ଜେଲ୍‌ରେ ବିତୁଛି ଯୌବନ : ଦିଲ୍ଲୀ କାରାଗାରରେ ଅଧାରୁ ଅଧିକ କଏଦୀଙ୍କ ବୟସ ୩୦ ବର୍ଷରୁ କମ୍

କନକ ବ୍ୟୁରୋ : ଜାତୀୟ ରାଜଧାନୀ ଦିଲ୍ଲୀର ଜେଲ୍‌ରେ ବନ୍ଦୀ ଥିବା କଏଦୀଙ୍କ ସଂଖ୍ୟା ସମ୍ପର୍କରେ ଏକ ଆଶ୍ଚର୍ଯ୍ୟଜନକ ପରିସଂଖ୍ୟାନ ସାମ୍ନାକୁ ଆସିଛି । ଯେଉଁ ବୟସରେ ଯୁବବର୍ଗମାନେ ଉଚ୍ଚଶିକ୍ଷା ହାସଲ କରିବା ଓ ନିଜ କ୍ୟାରିୟର ଉପରେ ଧ୍ୟାନ ଦେବା ଉଚିତ, ସେହି ବୟସରେ ହଜାର ହଜାର ଯୁବବର୍ଗ ଦିଲ୍ଲୀର ଜେଲ୍‌ରେ ସଜା କାଟୁଛନ୍ତି । ଯୁବ ବୟସରେ ଅପରାଧ କରିବାର ବିଭିନ୍ନ କାରଣ ଦର୍ଶାଯାଇଛି । ରାଜଧାନୀର ୧୬ଟି ଜେଲରେ ବନ୍ଦୀ ଥିବା ୧୮,୯୬୯ ଜଣଙ୍କ ମଧ୍ୟରୁ ୯,୪୩୪ ଜଣ, ଅର୍ଥାତ୍ ପ୍ରାୟ ୫୦% କଏଦୀଙ୍କ ବୟସ ୨୧ ରୁ ୩୦ ବର୍ଷ ମଧ୍ୟରେ। ଏହା ବୟସ ଗୋଷ୍ଠୀ ଅନୁସାରେ ସର୍ବାଧିକ ସଂଖ୍ୟା ।

ସରକାରୀ ତଥ୍ୟ ଅନୁଯାୟୀ, ପରବର୍ତ୍ତୀ ଗୋଷ୍ଠୀ ହେଉଛି ୩୧ ରୁ ୫୦ ବର୍ଷ ବୟସର ୭,୨୨୨ ଜଣ କଏଦୀ। ସେହିପରି ୧,୧୦୪ ଜଣ କଏଦୀ ୧୮ ରୁ ୨୦ ବର୍ଷ ବୟସ ମଧ୍ୟରେ। ମୋଟ ଉପରେ, କଏଦୀଙ୍କ ସଂଖ୍ୟାର ୫୫% ରୁ ଅଧିକ ୩୦ ବର୍ଷ ବୟସରୁ କମ୍ ଓ ପ୍ରତି ୧୦ ଜଣଙ୍କ ମଧ୍ୟରେ ୭ ଜଣ ୫୦ ବର୍ଷ ବୟସରୁ କମ୍। ଅପରପକ୍ଷରେ ୧୬୭ ଜଣ କଏଦୀ ୬୫ ବର୍ଷ ଏବଂ ତଦୁର୍ଦ୍ଧ୍ୱ ବୟସର ଅଛନ୍ତି । ସହରର ଜେଲ୍‌ରେ ଥିବା ମୋଟ କଏଦୀଙ୍କ ମଧ୍ୟରୁ ୧୮,୨୪୮ ଜଣ, ଅର୍ଥାତ୍ ୯୬% ରୁ ଅଧିକ ଭାରତୀୟ ନାଗରିକ। ବାକି ବିଦେଶୀ କଏଦୀ ଅଛନ୍ତି। ସେମାନଙ୍କ ମଧ୍ୟରୁ ଅନେକଙ୍କ ଉପରେ ଡ୍ରଗ୍ସ ସମ୍ପର୍କିତ ଅପରାଧର ଅଭିଯୋଗ ଅଛି । ଆଶ୍ଚର୍ଯ୍ୟଜନକ ଭାବରେ, ୧୬,୫୧୨ ଜଣ କଏଦୀ , ପ୍ରାୟ ୮୭% କୋର୍ଟ ରାୟ ଅପେକ୍ଷାରେ ଥିବା ବିଚାରାଧୀନ କଏଦୀ । ଅନ୍ୟମାନେ ଦୋଷୀ ସାବ୍ୟସ୍ତ ହୋଇଥିବା କଏଦୀ । ରାଜଧାନୀର ଜେଲ୍‌ରେ ଥିବା କଏଦୀଙ୍କ ମଧ୍ୟରୁ ୯୮% ରୁ ଅଧିକ ପୁରୁଷ। ବର୍ତ୍ତମାନ ଜେଲ୍‌ରେ ଥିବା ୭୪୧ ଜଣ ମହିଳାଙ୍କ ମଧ୍ୟରୁ ୪୫୩ ଜଣ, ଅର୍ଥାତ୍ ୬୧% ରୁ ଅଧିକ ୩୧-୫୦ ବୟସ ବର୍ଗର। ମହିଳା କଏଦୀଙ୍କ ମଧ୍ୟରେ ସର୍ବାଧିକ ୩୦ ବର୍ଷରୁ ଅଧିକ ବୟସର ଅଛନ୍ତି ।

ଅଧିକ ପଢ଼ନ୍ତୁ--ଦୁଇ ଜୈଶ ଆତଙ୍କବାଦୀ ନିହତ: ସର୍ଚ୍ଚ ଅପରେସନ ସମୟରେ ଏନକାଉଣ୍ଟର

ଦିଲ୍ଲୀ ସରକାରଙ୍କ ଜଣେ ପୂର୍ବତନ ଆଇନ ସଚିବ କହିଛନ୍ତି, ବେକାରୀ, ଦାରିଦ୍ର୍ୟ ଓ ସ୍ଥିର ଆୟର ଅଭାବ ଯୁବବର୍ଗମାନଙ୍କୁ ଅପରାଧ ଆଡ଼କୁ ଠେଲି ଦେଉଛି। ଦିଲ୍ଲୀ ଜେଲ୍‌ରେ ଥିବା ଅନେକ କଏଦୀ ଶୀଘ୍ର ଟଙ୍କା ରୋଜଗାର ଲୋଭରେ ଅପରାଧ ଆଡକୁ ମୁହାଁଇ ଜେଲ୍‌ରେ ଥିବା ଜଣାପଡ଼ିଛି। ସେମାନଙ୍କ ମଧ୍ୟରୁ ଅଧିକାଂଶ ଆର୍ଥିକ ଦୃଷ୍ଟିରୁ ଦୁର୍ବଳ ପରିବାରରୁ ଆସିଛନ୍ତି ।