‘୨୦୨୭ ବିଶ୍ୱକପ ଜିତିବା ମୋ ସ୍ୱପ୍ନ’: ନୀରବତା ଭାଙ୍ଗିଲେ ଜାଡେଜା

କନକ ବ୍ୟୁରୋ: ଭାରତୀୟ କ୍ରିକେଟ୍ ଦଳ ଅକ୍ଟୋବର ୧୯ ତାରିଖରୁ ଆରମ୍ଭ ହେଉଥିବା ଅଷ୍ଟ୍ରେଲିଆ ଗସ୍ତରେ ତିନୋଟି ଦିନିକିଆ ଏବଂ ପାଞ୍ଚଟି ଟି୨୦ ଅନ୍ତର୍ଜାତୀୟ ଖେଳିବ । ଏହି ଗସ୍ତ ପାଇଁ ଭାରତର ଏକଦିବସୀୟ ଦଳରେ ସମ୍ପୂର୍ଣ୍ଣ ଭିନ୍ନ ଏକ ଦଳ ରହିବ । ରୋହିତ ଶର୍ମାଙ୍କ ସ୍ଥାନରେ ଶୁବମନ ଗିଲଙ୍କୁ ନୂତନ ଏକଦିବସୀୟ ଅଧିନାୟକ ନିଯୁକ୍ତ କରାଯାଇଛି । ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ, ଚୟନକର୍ତ୍ତାମାନେ ୨୦୨୫ ଆଇସିସି ଚାମ୍ପିଅନ୍ସ ଟ୍ରଫିରେ ଭାରତୀୟ ଦଳର ଅଂଶ ଥିବା ବାମହାତୀ ଅଲରାଉଣ୍ଡର ରବିନ୍ଦ୍ର ଜାଡେଜାଙ୍କୁ ଏକଦିବସୀୟ ଦଳରୁ ବାଦ ଦେଇଛନ୍ତି ।

ରୋହିତ ଶର୍ମା ଏବଂ ବିରାଟ କୋହଲିଙ୍କୁ ଦିନିକିଆ ଦଳରେ ସାମିଲ କରାଯାଇଛି, କିନ୍ତୁ ରବିନ୍ଦ୍ର ଜାଡେଜାଙ୍କ ପରି ଅଭିଜ୍ଞ ଅଲରାଉଣ୍ଡରଙ୍କ ଅନୁପସ୍ଥିତି ଆଶ୍ଚର୍ଯ୍ୟଜନକ । ଜାଡେଜା ଫେବୃଆରୀ ୨୦୦୯ଠାରୁ ଭାରତ ପାଇଁ ଦିନିକିଆ କ୍ରିକେଟ୍ ଖେଳୁଛନ୍ତି ଏବଂ ବର୍ତ୍ତମାନ ଯୁଗର ଶ୍ରେଷ୍ଠ ଅଲରାଉଣ୍ଡରଙ୍କ ମଧ୍ୟରୁ ଜଣେ ବୋଲି ବିବେଚନା କରାଯାଏ । ରବିନ୍ଦ୍ର ଜାଡେଜା ଦିନିକିଆ ଦଳରୁ ବାଦ୍ ପଡ଼ିବା ନେଇ ତାଙ୍କର ପ୍ରଥମ ପ୍ରତିକ୍ରିୟା ଦେଇଛନ୍ତି । ଜାଡେଜା ସ୍ପଷ୍ଟ ଭାବରେ କହିଛନ୍ତି ଯେ ତାଙ୍କର ଲକ୍ଷ୍ୟ ୨୦୨୭ ବିଶ୍ୱକପ୍ ଖେଳିବା ଏବଂ ସେ କଠିନ ପରିଶ୍ରମ ଜାରି ରଖିଛନ୍ତି । 

