ଲୀଳାଖେଳା ସାରି ରତ୍ନବେଦୀକୁ ବାହୁଡିଗଲେ ମହାବାହୁ… ବର୍ଷେ ପରେ ପୁଣି ବଡଦାଣ୍ଡକୁ ଆସିବ କାଳିଆ । ନୀଳକନ୍ଦରକୁ ଯିବା ବେଳେ ଟାହିଆ ହଲେଇ ହଲେଇ ଭକ୍ତଙ୍କୁ ଜଗା କହୁଥିଲା, ଅପେକ୍ଷା କର ମୁଁ ପୁଣି ଆସିବି ଆର ବର୍ଷକୁ…
କନକ ବ୍ୟୁରୋ: କରୋନା କଟକଣା ଭିତରେ ବଡଦାଣ୍ଡକୁ ଆସି ପୁଣି ବଡଦେଉଳକୁ ଫେରିଗଲେ ମହାବାହୁ । ଭାଇ ଭଉଣୀଙ୍କୁ ଘେନି ନବଦିନାତ୍ମକ ଯାତ୍ରା ସାରି ପୁଣି ରତ୍ନସିଂହାସନରେ ବିରାଜିଛନ୍ତି କାଳିଆ ସାଆନ୍ତ । କରୋନା କଟକଣା ପାଇଁ କାଳିଆକୁ ଦେଖି ପାରୁନଥିଲା ଭକ୍ତ । ଶ୍ରୀମନ୍ଦିର ବନ୍ଦ ଥିବାରୁ ବଡଦାଣ୍ଡରେ ଭଗବାନଙ୍କୁ ଝୁରୁଥିଲା ଭକ୍ତ । ଆଉ ୟାରି ଭିତରେ ଭକ୍ତଙ୍କ ମନ ବୁଝି ବଡଦେଉଳରୁ ବାହାରି ସାରା ବିଶ୍ୱକୁ ଦର୍ଶନ ଦେଇଥିଲେ ଚକାଆଖି । ଆଉ ମହାବାହୁଙ୍କୁ ଦେଖି କୃତ୍ୟକୃତ୍ୟ ହୋଇଥିଲା ମନ ।
Kanak News is now on WhatsApp
Join and get latest news updates delivered to you via WhatsApp
ରଥଯାତ୍ରା ହେବ କି ନାହିଁ ଏହି ଦ୍ୱନ୍ଦ ଭିତରେ ବିଶ୍ୱର ସୁପ୍ରିମ ଭଗବାନ ସୁପ୍ରିମକୋର୍ଟଙ୍କ ଜରିଆରେ କଟକଣା ଭିତରେ ରଥଯାତ୍ରା ପାଇଁ ଅନୁମତି ଦେଇଥିଲେ । ଆଉ ଭାବବିହ୍ୱଳ ହୋଇ ଭକ୍ତ ଏହା କାଳିଆର ଲୀଳା କହି ତା ଆଗମନୀକୁ, ତା ଗୁଣ୍ଡିଚାଯାତକୁ ଅନେଇ ରହିଥିଲା । ଶେଷରେ ରଥଯାତ୍ରା ଦିନ ଟାହିଆ ହଲେଇ ହଲେଇ ଆସିଥିଲେ ମହାବାହୁ ଆଉ ଭକ୍ତଙ୍କୁ ପଚାରିଥିଲେ ହୋ ଭକତେ କେମିତି ଅଛ…? କାଳିଆ କଟକଣା ତ ଟାଣିଥିଲା ହେଲେ ଭକ୍ତଶୂନ୍ୟ ବଡଦାଣ୍ଡ ଦେଖି ଭିତରେ ଭିତରେ କାନ୍ଦିଥିଲା । ଆଉ ଖାଁ ଖାଁ ବଡଦାଣ୍ଡରେ ତା ପ୍ରିୟ ଭକ୍ତଙ୍କୁ ଖୋଜିଥିଲା । ଘୋଷଯାତ୍ରାଠୁ ବାହୁଡା, ସୁନାବେଶଠୁ ଅଧରପଣା । ନୀଳାଦ୍ରୀବିଜେ ଦିନ ବି ଭକ୍ତଙ୍କୁ ନପାଇ ଭାରି ମନ ଦୁଃଖ କରିଥିଲା କାଳିଆ ।
ଶେଷରେ ରଥଯାତ୍ରାର ସବୁନୀତିକାନ୍ତି ସାରି ଆଜି ନୀଳକନ୍ଦରକୁ ବାହୁଡିଯାଇଛନ୍ତି ପ୍ରଭୁ ଜଗନ୍ନାଥ । ସିଂହଦ୍ୱାର ସାମ୍ନାରେ ପତ୍ନୀଙ୍କୁ ମିଠା ଦେଇ ମାନଭଞ୍ଜନ କରିବା ପରେ ଦେଉଳକୁ ପ୍ରବେଶ କରିଛନ୍ତି ଦାରୁଦେବତା । ତେବେ ଶ୍ରୀମନ୍ଦିର ଯିବା ବେଳେ ଜଗା ଟାହିଆ ହଲେଇ ହଲେଇ ତା ଭକ୍ତଙ୍କୁ କହୁଥିଲା, ଅପେକ୍ଷା କର ମୁଁ ପୁଣି ଆସିବି ଆର ବର୍ଷକୁ… । ସେପଟେ ଭକ୍ତ ଲକଡାଉନ ନଫିଟିବା ଯାଏଁ ତା ସାଆନ୍ତକୁ ଦେଖି ପାରିବନି ବୋଲି ଆଖି ଛଳଛଳ କରିଥିଲା । ଆଉ କହୁଥିଲା ଜଗାରେ ତୁ ଯାଆନା…