୮୨ ଦିନ ପରେ ନୀଳଗିରି ବିଧାୟକଙ୍କୁ ପୁଣି କରୋନା ନେଇ ବରିଷ୍ଠ ଡାକ୍ତରଙ୍କ ପ୍ରତିକ୍ରିୟା । କହିଲେ, ପୁଣି ଥରେ ହୋଇଥାଇପାରେ ସଂକ୍ରମଣ, ବିଧାୟକଙ୍କ ଘରକୁ ଯାଇ ସ୍ୱାସ୍ଥ୍ୟବସ୍ଥା ପଚାରି ବୁଝିଲେ ବିଏମସିର ଡାକ୍ତର ।
କନକ ବ୍ୟୁରୋ : କରୋନାରେ ପଜିଟିଭ ଚିହ୍ନଟ ହେବାର ୮୨ ଦିନ ପରେ ପୁଣିଥରେ ନୀଳଗିରି ବିଧାୟକ ସୁକାନ୍ତ ନାୟକ ପଜିଟିଭ୍ ଆସିବା ଘଟଣା ଚର୍ଚ୍ଚାର ବିଷୟ ପାଲଟିଛି । ବିଧାୟକ ପୁଣି ଥରେ କରୋନାରେ ସଂକ୍ରମିତ ହୋଇଥାଇ ପାରନ୍ତି ବୋଲି ଆଶଙ୍କା କରିଛନ୍ତି ବିଶେଷଜ୍ଞ ଡାକ୍ତର । ବିଏମସି ପକ୍ଷରୁ ଡାକ୍ତର ଯାଇ ସୁକାନ୍ତଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି । ତେବେ ତାଙ୍କ କ୍ଷେତ୍ରରେ କଣ ହୋଇଥାଇପାରେ ତାକୁ ନେଇ ଡାକ୍ତର ମାନେ ଦ୍ୱନ୍ଦ୍ୱରେ ଅଛନ୍ତି । ପୁଣିଥରେ ସଂକ୍ରମଣ ହୋଇଥାଇପାରେ କିମ୍ବା ପୁରୁଣା ସଂକ୍ରମଣ ଠିକ୍ ଭାବରେ ତାଙ୍କ ଶରୀରରୁ ଯାଇନଥିବା ମଧ୍ୟ ସନ୍ଦେହ କରାଯାଉଛି । ପୂର୍ବରୁ ହଂକଂରେ ଏବଂ ଭାରତର ବାଙ୍ଗାଲୋରରେ ପୁଣିଥରେ ସଂକ୍ରମଣର ନଜିର ରହିଛି ।
Kanak News is now on WhatsApp
Join and get latest news updates delivered to you via WhatsApp
ନୀଳଗିରି ବିଧାୟକ ସୁକାନ୍ତ ନାୟକ ୮୨ ଦିନ ପରେ ପୁଣି ଥରେ ପଜିଟିଭ ଚିହ୍ନଟ ହେବା ଘଟଣା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ତେବେ ତାଙ୍କୁ ପୁଣିଥରେ ସଂକ୍ରମଣ ହୋଇଛି ନା ପୁରୁଣା ସଂକ୍ରମଣ ଏବେ ବି ଛାଡିନାହିଁ, ତାହା ତର୍ଜମାର ବିଷୟ । କିନ୍ତୁ ବିଧାୟକ ନାୟକଙ୍କୁ, ଗତ ସେପ୍ଟେମ୍ବର ୧୨ ତାରିଖରୁ ପୁଣି ଜ୍ୱର ଆସୁଛି । ଅଢେଇ ମାସ ତଳେ ଜୁଲାଇ ୬ ତାରିଖରେ ସେ ପ୍ରଥମେ ପଜିଟିଭ ଚିହ୍ନଟ ହୋଇଥିଲେ । ଅବଶ୍ୟ ସେତେବେଳେ ତାଙ୍କୁ କୌଣସି ଲକ୍ଷଣ ଆସିନଥିଲା । କିନ୍ତୁ ଏବେ ତାଙ୍କ ଠାରେ ଲକ୍ଷଣ ଦେଖିବାକୁ ମିଳୁଛି ।
ପୁଣି ଥରେ ପଜିଟିଭ ଚିହ୍ନଟ ହେବା ପରେ ସୁକାନ୍ତଙ୍କ ଘରକୁ ବିଏମସି ପକ୍ଷରୁ ଡାକ୍ତର ଯାଇ ତାଙ୍କର ସ୍ୱାସ୍ଥ୍ୟବସ୍ଥା ବୁଝିଛନ୍ତି । ଏପଟେ ରାଜ୍ୟର ବରିଷ୍ଠ ଚିକିତ୍ସକମାନେ କହୁଛନ୍ତି, ବିଧାୟକଙ୍କୁ ପୁଣିଥରେ ସଂକ୍ରମଣ ହୋଇଥାଇପାରେ, କିମ୍ବା ପୁରୁଣା ସଂକ୍ରମଣର ମୃତ ଭୂତାଣୁ ଶରୀରରେ ରହିଥିବାରୁ ପଜିଟିଭ ଆସୁଛି ।
ପୂର୍ବରୁ ହଂକଂ ଓ ଭାରତର ବାଙ୍ଗାଲୋର ସମେତ କିଛି ସ୍ଥାନରେ କିଛି ମାସ ପରେ ଦ୍ୱିତୀୟ ବାର କରୋନା ସଂକ୍ରମଣ ହୋଇଥିବାର ପ୍ରମାଣ ମିଳିଛି । ପ୍ରଥମ ସଂକ୍ରମଣ ଓ ଦ୍ୱିତୀୟ ସଂକ୍ରମଣର ଭାଇରସ ଭିନ୍ନ ପ୍ରକାରର ଥିଲେ । ତେଣୁ ଦ୍ୱିତୀୟ ବାର ସଂକ୍ରମଣ ହୋଇଥିଲା ବୋଲି ପ୍ରମାଣ ମିଳିଥିଲା ।
ଦୁଇ ଦିନ ତଳେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡାକ୍ତର ହର୍ଷବର୍ଦ୍ଧନ କହିଛନ୍ତି, ଭାରତରେ ଖୁବ କମ୍ ସଂଖ୍ୟାରେ ପୁଣି ଥରେ ସଂକ୍ରମଣର ରିପୋର୍ଟ ଆସୁଛି । କିନ୍ତୁ ଏହି ପ୍ରସଙ୍ଗରେ ଅଧିକ ଗବେଷଣା ଚାଲିଛି ଏବଂ ଏଯାଏଁ ଦ୍ୱିତୀୟ ସଂକ୍ରମଣ ମାରାତ୍ମକ ହେଉନଥିବା ଦେଖିବାକୁ ମିଳିଛି ବୋଲି କହିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ।