ହରିୟାଣାରେ ହାଟ୍ରିକ ମାରିବ କି ବିଜେପି? ପୁଣିଥରେ ଗଢାହେବ କି ବିଜେପି ସରକାର? ଟ୍ରେଣ୍ଡରେ ବହୁମତ ଆଗରେ ବିଜେପି....

କନକ ବ୍ୟୁରୋ: ହରିୟାଣାରେ ହାଟ୍ରିକ ମାରିବ କି ବିଜେପି? ପୁଣି ରାଜ୍ୟରେ ଗଢାହେବ କି ବିଜେପି ସରକାର? ହରିୟାଣା ନିର୍ବାଚନ ଫଳାଫଳ ନେଇ ଆସୁଥିବା ଟ୍ରେଣ୍ଡରେ ବର୍ତ୍ତମାନ ସୁଦ୍ଧା ବିଜେପି ଆଗୁଆ ରହିଥିବାରୁ, ଏଭଳି କିଛି ଚର୍ଚ୍ଚା ଆରମ୍ଭ ହେଇଛି । ଖାଲି ସେତିକି ନୁହେଁ, ପୂର୍ବର ସବୁ ରେକର୍ଡକୁ କାଟି, ବିଜେପି ଏଥର ହରିୟାଣାରେ ସର୍ବଶ୍ରେଷ୍ଠ ପ୍ରଦର୍ଶନ କରିପାରେ ବୋଲି ମଧ୍ୟ କଥା ଉଠିଲାଣି ।

ବର୍ତ୍ତମାନର ଟ୍ରେଣ୍ଡ ଅନୁସାରେ ହରିୟାଣାର ୯୦ ଆସନରୁ ବିଜେପି ୪୯ ଆସନରେ ଆଗୁଆ ଥିବାବେଳେ, କଂଗ୍ରେସ କେବଳ ୩୫ ଆସନରେ ଆଗୁଆ ଅଛି । ତେଣୁ ଏଠାରେ ଆସୁଥିବା ଟ୍ରେଣ୍ଡ ଯଦି ରେଜଲ୍ଟରେ ବଦଳେ, ତେବେ ପୁଣିଥରେ ବିଜେପି ସେଠାରେ ପୂର୍ଣ୍ଣ ବହୁମତର ସରକାର ଗଢିବ । ଆଉ ରାଜ୍ୟରେ ଲଗାତାର ୩ୟ ଥର ପାଇଁ ସରକାର ଗଢିବ ।

ତେବେ ହରିୟାଣାରେ ଏହା ବିଜେପିର ସର୍ବଶ୍ରେଷ୍ଠ ପ୍ରଦର୍ଶନ ମଧ୍ୟ ହେଇପାରେ । କାହିଁକି ନା ୧୯୮୦ ମସିହାରେ ବିଜେପି ଗଢା ହେବାର ଦୁଇ ବର୍ଷ ପରେ ଦଳ ହରିୟାଣା ନିର୍ବାଚନ ଲଢିଥିଲା । ଆଉ ୧୯୮୨ ବିଧାନସଭା ନିର୍ବାଚନରେ ୬ଟି ସିଟ୍ ଜିତିଥିଲା । ଏହାପରେ ୧୯୮୭ରେ ୧୬ଟି, ୧୯୯୬ରେ ୧୧ଟି, ୨୦୦୦ ମସିହାରେ ଦଳ ୬ଟି ଆସନରେ ଜିତାପଟ ହାସଲ କରିଥିଲା । ତେବେ ୨୦୦୫ ଆଉ ୨୦୦୯ରେ ଦଳ ଖରାପ ପ୍ରଦର୍ଶନ କରିବା ସହ କେବଳ ୨ଟି ଏବଂ ୪ଟି ସିଟ୍ ଜିତିଥିଲା ।

ଏହାପରେ ୨୦୧୪ରେ ହରିୟାଣାରେ କମାଲ କରିଥିଲା ବିଜେପି । ବିଧାନସଭା ନିର୍ବାଚନରେ ଦଳ ୩୩.୩ ପ୍ରତିଶତ ଭୋଟ୍ ହାତେଇବା ସହ ୪୭ ଆସନରେ ବିଜୟ ହାସଲ କରିଥିଲା । ଆଉ ଏହି ସଫଳତାକୁ ୨୦୧୯ରେ ମଧ୍ୟ ଦୋହରାଇଥିଲା । ୨୦୧୯ରେ ଦଳ ୪୦ ସିଟ୍ ଜିତିବା ସହ ଜେଜେପି ସହ ମିଶି ସରକାର ଗଠନ କରିଥିଲା । ତେଣୁ ଏଥର ଯଦି ଦଳ ଟ୍ରେଣ୍ଡ ମୁତାବକ ୪୯ ସିଟରେ ଆଗୁଆ ରହି ବିଜୟ ହାସଲ କରେ, ତେବେ ଏହା ଦଳର ହେବ ସର୍ବଶ୍ରେଷ୍ଠ ପ୍ରଦର୍ଶନ ।