ଅପରାହ୍ନ ୧୨ଟାରେ ନବୀନ-ନୀତିଶ ଭେଟଘାଟ । ଦେଢ ଘଣ୍ଟା ଧରି ନବୀନ ନିବାସରେ ରହିବେ ନୀତିଶ, କଣ ହେବ ଆଲୋଚନା ତାହା ଉପରେ ସଭିଙ୍କ ନଜର ।
କନକ ବ୍ୟୁରୋ : ଆଜି ଓଡ଼ିଶା ଆସୁଛନ୍ତି ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ଅପରାହ୍ନ ୧୨ଟାରେ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିବେ ନୀତିଶ କୁମାର । ବିହାର ପାଟନାରୁ ନୀତିଶ ବାହାରି ସାରିଥିବା ବେଳେ ଦିନ ସାଢେ ୧୧ଟାରେ ବିଜୁ ପଟ୍ଟନାୟକ ବିମାନ ବନ୍ଦରରେ ପହଞ୍ଚିବେ । ବିମାନ ବନ୍ଦରରୁ ରାଜ୍ୟ ଅତିଥି ଭବନ ଯିବେ ନୀତିଶ । ସେଠାରୁ ବାହାରି ଅପରାହ୍ନ ୧୨ଟାରେ ନବୀନ ନିବାସରେ ପହଞ୍ଚିବେ ନୀତିଶ । ଏହାପରେ ନବୀନ ନିବାସରେ ଦୀର୍ଘ ଦେଢ ଘଣ୍ଟା ରହିବେ ନୀତିଶ । ଏହି ଦେଢ ଘଣ୍ଟାରେ ଉଭୟ ନେତାଙ୍କ ମଧ୍ୟରେ କବାଟକିଳା ଆଲୋଚନା ହେବ । ତେବେ କେଉଁ ପ୍ରସଙ୍ଗରେ ଉଭୟ ନେତା ଆଲୋଚନା କରିବେ ତାହା ଏଯାଏଁ ସ୍ଥିର ହୋଇନାହିଁ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ରାଜନୈତିକ ମହଲରେ ହେଉଥିବା ଚର୍ଚ୍ଚା ଅନୁଯାୟୀ, ତୃତୀୟ ସାମ୍ମୁଖ୍ୟ ବାବଦରେ ଉଭୟ ନେତାଙ୍କ ମଧ୍ୟରେ ଆଲୋଚନା ହୋଇପାରେ । କାରଣ ଏହାପୂର୍ବରୁ ନୀତିଶ ବିଭିନ୍ନ ରାଜ୍ୟର ନେତାଙ୍କୁ ଭେଟି ଏ ପ୍ରସଙ୍ଗରେ ଆଲୋଚନା କରିଛନ୍ତି । କିନ୍ତୁ ନବୀନ ଏଯାଏଁ କୌଣସି ଫ୍ରଣ୍ଟରେ ଯୋଗ ଦେଇନାହାନ୍ତି । ୨୦୧୯ରେ ମଧ୍ୟ ବିଜେପି ବିରୋଧରେ ଏକ ମୋର୍ଚ୍ଚା ଗଠନ ପାଇଁ ଯେତେବେଳେ ଜୋର ଦିଆଯାଇଥିଲା ସେତେବେଳେ ନବୀନ ଏଥିରୁ ଦୂରେଇ ରହିଥିଲେ । କିନ୍ତୁ ୨୦୨୪ ନିର୍ବାଚନ ପୂର୍ବରୁ ସବୁ ବିରୋଧୀଙ୍କୁ ଏକଜୁଟ୍ କରୁଛନ୍ତି ନୀତିଶ । ଏଥିପାଇଁ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାର୍ନାଜୀ, କଂଗ୍ରେସ ନେତା ରାହୁଲ ଗାନ୍ଧୀଙ୍କ ସମେତ ଅନ୍ୟ ବିରୋଧୀ ଦଳର ନେତାଙ୍କୁ ଭେଟିବା ଜାରି ରଖିଛନ୍ତି । ଅନ୍ୟପଟେ ନବୀନ ଉଭୟ ବିଜେପି ଓ କଂଗ୍ରେସ ଠାରୁ ସମଦୂରତ୍ୱ ବଜାୟ ରଖୁଥିବାରୁ ତୃତୀୟ ସାମ୍ମୁଖ୍ୟରେ ଯୋଗ ଦେବା ପାଇଁ ନବୀନଙ୍କ ସହ ଆଲୋଚନା କରିବାକୁ ବିହାରରୁ ଆସୁଛନ୍ତି ନୀତିଶ । ତେବେ ଉଭୟଙ୍କ ଆଲୋଚନାର ଫଳାଫଳ କଣ ହେବ ତାହା ଉପରେ ସମସ୍ତଙ୍କର ନଜର ରହିଛି ।