚ୍ଛ ନୀତିରେ କାମ କରିବେ । ଦେଶରେ ପରିବାର ଗୁଡ଼ିକରେ ଥିବା ଦଳ ଗଣତନ୍ତ୍ର ପାଇଁ ବିପଦ ବୋଲି ପ୍ରଧାନମନ୍ତ୍ରୀ ତାଙ୍କ ଭାଷଣରେ କହିଛନ୍ତି ।
କଂଗ୍ରେସକୁ ସମାଲୋଚନା କରିବା ସହ ବିଜୟରେ ଉତ୍ସାହିତ ଏବଂ ପରାଜୟରେ ଅବସୋସ ଭାବ ନରଖି କାମ କରିବା ଆମର ମୁଳମନ୍ତ୍ର ହେବା ଆବଶ୍ୟକ ବୋଲି କହିଛନ୍ତି ପ୍ରଧାନମନ୍ତ୍ରୀ । ବିହାର ବିଜୟ ପରେ ଦିଲ୍ଲୀ ବିଜେପି ମୁଖ୍ୟାଳୟରେ ବିଜୟ ଉତ୍ସବ ପାଳନ କରିଛି । ହଜାର ହଜାର ସଂଖ୍ୟାରେ କର୍ମୀ ଓ ଦଳର ତୁଙ୍ଗ ନେତା ବିଜୟ ଉତ୍ସବରେ ସାମିଲ ହୋଇଥିଲେ । ଏହି ବିଜୟୀ ଉତ୍ସବରେ ପ୍ରଧାନମନ୍ତ୍ରୀଙ୍କ ସମେତ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ପ୍ରତିରକ୍ଷାମନ୍ତ୍ରୀ ରାଜନାଥ ସିଂ, ଗୃହମନ୍ତ୍ରୀ ଅମିତ ଶାହା ସାମିଲ ହୋଇଥିଲେ ।