କନକ ବ୍ୟୁରୋ : ଏନଡିଏର ନେତା ଭାବେ ନିର୍ବାଚିତ ହେବା ପରେ ରବିବାର ପ୍ରଧାନମନ୍ତ୍ରୀ ଭାବେ ଶପଥ ନେବେ ନରେନ୍ଦ୍ର ମୋଦୀ । ଚଳିତ ନିର୍ବାଚନରେ ବିଜେପିକୁ ସ୍ପଷ୍ଟ ବହୁମତ ମିଳିନଥିବା ବେଳେ ଏନଡିଏର ସହଯୋଗୀ ଦଳକୁ ନେଇ ସରକାର ଗଢିବେ ମୋଦୀ । କୌଣସି ଦଳକୁ ସ୍ପଷ୍ଟ ବହୁମତ ମିଳିନଥିବା ବେଳେ ଇଣ୍ଡିଆ ମେଣ୍ଟ ମଧ୍ୟ ସରକାର ଗଢିବାକୁ ପ୍ରୟାସ କରିଥିଲା । ଯାହାର ଖୁଲାସା କରିଛନ୍ତି ଜେଡିୟୁର ବରିଷ୍ଠ ନେତା କେସି ତ୍ୟାଗୀ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମରେ କେସି ତ୍ୟାଗୀ ଦେଇଥିବା ପ୍ରତିକ୍ରିୟାରେ କହିଛନ୍ତି, ଆମ ଦଳର ନେତାଙ୍କୁ ଅନେକ ଅଫର ମିଳିଥିଲା କିନ୍ତୁ ଏହାକୁ ପ୍ରତ୍ୟାଖାନ କରିଥିଲେ ନୀତିଶ । ଏପରିକି ପ୍ରଧାନମନ୍ତ୍ରୀ ହେବାକୁ ମଧ୍ୟ ଅଫର ଆସିଥିଲା । ଏଭଳି ଅଫର ସେଭଳି ଲୋକଙ୍କ ଠାରୁ ଆସିଥିଲା ଯେଉଁମାନେ ଇଣ୍ଡିଆ ମେଣ୍ଟରେ ନୀତିଶଙ୍କୁ ସଂଯୋଜକ କରିବାକୁ ମଧ୍ୟ ମନା କରିଥିଲେ । ଇଣ୍ଡିଆ ମେଣ୍ଟର ଆମେ ସୃଷ୍ଟିକର୍ତ୍ତା ଥିଲୁ । କଂଗ୍ରେସ ଦଳକୁ ନେଇ ଅନ୍ୟ ଦଳ ମଧ୍ୟରେ ଥିବା ଦୂର କରିଥିଲେ ନୀତିଶ । ଅଖିଳେଶ ଯାଦବ, କେଜ୍ରିୱାଲ, ମମତା ବାନାର୍ଜୀ କଂଗ୍ରେସ ସହ ମଞ୍ଚ ସେୟାର କରିବାକୁ ମଧ୍ୟ ପ୍ରସ୍ତୁତ ନଥିଲେ ।
ଆମ ଦଳ ଓ ନେତାଙ୍କ ସହ ଯେଉଁଭଳି ବ୍ୟବହାର କରାଗଲା ତାହାର ଫଳସ୍ୱରୂପ ଆମେ ଇଣ୍ଡିଆ ମେଣ୍ଟରୁ ବାହାରି ଏନଡିଏରେ ଯୋଗ ଦେଇଥିଲୁ । ନିର୍ବାଚନ ଫଳାଫଳ ଆସିବା ପରେ ଇଣ୍ଡିଆ ମେଣ୍ଟର ଅନେକ ଶୀର୍ଷ ନେତୃତ୍ୱ ନୀତିଶଙ୍କ ସହ ଯୋଗାଯୋଗ କରିବାକୁ ଚାହୁଁଥିଲେ । କିନ୍ତୁ ଦଳ ପକ୍ଷରୁ ପଛକୁ ଫେରିବାର ପ୍ରଶ୍ନ ଉଠୁନଥିଲା । ଏବେ ଆମେ ମୋଦୀଙ୍କ ନେତୃତ୍ୱରେ ଏନଡିଏକୁ ଶକ୍ତିଶାଳୀ କରିବୁ ।