ବିକ୍ରି ହୋଇଯିବ କି ଆରସିବି? ଲଳିତ ମୋଦୀ ଦେଲେ ବଡ଼ ସଙ୍କେତ

କନକ ବ୍ୟୁରୋ: କ’ଣ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିକ୍ରି ହେବାକୁ ଯାଉଛି? ଏବେ ଏହି ପ୍ରଶ୍ନ ଚର୍ଚ୍ଚାରେ ରହିଛି, କାରଣ IPL ଆରମ୍ଭ କରିବାରେ ପ୍ରମୁଖ ଭୂମିକା ଗ୍ରହଣ କରିଥିବା ଲଳିତ ମୋଦୀ ଏକ ଗୁରୁତ୍ୱପୂର୍ଣ୍ଣ ଅପଡେଟ୍ ଦେଇଛନ୍ତି । ସେ ଯେଉଁ ସଙ୍କେତ ଦେଇଛନ୍ତି ତାହା ସୂଚାଇ ଦେଉଛି ଯେ ଏହି IPL 2025 ଚାମ୍ପିଅନ୍ ଦଳ ଏବେ ଜଣେ ନୂତନ ମାଲିକ ଖୋଜୁଛି । ଲଳିତ ମୋଦୀ ତାଙ୍କ ସୋସିଆଲ ମିଡିଆ ହ୍ୟାଣ୍ଡେଲ ମାଧ୍ୟମରେ ଏହି ସୂଚନା ସେୟାର କରିଛନ୍ତି । ଏହା ବ୍ୟତୀତ, ସେ ଏହା ମଧ୍ୟ କହିଛନ୍ତି ଯେ ବର୍ତ୍ତମାନ ଏହି ଫ୍ରାଞ୍ଚାଇଜରେ ନିବେଶ ଏକ ଲାଭଦାୟକ ଚୁକ୍ତି ଏବଂ ନୂତନ ନିବେଶକଙ୍କ ପାଇଁ ଏକ ଭଲ ସୁଯୋଗ ହୋଇପାରେ।

ଲଳିତ ମୋଦି ଇନଷ୍ଟାଗ୍ରାମରେ ଲେଖିଛନ୍ତି ଯେ ପୂର୍ବରୁ କେବଳ RCB ବିକ୍ରୟ ବିଷୟରେ ଗୁଜବ ଥିଲା କିନ୍ତୁ ଏବେ ଦେଖାଯାଉଛି ଯେ ମାଲିକମାନେ ସେମାନଙ୍କ ବାଲାନ୍ସ ସିଟରୁ ଆରସିବିକୁ ହଟାଇ ଏହାକୁ ବିକ୍ରୟ କରିବାକୁ ନିଷ୍ପତ୍ତି ନେଇଛନ୍ତି ।

ସେ ଆହୁରି ଲେଖିଛନ୍ତି, "ମୁଁ ନିଶ୍ଚିତ ଯେ ଏହି ଦଳ ଏକ ଫ୍ରାଞ୍ଚାଇଜ୍ ଭାବରେ ବିକ୍ରୟ ପାଇଁ ସମ୍ପୂର୍ଣ୍ଣ ଉପଲବ୍ଧ ହେବ । ଏକ ପ୍ରମୁଖ ବିଶ୍ୱସ୍ତରୀୟ ପାଣ୍ଠି କିମ୍ବା ସାର୍ବଭୌମ ପାଣ୍ଠି ଏଥିରେ ନିବେଶ କରିପାରିବ । ସେ ଆହୁରି ମଧ୍ୟ କହିଛନ୍ତି, "ଏହାଠାରୁ ଭଲ ନିବେଶ ସୁଯୋଗ ଆଉ କିଛି ହୋଇପାରିବ ନାହିଁ । ଯେଉଁମାନେ ଆରିସିବିକୁ କିଣିବେ, ମୁଁ ସେମାନଙ୍କୁ ଶୁଭକାମନା ଜଣାଉଛି।"

ଲଳିତ ମୋଦି ଆହୁରି କହିଛନ୍ତି ଯେ ଆରିସିବି ଏକ ନୂତନ ମୂଲ୍ୟାଙ୍କନ ରେକର୍ଡ ସ୍ଥାପନ କରିପାରିବ, ଯାହା ଦର୍ଶାଇବ ଯେ ଆଇପିଏଲ କେବଳ ସବୁଠାରୁ ଦ୍ରୁତ ଗତିରେ ବୃଦ୍ଧି ପାଉଥିବା ବିଶ୍ୱସ୍ତରୀୟ କ୍ରୀଡ଼ା ଇଭେଣ୍ଟ ନୁହେଁ, ବରଂ ସବୁଠାରୁ ମୂଲ୍ୟବାନ ମଧ୍ୟ।

ଯଦି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିକ୍ରି ହୁଏ । ତେବେ ଏହା ବିକ୍ରି ହେବାରେ ପ୍ରଥମ ଫ୍ରାଞ୍ଚାଇଜ୍ ହେବ ନାହିଁ । ଗତ ସିଜିନ ପୂର୍ବରୁ ଗୁଜୁରାଟ ଟାଇଟାନ୍ସ ମଧ୍ୟ ଏକ ନୂତନ ମାଲିକ ପାଇଥିଲା, ଯାହାକୁ ଟୋରେଣ୍ଟ ଗ୍ରୁପ୍ ଅଧିଗ୍ରହଣ କରିଥିଲା। ତଥାପି, ଯଦି ଆରସିବି ବିକ୍ରି ପାଇଁ ଯାଏ, ତେବେ କିଏ ଏଥିରେ ସାମିଲ ହେବ ତାହା ଦେଖିବା ଆକର୍ଷଣୀୟ ହେବ । ଆରସିବି କେବଳ ଆଇପିଏଲର ଡିଫେଣ୍ଡିଂ ଚାମ୍ପିଅନ ନୁହେଁ  । ଏହା ଏକ ଫ୍ରାଞ୍ଚାଇଜ୍ ଯେଉଁଥିରେ ଗେଲ୍, ଡିଭିଲିୟର୍ସ ଏବଂ ବିରାଟ କୋହଲିଙ୍କ ଭଳି ବଡ଼ ତାରକା ସାମିଲ ଥିଲେ । ବିରାଟ କୋହଲି ଆରମ୍ଭରୁ ଏହି ଫ୍ରାଞ୍ଚାଇଜ୍ ସହିତ ଜଡିତ ଅଛନ୍ତି । 

ଭାରତରେ ଆରସିବିର ସବୁଠାରୁ ଅଧିକ ଫ୍ୟାନ୍ସ ରହିଛନ୍ତି । ଦୀର୍ଘ ବର୍ଷ ଅପେକ୍ଷା ପରେ 2025ରେ ଆରିସିବି ଆଇପିଏଲ ଚାମ୍ପିୟନ ହୋଇଥିଲା । ଆଉ ଦଳ ବିକ୍ରି ହେବା ଖବର ଯଦି ସତ ହୁଏ ତେବେ ଏହା ଫ୍ୟାନ୍ସଙ୍କ ପାଇଁ ଏକ ବଡ଼ ଝଟକା ହୋଇପାରେ ।