କନକ ବ୍ୟୁରୋ : ନିର୍ଭୟା ଦୋଷୀଙ୍କୁ ପୃଥକ୍ ପୃଥକ୍ ଫାଶୀଦଣ୍ଡ ଦେବା ପାଇଁ କେନ୍ଦ୍ର ସରକାରଙ୍କ ଆବେଦନ ଉପରେ ସୁପ୍ରିମକୋର୍ଟ ଶୁଣାଣି କରିଛନ୍ତି । ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହଟ୍ଟା କହିଛନ୍ତି, ନିର୍ଭୟା ଦୋଷୀ ଆଇନର ଅପ-ବ୍ୟବହାର କରୁଛନ୍ତି । ତୁଷାର ମେହଟ୍ଟା ଆହୁରି ମଧ୍ୟ କହିଛନ୍ତି – ଫାଶୀଦଣ୍ଡରେ ହେଉଥିବା ବିଳମ୍ବତା କାରଣରୁ ଲୋକଙ୍କର ଆଇନ ଉପରୁ ଭରସା ତୁଟି ଯାଉଛି । ସଲିସିଟର ଜେନେରାଲ ତୁଷାର ମେହଟ୍ଟା କୋର୍ଟଙ୍କୁ ପାଖରେ ଦୋଷୀଙ୍କୁ ନେଇ ରିପୋର୍ଟ ଦାଖଲ କରିଛନ୍ତି । ଯେଉଁଥିରେ ୪ ଦୋଷୀଙ୍କ ସମସ୍ତ ତଥ୍ୟ ରହିଥିବା କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଶୁଣାଣି ବେଳେ ବିଚାରପତି ଅଶୋକ ଭୂଷଣ କହିଛନ୍ତି, ଦୋଷୀ ପବନର ଆଇନ ଗତ ପ୍ରକ୍ରିୟା ବାକି ରହିଛି । ଆପଣ ତାଙ୍କୁ ବାଧ୍ୟ କରିପାରିବେନି । ମାତ୍ର ଡେଥ୍ ୱାରେଂଟ୍ ପାଇଁ ତଳ କୋର୍ଟରେ ଆବେଦନ କରିପାରିବେ । ଶୁଣାଣି ବେଳେ ତୁଷାର ମେହଟ୍ଟା କୋର୍ଟଙ୍କୁ ଜେଲ ମାନୁଆଲ ରୁଲ ନମ୍ବର ୮୩୬ ଆଧାରରେ ଦୋଷୀଙ୍କୁ ପୃଥକ୍ ପୃଥକ୍ ଫାଶୀଦଣ୍ଡ ଦିଆଯାଇ ପାରିବ ବୋଲି ଯୁକ୍ତି ବାଢିଛନ୍ତି । ସେ କହିଛନ୍ତି ପବନଙ୍କ ଛଡା ବାକି ଦୋଷୀ ମୁକେଶ ସିଂହ, ଅକ୍ଷୟ ଠାକୁର ଓ ବିନୟ ଶର୍ମାଙ୍କୁ ଫାଶୀଦଣ୍ଡ ଦିଆଯିବା ପାଇଁ ଅନୁମତି ଦିଆଯାଉ । ତେବେ ମାମଲାର ପରବର୍ତୀ ଶୁଣାଣୀ ଆସନ୍ତା ଗୁରୁବାର ହେବ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି ।