କନକ ବ୍ୟୁରୋ : ୟୁକ୍ରେନର ରାଷ୍ଟ୍ରପତି ଭୋଲୋଡିମିର ଜେଲେନସ୍କି ମସ୍କୋରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ଭେଟିବାକୁ ମନା କରିଦେଇଛନ୍ତି । ଜେଲେନସ୍କି ଏକ ସାକ୍ଷାତକାରରେ କହିଛନ୍ତି, ମୁଁ ଆତଙ୍କବାଦୀଙ୍କ ରାଜଧାନୀକୁ ଯିବି ନାହିଁ  , କାରଣ ୟୁକ୍ରେନ ପ୍ରତିଦିନ କ୍ଷେପଣାସ୍ତ୍ର ଆକ୍ରମଣର ସମ୍ମୁଖୀନ ହେଉଛି । ପୁଟିନ ବୈଠକ ପାଇଁ କିବ୍ ଆସିପାରିବେ । ଜେଲେନସ୍କି କହିଛନ୍ତି ଯେ ମସ୍କୋରେ ଆଲୋଚନା ପ୍ରସ୍ତାବ ଦେବା ରୁଷ ଶାନ୍ତି ଆଲୋଚନାରେ ଆଗ୍ରହୀ ନୁହେଁ ବୋଲି ସୂଚିତ କରୁଛି ।

Advertisment

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଜେଲେନସ୍କି ଏବଂ ପୁଟିନଙ୍କ ମଧ୍ୟରେ ମୁହାଁମୁହିଁ ଆଲୋଚନା ପାଇଁ ଚାପ ପକାଉଛନ୍ତି । ଏଥିପାଇଁ ପୁଟିନ ଏବଂ ଟ୍ରମ୍ପ ଗତ ମାସରେ ଆଲାସ୍କାରେ ସାକ୍ଷାତ କରିଥିଲେ। ସେହିପରି ଭାରତ ମଧ୍ୟ ଆଲୋଚନାକୁ ସମର୍ଥନ କରୁଛି ଓ ବିବାଦର କୂଟନୈତିକ  ସମାଧାନ ବାହାର କରିବା ଉପରେ ଗୁରୁତ୍ବ ଦେଉଛି । 

ସୂଚନା ଅନୁସାରେ ରୁଷ ୟୁକ୍ରେନର ରାଜଧାନୀ କିଭ୍ ଉପରେ ରାତିସାରା ଆକ୍ରମଣ କରିଛି, ଯେଉଁଥିରେ ଜଣେ ନବଜାତ ଶିଶୁ ସମେତ ତିନି ଜଣଙ୍କର ମୃତ୍ୟୁ ଘଟିଛି ଏବଂ  ଅନ୍ୟ ୧୮ ଜଣ ଆହତ ହୋଇଛନ୍ତି । ରାଜଧାନୀରେ ସରକାରୀ ମୁଖ୍ୟାଳୟ ସମେତ ଅନେକ କୋଠାକୁ ନିଆଁ ଲଗାଇ ଦିଆଯାଇଛି । କିଭର ମେୟର ଭିଟାଲି କ୍ଲିଟ୍‌ସ୍କୋ କହିଛନ୍ତି ଯେ ପ୍ରଥମେ ସହର ଉପରେ ଡ୍ରୋନ୍ ଆକ୍ରମଣରୁ ଆରମ୍ଭ ହୋଇଥିଲା ଏବଂ ପରେ ମିସାଇଲ୍ ଆକ୍ରମଣ କରାଯାଇଥିଲା ।
ୟୁକ୍ରେନର ପ୍ରଧାନମନ୍ତ୍ରୀ ୟୁଲିଆ ସ୍ୱିରିଡେଙ୍କୋ କହିଛନ୍ତି ଯେ ଯୁଦ୍ଧ ସମୟରେ ପ୍ରଥମ ଥର ପାଇଁ ଶତ୍ରୁ ଆକ୍ରମଣରେ ୟୁକ୍ରେନ ସରକାରଙ୍କ ମୁଖ୍ୟ କୋଠା କ୍ଷତିଗ୍ରସ୍ତ ହୋଇଛି । ୟୁକ୍ରେନର ବାୟୁସେନା କହିଛି ଯେ ରୁଷ ରାତିସାରା ୟୁକ୍ରେନ ଉପରେ ୮୦୫ ଡ୍ରୋନ୍ ଏବଂ ୧୩ ମିସାଇଲ୍ ମାଡ଼ କରିଛି । କ୍ଲିଟ୍‌ସ୍କୋ ଟେଲିଗ୍ରାମ ମେସେଜିଂ ଆପରେ କହିଛନ୍ତି ଯେ ଡ୍ରୋନ୍ ଆକ୍ରମଣରେ ଏକ ଶିଶୁ ଏବଂ ଜଣେ ଯୁବତୀଙ୍କର ମୃତ୍ୟୁ ଘଟିଛି । ଏହା ଜଣେ ଗର୍ଭବତୀ ମହିଳାଙ୍କ ସମେତ ପାଞ୍ଚ ଜଣ ଡାକ୍ତରଖାନାରେ ଭର୍ତ୍ତି ହୋଇଛନ୍ତି । 

ଡ୍ରୋନ୍‌ର ଭଗ୍ନାବଶେଷ ଖସିପଡିବା ଯୋଗୁଁ ଏକ ୧୬ ମହଲା ଆପାର୍ଟମେଣ୍ଟ ଏବଂ ଦୁଇଟି ନଅ ମହଲା କୋଠାରେ ମଧ୍ୟ ନିଆଁ ଲାଗିଯାଇଥିଲା । ଜରୁରୀକାଳୀନ ଅଧିକାରୀଙ୍କ ଦ୍ୱାରା ସୋସିଆଲ ମିଡିଆରେ ପୋଷ୍ଟ କରାଯାଇଥିବା ଫଟୋଗୁଡ଼ିକରେ ଆପାର୍ଟମେଣ୍ଟ କୋଠାରୁ ଧୂଆଁ ବାହାରୁଥିବା ଦେଖିବାକୁ ମିଳିଛି । କିଛି ମହଲା ଭୁଶୁଡି ପଡିଛି ଏବଂ ସାମ୍ନା ଭାଗ ବହୁତ କ୍ଷତିଗ୍ରସ୍ତ ହୋଇଛି। ତକାଚେଙ୍କୋ ଟେଲିଗ୍ରାମରେ କହିଛନ୍ତି ଯେ ରୁଷ ଜାଣିଶୁଣି ନାଗରିକମାନଙ୍କୁ ଟାର୍ଗେଟ କରି ଆକ୍ରମଣ କରୁଛି ।