ଦେଶରେ ବଢୁଛି କରୋନା ସଂକ୍ରମଣ, ମହାରାଷ୍ଟ୍ର ସ୍ଥିତି ଉଦବେଗଜନକ । ନାସିକରେ ସପ୍ତାହନ୍ତ ତାଲାବନ୍ଦ ଲଗାଇଲେ ଜିଲ୍ଲା ପ୍ରଶାସନ, କାଲିଠୁ ଥାଣେର ୧୧ଟି ହଟସ୍ପଟରେ ଲକଡାଉନ ଜାରି ।
କନକ ବ୍ୟୁରୋ: ମାର୍ଚ୍ଚ ପହିଲାରୁ ମାର୍ଚ୍ଚ ୭ ତାରିଖ ମଧ୍ୟରେ କେବଳ ମହାରାଷ୍ଟ୍ରରେ ୬୪ ହଜାର ୬୫୭ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହା ସୂଚାଉଛି ମହାରାଷ୍ଟ୍ରରେ କରୋନ କେତେ ଦ୍ରତ ବେଗରେ ଲୋକଙ୍କୁ ସଂକ୍ରମିତ କରୁଛି । ଅକ୍ଟୋବର ମାସରୁ ମହାରାଷ୍ଟ୍ରରେ କରୋନା ସ୍ଥିତରେ ସୁଧାର ଆସିଥିବା ବେଳେ ଅନଲକ ପର୍ଯ୍ୟାୟ ଆରମ୍ଭ ହେବା ପରେ ଜାନୁଆରୀ ମାସରୁ ପୁଣି ସ୍ଥିତି ବିଗୁଡୁଛି । ତେଣୁ କରୋନା ମାହମାରୀର ମୁକାବିଲା ପାଇଁ ପାଳନ କରାଯାଉଥିବା କଟକଣାକୁ ହାଲୁକାରେ ନେବାରୁ ଏପରି ସ୍ଥିତି ଉପୁଜିଥିବା କୁହାଯାଉଛି ।
Kanak News is now on WhatsApp
Join and get latest news updates delivered to you via WhatsApp
କରୋନାର ଦ୍ରୁତ ସଂକ୍ରମଣକୁ ଆଖିରେ ରଖି ନାସିକ ଜିଲ୍ଲା ପ୍ରଶାସନ ପକ୍ଷରୁ ସଂକ୍ରମିତ ଅଂଚଳରେ ୱିକେଣ୍ଡ ଲକଡାଉନ ବା ସପ୍ତାହନ୍ତ ତାଲାବନ୍ଦ ଲାଗୁ କରାଯାଇଛି । ସେହିପରି ମାର୍ଚ୍ଚ ୧୫ ପରେ ବିବାହ ଉତ୍ସବକୁ ଅନୁମତି ମିଳିବ ନାହିଁ ବୋଲି ଘୋଷଣା କରାଯାଇଛି । ଜରୁରୀ ସେବାକୁ ଛାଡି ସମସ୍ତ ଦୋକାନ ସନ୍ଧ୍ୟା ୭ଟାରୁ ସକାଳ ୭ଟା ଯାଏଁ ବନ୍ଦ ରହିବ । ରାତି ୧୧ଟା ଯାଏଁ ସାମଗ୍ରୀର ହୋମ ଡେଲିଭରିକୁ ଅନୁମତି । ନାସିକ ସହର, ମାଲେଗାଓଁ ଏବଂ ଅଧିକ ମାମଲା ଆସିଥିବା ଗ୍ରାମାଂଚଳର ସମସ୍ତ ସ୍କୁଲ କଲେଜକୁ ବନ୍ଦ କରିଦିଆଯିବ । ସେପଟେ ଠାଣେ ପ୍ରଶାସନ ସଂକ୍ରମଣ ଥିବା ୧୬ଟି ହଟସ୍ପଟ ଅଂଚଳରେ ମାର୍ଚ୍ଚ ୯ରୁ ୩୧ ଯାଏଁ ଲକଡାଉନ ଲାଗୁ କରିଛି ।
ସେପଟେ ଦେଶର ୩୬ ରାଜ୍ୟ ଓ କେନ୍ଦ୍ର ଶାସିତ ଅଂଚଳ ମଧ୍ୟରୁ ୨୪ ରାଜ୍ୟରେ ଗତ ସପ୍ତାହରେ ୧୦ ପ୍ରତିଶତ କରୋନା ସଂକ୍ରମିତଙ୍କ ମାମଲା ବଢିଛି । ମହାରାଷ୍ଟ୍ରରେ ମାର୍ଚ୍ଚ ମାସର ପ୍ରଥମ ସପ୍ତାହରେ ୬୪ ହଜାର ୬୫୭ ନୂଆ ମାମଲା, କେରଳରେ ୧୭ ହଜାର ୯୨୪ ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିପରି ପଞ୍ଜାବରେ ମାର୍ଚ୍ଚ ପ୍ରଥମ ସପ୍ତାହରେ ୬ ହଜାର ୨୧୫ ନୂଆ ମାମଲା ଚିହ୍ନଟ ହୋଇଛନ୍ତି । କର୍ଣ୍ଣାଟକରେ ୩ ହଜାର ୭୬୪, ତାମିଲନାଡୁର ୩ ହଜାର ୫୭୯ ଓ ଗୁଜୁରାଟରେ ମାର୍ଚ ପ୍ରଥମ ସପ୍ତାହରେ ୩ ହଜାର ୪୯୭ କୋଭିଡ ପଜିଟିଭ ଚିହ୍ନଟ ହୋଇଛନ୍ତି ।