କେବଳ କମାଣ୍ଡ , ହାତ ନ ଲଗାଇ ଚଲାଇଲେ କମ୍ପ୍ୟୁଟର୍

କନକ ବ୍ୟୁରୋ : କଳ୍ପନା କରନ୍ତୁ ପାଟି ଖୋଲି କହିପାରୁନଥିବା ପିଲାଟି ଯେତେବେଳେ ଅଚାନକ ସୁନ୍ଦର ଗୀତ ଗାଇ ଉଠିବ ବା ଭଲରେ ଚାଲିପାରୁନଥିବା ମଣିଷଟି ଯେତେବେଳେ ନାଚିବାକୁ ଲାଗିବ ସେତେବେଳେ ତାହାକୁ ଚମତ୍କାର କହିବାନି ତ ଆଉ କ’ଣ କହିବା । ବିଜ୍ଞାନ ଏବଂ ବିରଳର ଯେତେବେଳେ ଯୁଗଳବନ୍ଦି ହୁଏ ବିଚିତ୍ର ଶବ୍ଦର ଉତଥାନ ସେତେବେଳେ ହୁଏ । ଆଉ ଏମିତି ଏକ ବିଚିତ୍ର ଘଟଣା ଘଟିଛି ଅଡ୍ରେ କ୍ରୁସଙ୍କ କ୍ଷେତ୍ରରେ । ଅଡ୍ରେ ୨ ଦଶନ୍ଧି ଧରି ପକ୍ଷାଘାତରେ ପୀଡ଼ିତ । କିନ୍ତୁ ଆଶ୍ଚର୍ଯ୍ୟକର କଥା ହେଉଛି Neuralink ବ୍ରେନ୍ ଇମ୍ପ୍ଲାଣ୍ଟ ମାଧ୍ୟମରେ ନିଜ ଚିନ୍ତାଧାରା ବ୍ୟବହାର କରି କମ୍ପ୍ୟୁଟରକୁ ନିୟନ୍ତ୍ରଣ କରିବାରେ ସେ ବିଶ୍ୱର ପ୍ରଥମ ମହିଳା ହୋଇପାରିଛନ୍ତି । ବିନା ହାତର ପ୍ରୟୋଗରେ କେବଳ ମସ୍ତିଷ୍କକୁ କମାଣ୍ଡ୍ ଦେଇ ସେ ଡିଜିଟାଲ୍ ଭାବରେ ନିଜ ନାମ - ଅଡ୍ରେ – ଲେଖିଛନ୍ତି । ତାଙ୍କ ଏକ୍ସ ଆକାଉଣ୍ଟରେ @NeuraNova9 ମାଧ୍ୟମରେ ସେୟାର କରାଯାଇଥିବା ଅପଡେଟ୍, ବ୍ରେନ୍-କମ୍ପ୍ୟୁଟର୍ ଇଣ୍ଟରଫେସ୍ (BCI) ଟେକ୍ନୋଲୋଜିରେ ଏକ ନୂଆ ଅଧ୍ୟାୟ ସୃଷ୍ଟି କରିଛି ।

Advertisment

ତାଙ୍କର ଏକ ସଦ୍ୟତମ ପୋଷ୍ଟରେ, ଅଡ୍ରେ ନିଜ ଲାପଟପ୍ ସ୍କ୍ରିନର ଏକ ଫଟୋ ସେୟାର କରିଛନ୍ତି ଯେଉଁଥିରେ ଡିଜିଟାଲ୍ ଇଙ୍କରେ "ଅଡ୍ରେ" ନାମ ହାତରେ ଲେଖାଯାଇଛି । ଏହା ସହିତ ଏକ ଲାଲ୍ ରଙ୍ଗର ହାର୍ଟ ଏବଂ ମୁହଁ, ଗୋଟିଏ ପକ୍ଷୀ ଏବଂ ପିଜ୍ଜାର ଏକ ସ୍ଲାଇସ୍ ସହିତ ରଙ୍ଗୀନ ଡୁଡଲ୍ସ ମଧ୍ୟ ଟେଲିପାଥିକାଲି ଡ୍ର କରାଯାଇଛି । ସେ ଏହାକୁ କ୍ୟାପସନ୍ ଦେଇ ଲେଖିଛନ୍ତି “ଏଠାରେ ମୋର ଆଉ କିଛି ଡୁଡଲ୍ସ ଅଛି ! ମୁଁ ଅନୁରୋଧ କରୁଛି Lol । ଭାବନ୍ତୁ ଆପଣଙ୍କ ପଏଣ୍ଟର୍ ଆଙ୍ଗୁଠିଟି ହେଉଛି ବାମ କ୍ଲିକ୍ ଏବଂ କର୍ସର୍ ମୁଭମେଣ୍ଟ୍ ଆପଣଙ୍କ ହାତରେ ହେଉଛି - ଶାରୀରିକ ଭାବରେ ନୁହେଁ କେବଳ ଟେଲିପାଥି ବ୍ୟବହାର କରି ଏଭଳି କାମ କରୁଛି ।" ଏହି ପୋଷ୍ଟଟି ଭାଇରାଲ୍ ହେବା ପରେ ଘଟଣା ଉପରୁ ଏବେ ପରଦା ହଟିଛି । ଯେଉଁଠାରେ ସେ ୨୦ ବର୍ଷ ମଧ୍ୟରେ ପ୍ରଥମ ଥର ପାଇଁ ନିଜ ନାମ ଲେଖିଥିଲେ । Neuralinkର ସହ-ପ୍ରତିଷ୍ଠାତା ଏଲନ୍ ମସ୍କ ଅଡ୍ରେଙ୍କର ସଫଳତା ଉପରେ ପ୍ରତିକ୍ରିୟା ଦେଇ କହିଛନ୍ତି, “ବାଃ ଚମତ୍କାର , ଅଡ୍ରେ କେବଳ ଚିନ୍ତା କରି ନିଜ କମ୍ପ୍ୟୁଟରକୁ ନିୟନ୍ତ୍ରଣ କରୁଛନ୍ତି । ଅଧିକାଂଶ ଲୋକ ଏହା ସମ୍ଭବ ବୋଲି ହୃଦୟଙ୍ଗମ କରନ୍ତି ନାହିଁ । କିନ୍ତୁ ସେ କରି ଦେଖାଇଛନ୍ତି ।"