ସାମ୍ବାଦିକ ସମ୍ମିଳନୀରେ ରବିନ୍ଦ୍ର ଜାଡେଜା କହିଥିଲେ, "ମୁଁ ନିଶ୍ଚିତ ଭାବରେ ବିଶ୍ୱକପ ଖେଳିବାକୁ ଚାହୁଛି । ପ୍ରତ୍ୟେକ ଖେଳାଳି ବିଶ୍ୱକପ୍ ଜିତିବାର ସ୍ୱପ୍ନ ଦେଖନ୍ତି । ଆମେ ୨୦୨୩ ରେ ବହୁତ ନିକଟତର ଥିଲୁ, କିନ୍ତୁ ବିଫଳ ହୋଇଗଲୁ । ଟିମ୍ ମ୍ୟାନେଜମେଣ୍ଟ ମୋତେ ପୂର୍ବରୁ ଜଣାଇ ଦେଇଥିଲା ଯେ ମୋତେ ଏହି ସିରିଜ୍ ପାଇଁ ଚୟନ କରାଯାଉନାହିଁ । ଅଧିନାୟକ ଶୁବମନ ଗିଲ୍, ପ୍ରଶିକ୍ଷକ ଏବଂ ଚୟନକର୍ତ୍ତାମାନେ ମୋ ସହିତ କଥା ହୋଇଥିଲେ ଏବଂ କାରଣ ବୁଝାଇଥିଲେ । ଦଳ ଘୋଷଣା ପୂର୍ବରୁ ମୁଁ ଏହା ଜାଣିଥିଲି ।"

ରବିନ୍ଦ୍ର ଜାଡେଜା ଆହୁରି କହିଛନ୍ତି, "ଯେତେବେଳେ ମୋତେ ସୁଯୋଗ ମିଳିବ, ମୁଁ ମୋର ସର୍ବୋତ୍ତମ ଚେଷ୍ଟା କରିବି । ଏବେ ବି ବହୁତ ଦିନିକିଆ ମ୍ୟାଚ୍ ବାକି ଅଛି । ଆଶା କରୁଛି, ମୁଁ ଏକ ସୁଯୋଗ ପାଇବି ଏବଂ ମୋର ଖେଳ ସହିତ ଦଳକୁ ଅବଦାନ ଦେଇପାରିବି, ଯେପରି ମୁଁ ଆଜି ଯାଏଁ କରି ଆସିଛି ।" ଜାଡେଜା ୱେଷ୍ଟଇଣ୍ଡିଜ୍ ବିପକ୍ଷ ଟେଷ୍ଟ ସିରିଜରେ ଚମତ୍କାର ପ୍ରଦର୍ଶନ କରୁଛନ୍ତି । ଅହମ୍ମଦାବାଦ ଟେଷ୍ଟରେ ଜାଡେଜା ଏକ ଶତକ ହାସଲ କରିଥିଲେ ଏବଂ ତାଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା ।

ଭାରତୀୟ ଦଳର ମୁଖ୍ୟ ଚୟନକର୍ତ୍ତା ଅଜିତ ଅଗରକର ରବିନ୍ଦ୍ର ଜାଡେଜାଙ୍କୁ ବାଦ ଦେବା ବିଷୟରେ କହିଥିଲେ, "ବର୍ତ୍ତମାନ, ଆମେ କେବଳ ଜଣେ ବାମହାତୀ ସ୍ପିନରଙ୍କୁ ସାମିଲ କରିପାରିବା । ଦୁଇ ଜଣ ସ୍ପିନରଙ୍କୁ ଫିଟ୍ କରିବା ସମ୍ଭବ ନଥିଲା । ଜାଡେଜା ଆମର ଯୋଜନାରେ ଅଛନ୍ତି । ସମସ୍ତେ ଜାଣନ୍ତି ଯେ ସେ କେତେ ମହାନ ଖେଳାଳି । କିନ୍ତୁ ଆମେ ଅକ୍ଷର, ୱାଶିଂଟନ ସୁନ୍ଦର ଏବଂ କୁଲଦୀପ ଯାଦବଙ୍କୁ ଚୟନ କରି ଏହି ଛୋଟ ସିରିଜ ପାଇଁ ସନ୍ତୁଳନ ବଜାୟ ରଖିବାକୁ ଚାହୁଥିଲୁ ।"

ଜାଡେଜା ଟିମ୍ ଇଣ୍ଡିଆ ପାଇଁ ୨୦୪ ଦିନିକିଆ ମ୍ୟାଚ ଖେଳିଛନ୍ତି । ଯେଉଁଥିରେ ସେ ୧୩ ଅର୍ଦ୍ଧଶତକ ବଳରେ ୨ ହଜାର ୮୦୬ ରନ କରିଛନ୍ତି । ଆଉ ୨୩୧ ଓ୍ୱିକେଟ ନେଇଛନ୍ତି । କହିବାକୁ ଗଲେ ଦିନିକିଆରେ ଜାଡେଜାଙ୍କ ପ୍ରଦର୍ଶନ ବେଶ ଭଲ ରହିଛି ।