କନକ ବ୍ୟୁରୋ: ବର୍ଷ ପରେ ବର୍ଷ ବିତୁଛି । ଲାଗୁ ହୋଇପାରୁନି ପ୍ରଭୁ ଲିଙ୍ଗରାଜଙ୍କ ସ୍ବତନ୍ତ୍ର ଆଇନ । ଶାସକ ବିରୋଧୀ କଥା କଟାକଟି ଭିତରେ ବଳି ପଡ଼ୁଛି ଲିଙ୍ଗରାଜଙ୍କ ସ୍ବାର୍ଥ। ନୀତିକାନ୍ତିରେ ତ୍ରୁଟି । ପରିଚାଳନାରେ ସମସ୍ୟା । ଦିନ ଦିନ ଧରି ଉପାସ ରହୁଛନ୍ତି ଦିଅଁ । ଅନ୍ୟପଟେ ମନ୍ଦିର ସୁରକ୍ଷା ଓ ରକ୍ଷଣାବେକ୍ଷଣ ହେଉନଥିବାରୁ ଦୁର୍ବଳ ହେଉଛି ମନ୍ଦିର । 

ଶ୍ରୀମନ୍ଦିର ଭଳି ଶ୍ରୀଲିଙ୍ଗରାଜ ଆଇନ ପ୍ରଣୟନ ପାଇଁ ୨୦୨୦ ଡିସେମ୍ବର ୨ରେ ତତ୍‌କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଘୋଷଣା କରିଥିଲେ । ୨୦୨୧ ନଭେମ୍ବର ୨୪ରେ ଏହି ପ୍ରସ୍ତାବକୁ ରାଜ୍ୟ କ୍ୟାବିନେଟ୍‌ର ଅନୁମୋଦନ ମିଳିଥିଲା । ଲିଙ୍ଗରାଜ ସ୍ୱତନ୍ତ୍ର ଆଇନ ଅଧ୍ୟାଦେଶ ଜାରି କରିବାକୁ, ଆଇନ ବିଭାଗ ତତ୍‌କାଳୀନ ରାଜ୍ୟପାଳଙ୍କ ଦସ୍ତଖତ ପାଇଁ ପଠାଇଥିଲା । କିନ୍ତୁ ରାଜ୍ୟପାଳ ଉକ୍ତ ଅଧ୍ୟାଦେଶ ସମ୍ପର୍କରେ କେନ୍ଦ୍ର ସରକାରଙ୍କ ପରାମର୍ଶ ମାଗିଥିଲେ । ଏହାପରେ ରାଜନୈତିକ ପଶାପାଲିରେ ଛନ୍ଦି ହୋଇଯାଇଛି ଆଇନ ।

୨୦୨୪ ସାଧାରଣ ନିର୍ବାଚନରେ ଏ ପ୍ରସଙ୍ଗ ରାଜ୍ୟ ରାଜନୀତିରେ ଚର୍ଚ୍ଚାର ବିଷୟ ପାଲଟିଥିଲା । କେନ୍ଦ୍ରରେ ବିଜେପି ସରକାର ଲିଙ୍ଗରାଜଙ୍କ ଆଇନକୁ କରାଇ ଦେଉନଥିବା ବିଜେଡି ଅଭିଯୋଗ ଆଣିଥିଲା । ଜବାବରେ ବିଜେପି କହିଥିଲା କେନ୍ଦ୍ର ପ୍ରଶ୍ନର ଉତ୍ତର ରାଜ୍ୟ ଦେଉନାହିଁ । ଏବେ ଉଭୟ କେନ୍ଦ୍ର ଓ ରାଜ୍ୟରେ ବିଜେପି ସରକାର । ଏଠି ପ୍ରଶ୍ନ ଉଠୁଛି, ରାଜ୍ୟରେ ଡବଲ୍‌ ଇଞ୍ଜିନ୍‌ ସରକାରକୁ ଗୋଟିଏ ବର୍ଷ ପୂରଣ ହେଲା । କାହିଁକି ଲାଗୁ ହୋଇପାରୁନି ଲିଙ୍ଗରାଜ ଆଇନ ? କେଉଁଠି ରହିଛି କେଁ ? ନାହିଁ ନାହିଁରେ ଚାଲିଛି ମନ୍ଦିର । ସ୍ଥାୟୀ ପ୍ରାଶାସନିକ ଅଧିକାରୀ ନାହାନ୍ତି, ଆବଶ୍ୟକ ଲୋକବଳ ନାହିଁ, ମନ୍ଦିର ସୁରକ୍ଷାକୁ ଗୁରୁତ୍ବ ଦିଆଯାଉନି। ବିଳମ୍ୱିତ ହେଉଛି ନୀତିକାନ୍ତି।  ଫଳରେ ହତାଦର ହେଉଛନ୍ତି ପ୍ରଭୁ ଲିଙ୍ଗରାଜ।