ଅଡ୍ରେ Neuralinkର PRIME କ୍ଲିନିକାଲ୍ ଟ୍ରାଏଲରେ ରୋଗୀ ୯ ଭାବରେ ଜଣାଶୁଣା, ତାଙ୍କ ମୁଣ୍ଡରେ ଗତ ସପ୍ତାହରେ ମିଆମି ହେଲଥ୍ ସେଣ୍ଟର ବିଶ୍ୱବିଦ୍ୟାଳୟରେ ଚିପ୍ ଇମ୍ପ୍ଲାଣ୍ଟ କରାଯାଇଥିଲା । ସେ ଲେଖିଛନ୍ତି, “ମୋ ମୁଣ୍ଡ ଖପୁରୀରେ ଏକ ଛିଦ୍ର କରି ମୋଟର କର୍ଟେକ୍ସରେ ୧୨୮ ଟି ଥ୍ରେଡ୍ ରଖାଯାଇଛି ।’’BCI ତାଙ୍କ ମସ୍ତିଷ୍କର ଗତି କେନ୍ଦ୍ରରୁ ସିଗନାଲ୍ ପଢ଼େ ଏବଂ ସେଗୁଡ଼ିକୁ କର୍ସର୍ ମୁଭମେଣ୍ଟରେ ଅନୁବାଦ କରେ । ଅଡ୍ରେ ବୁଝାଇଛନ୍ତି ଯେ ଇମ୍ପ୍ଲାଣ୍ଟ ତାଙ୍କୁ ପୁନର୍ବାର ଚାଲିବାରେ ସାହାଯ୍ୟ କରିବ ନାହିଁ କିନ୍ତୁ ଏହା ତାଙ୍କୁ ଡିଜିଟାଲ୍ ଉପକରଣଗୁଡ଼ିକ ସହିତ ରିଅଲ୍ ଟାଇମରେ କେବଳ ମାନସିକ ପ୍ରଚେଷ୍ଟା ମାଧ୍ୟମରେ ଯୋଗାଯୋଗ କରିବାକୁ ସକ୍ଷମ କରିବ ।

Neuralink କ’ଣ ?

୨୦୧୬ ରେ ଏଲନ୍ ମସ୍କଙ୍କ ଦ୍ୱାରା ପ୍ରତିଷ୍ଠିତ Neuralink ର ଲକ୍ଷ୍ୟ ହେଉଛି ମାନବ ମସ୍ତିଷ୍କକୁ ସିଧାସଳଖ କମ୍ପ୍ୟୁଟର ସହିତ ସଂଯୋଗ କରିବା । ଦୀର୍ଘମିଆଦୀ ଲକ୍ଷ୍ୟ ହେଉଛି ପକ୍ଷାଘାତ ଭଳି ସ୍ନାୟୁ ସମ୍ବନ୍ଧୀୟ ଅବସ୍ଥା ଥିବା ଲୋକଙ୍କୁ ଡିଜିଟାଲ୍ ସ୍ୱାଧୀନତା ପୁନଃପ୍ରାପ୍ତ କରିବାରେ ସାହାଯ୍ୟ କରିବା ଏବଂ ସମ୍ଭାବ୍ୟ ଭାବରେ ପ୍ରୋସ୍ଥେଟିକ୍ସକୁ ନିୟନ୍ତ୍ରଣ କରିବା କିମ୍ବା କଥା ନହୋଇ ଯୋଗାଯୋଗ କରିବା । ଅଡ୍ରେ ତାଙ୍କର ଅଗ୍ରଗତି ଅନୁସାରେ ଅପଡେଟ୍ ଏବଂ ଭିଡିଓ ସେୟାର କରିବାକୁ ଯୋଜନା କରିଛନ୍ତି । ସେ ଉଲ୍ଲେଖ କରିଛନ୍ତି ଯେ “ମୁଁ ଶୀଘ୍ର ଘରକୁ ଫେରିବି ଏବଂ ଆମେ ପ୍ରକ୍ରିୟାକୁ ଅଧିକ ବିବରଣୀରେ ବୁଝାଇବା ପାଇଁ ଅଧିକ ଭିଡିଓ ପୋଷ୍ଟ କରିବୁ।” ନ୍ୟୁରାଲିଙ୍କର ଟେକ୍ନୋଲୋଜି ବ୍ୟବହାର କରିବାରେ ପ୍ରଥମ ମହିଳା ଭାବରେ ତାଙ୍କର ଯାତ୍ରା ଏବେ ଆରମ୍ଭ ହୋଇଛି ।