ମୁହଁରେ ସରଳତା କିନ୍ତୁ ଉଦ୍ଦେଶ୍ୟ ସାଙ୍ଘାତିକ: ଜାଣନ୍ତୁ କିଏ ଏହି ଶିକ୍ଷକ, ଯିଏ ପହଲଗାମ ଆକ୍ରମଣରେ ଆତଙ୍କବାଦୀଙ୍କୁ କରିଥିଲେ ସାହାଯ୍ୟ

କନକ ବ୍ୟୁରୋ: ପହଲଗାମ ଆକ୍ରମଣରେ ଆତଙ୍କବାଦୀଙ୍କୁ ସହାୟତା କରିବା ଅଭିଯୋଗରେ ଜଣେ ଶିକ୍ଷକଙ୍କୁ ଗିରଫ କରାଯାଇଛି । ଶ୍ରୀନଗର ପୁଲିସ କୁଲଗାମରୁ ଅଭିଯୁକ୍ତକୁ ଗିରଫ କରିଛି । ଏପ୍ରିଲ ୨୨ ତାରିଖରେ, ପହଲଗାମର ବୈସାରନ ଉପତ୍ୟକାରେ ଆତଙ୍କବାଦୀମାନେ ୨୫ ଜଣ ପର୍ଯ୍ୟଟକଙ୍କୁ ସେମାନଙ୍କ ଧର୍ମ ପଚାରି ସେମାନଙ୍କୁ ଗୁଳି କରି ହତ୍ୟା କରିଥିଲେ । ଏହି ଆକ୍ରମଣ ପରେ କ'ଣ ଘଟିଥିଲା ତାହା ସମଗ୍ର ଦେଶ ଏବଂ ବିଶ୍ୱ ଜାଣନ୍ତି । ଫଟୋରେ ଦେଖାଯାଉଥିବା ଏହି ବ୍ୟକ୍ତି ଜଣକ ହେଉଛନ୍ତି ମହମ୍ମଦ ୟୁସୁଫ୍ କଟାରି, ଯାହାକୁ ପହଲଗାମ୍ ଆକ୍ରମଣରେ ଆତଙ୍କବାଦୀଙ୍କୁ ସହାୟତା କରିବା ଅଭିଯୋଗରେ ଜମ୍ମୁ ଏବଂ କାଶ୍ମୀର ପୁଲିସ ଗିରଫ କରିଥିଲା । ୟୁସୁଫ୍ କଟାରିଙ୍କ ଯେଉଁ ପ୍ରଥମ ଫଟୋ ସାମ୍ନାକୁ ଆସିଛି, ସେଥିରେ ସେ ଜଣେ ସାଧାରଣ ଚେହେରା ସହିତ ସାଧାରଣ ଯୁବକ ପରି ମନେହୁଏ । କିନ୍ତୁ ଏହି ସାଧାସିଧା ଚେହେରା ପଛରେ ଗୋଟିଏ ସୈତାନ ଦିମାଗ ଲୁଚି ଥିବ ବୋଲି ଭାବିନଥିବେ ।  

ପହଲଗାମ ଆତଙ୍କବାଦୀ ଆକ୍ରମଣର ପ୍ରାୟ ପାଞ୍ଚ ମାସ ପରେ, ଜମ୍ମୁ ଏବଂ କାଶ୍ମୀର ପୁଲିସ ବୁଧବାର ଦିନ ଦକ୍ଷିଣ କାଶ୍ମୀରରୁ ୟୁସୁଫ୍ କଟାରିଙ୍କୁ ଗିରଫ କରିଛି । ଜମ୍ମୁ ଏବଂ କାଶ୍ମୀରର  ଏହି ୨୬ ବର୍ଷୀୟ ଶିକ୍ଷକ ୟୁସୁଫ୍ କଟାରି ଲସ୍କର-ଏ-ତୈବା ସହିତ ଜଡିତ ବୋଲି କୁହାଯାଉଛି । ତାଙ୍କୁ କୋର୍ଟରେ ହାଜର କରାଯାଇ ନ୍ୟାୟିକ ହାଜତକୁ ପଠାଇ ଦିଆଯାଇଛି ।  ଜମ୍ମୁ ଏବଂ କାଶ୍ମୀର ପୁଲିସ ସୂତ୍ର ଅନୁଯାୟୀ, ଅପରେସନ ମହାଦେବରେ ନିହତ ଲସ୍କର ଆତଙ୍କବାଦୀଙ୍କଠାରୁ ଉଦ୍ଧାର କରାଯାଇଥିବା ଅସ୍ତ୍ରଶସ୍ତ୍ର ଯାଞ୍ଚ କରିବା ପରେ ପୁଲିସକୁ ମହମ୍ମଦ କଟାରିଆ  ସଂସ୍ଲିଷ୍ଟ ଥିବା ନେଇ  ସୁରାଗ ମିଳିଥିଲା । ତେବେ ଅପରେସନ ମହାଦେବରେ ସୁରକ୍ଷା ବାହିନୀ ପହଲଗାମ ଆକ୍ରମଣ ପାଇଁ ଦାୟୀ ତିନି ଜଣ ପାକିସ୍ତାନୀ ଆତଙ୍କବାଦୀଙ୍କୁ ହତ୍ୟା କରିଥିଲେ। ।