ପାକିସ୍ତାନ ଗୁପ୍ତଚରର ପୁରୀ ଲିଙ୍କ୍

କନକ ବ୍ୟୁରୋ: ପାକିସ୍ତାନ ପାଇଁ ଗୁପ୍ତଚରଗିରି କରୁଥିବା ଅଭିଯୋଗରେ ଗିରଫ ହରିୟାଣାର ଜ୍ୟୋତି ମାଲହୋତ୍ରାଙ୍କ ସହ ରହିଛି ପୁରୀର ୟୁଟ୍ୟୁବର୍ ପ୍ରିୟଙ୍କା ସେନାପତିଙ୍କ ନିବିଡ଼ ସମ୍ପର୍କ । ଏଭଳି ତଥ୍ୟ ସାମ୍ନାକୁ ଆସିବା ପରେ ସାରା ରାଜ୍ୟରେ ହଇଚଇ ସୃଷ୍ଟି ହୋଇଛି । ଜ୍ୟୋତି ଗତ ସେପ୍ଟେମ୍ବରରେ ପୁରୀ ବୁଲିବାକୁ ଆସିଥିଲେ । ପୁରୀର ବେଳାଭୂମି, ଶ୍ରୀମନ୍ଦିର ସହ ଅନ୍ୟାନ୍ୟ ସ୍ଥାନ ବୁଲିଥିଲେ । ଆଉ ଏହି ସମୟରେ ପୁରୀର ପ୍ରିୟଙ୍କା ସେନାପତିଙ୍କ ସହ ସେ ବନ୍ଧୁତା କରିଥିଲେ ।

Advertisment

ପ୍ରିୟଙ୍କା ହେଉଛନ୍ତି ପୁରୀ ଶ୍ରୀମନ୍ଦିର ନିକଟ କାଳିକାଦେବୀ ସାହିର ବାସିନ୍ଦା । ଜ୍ୟୋତି ପୁରୀ ଆସିଥିବାବେଳେ ପ୍ରିୟଙ୍କାଙ୍କ ସହ ତାଙ୍କ ଫଟୋ ଭାଇରାଲ ହୋଇଛି । ତେଣୁ ଜ୍ୟୋତିଙ୍କ ସହ ତାଙ୍କ ସମ୍ପର୍କ କ’ଣ ସେ ନେଇ ପୁରୀ ପୁଲିସ ଖୋଳତାଡ଼ ଆରମ୍ଭ କରିଛି । ଦୁଇଦିନ ହେଲା ପ୍ରିୟଙ୍କା ଓ ପରିବାରକୁ ପୁଲିସ ପଚରାଉଚରା କରୁଛି । ପୁରୀ ଏସପି ବିନୀତ ଅଗ୍ରୱାଲ କହିଛନ୍ତି, ଘଟଣାର ତଦନ୍ତ କରାଯାଉଛି । ଜ୍ୟୋତିଙ୍କୁ ଜେରା କରାଯାଉଛି । ରାଜ୍ୟ ଏବଂ କେନ୍ଦ୍ର ଗୁଇନ୍ଦା ବିଭାଗ ସହ ଆମେ ଯୋଗାଯୋଗରେ ଅଛୁ । ତଦନ୍ତ ପରେ ସବୁ କଥା ସାମ୍ନାକୁ ଆସିବ ।

ପାକିସ୍ତାନ ଗୁପ୍ତଚର ଜ୍ୟୋତିଙ୍କ ସହ ପ୍ରିୟଙ୍କାଙ୍କ କେବଳ ସମ୍ପର୍କ ନଥିଲା । ପ୍ରିୟଙ୍କା ବି ପାକିସ୍ତାନ ଯାଇ ଅନେକ ଭିଡିଓ ସୋସିଆଲ୍ ମିଡିଆରେ ସେୟାର୍ କରିଛନ୍ତି । ତେଣୁ ଏହା ତଦନ୍ତକାରୀ ସଂସ୍ଥାର ସନ୍ଦେହକୁ ଅଧିକ ଘନୀଭୂତ କରିଛି । ବିବାଦକୁ ଆସିବା ପରେ ପ୍ରିୟଙ୍କା ଇନଷ୍ଟାଗ୍ରାମରେ ସ୍ପଷ୍ଟୀକରଣ ରଖିଛନ୍ତି । ପ୍ରିୟଙ୍କା କହିଛନ୍ତି, ୟୁଟ୍ୟୁବ୍ ମାଧ୍ୟମରେ ଜ୍ୟୋତିଙ୍କୁ ଚିହ୍ନିଥିଲି । ସେ ପାକିସ୍ତାନ ଗୁପ୍ତଚର ଭାବେ କାମ କରୁଛନ୍ତି ବୋଲି ଜାଣିଥିଲେ କେବେ ବି ତାଙ୍କ ସହ ଯୋଗାଯୋଗରେ ଆସିନଥାନ୍ତି । ତଦନ୍ତକାରୀ ସଂସ୍ଥାକୁ ପୂରା ସହଯୋଗ କରିବି ବୋଲି କହିଛନ୍ତି ପ୍ରିୟଙ୍କା । ସେପଟେ ପ୍ରିୟଙ୍କାଙ୍କ ବାପା ବି କହିଛନ୍ତି, ତଦନ୍ତରେ ସମ୍ପୂର୍ଣ୍ଣ ସହଯୋଗ କରାଯିବ ।

ଏବେ ପ୍ରିୟଙ୍କାଙ୍କୁ ଘନ ଘନ ଜେରା ଚାଲିଛି । ହରିୟାଣା ପୁଲିସ ସହ ଯୋଗାଯୋଗରେ ଅଛି ପୁରୀ ପୁଲିସ । ଆବଶ୍ୟକ ହେଲେ ସାଇବର ବିଶେଷଜ୍ଞଙ୍କ ସହାୟତା ନିଆଯିବ । ଏପରିକି ଏନଆଇଏ ଆସି ଛାନଭିନ୍ କରିପାରେ । ପୁଲିସ ସ୍କାନରରେ ଅଛନ୍ତି ପ୍ରିୟଙ୍କା । ହେଲେ ପ୍ରଶ୍ନ ଉଠୁଛି...

କାହିଁକି ପାକିସ୍ତାନ ଯାଇଥିଲେ ପ୍ରିୟଙ୍କା?
କାହା ଲିଙ୍କରେ ସେ ପାକିସ୍ତାନ ଯାଇଥିଲେ?
ପାକିସ୍ତାନରେ କାହାକୁ ଭେଟିଛନ୍ତି ପ୍ରିୟଙ୍କା?
ପୁରୀରେ ପ୍ରିୟଙ୍କାକୁ କାହିଁକି ଭେଟିଥିଲେ ଜ୍ୟୋତି?
ପାକିସ୍ତାନ ପାଇଁ କିଛି ବଡ଼ ଯୋଜନା ଥିଲା କି?
ପ୍ରିୟଙ୍କାଙ୍କ ପାଇଁ କିଭଳି ସହଜ ହୋଇଥିଲା ପାକିସ୍ତାନ ଯାତ୍ରା?
ତଦନ୍ତ ପାଇଁ ଓଡ଼ିଶା ଆସିବ କି ଏନଆଇଏ?