ଶରୀର ପାଇଁ ଯୋଗ କାହିଁକି ଆବଶ୍ୟକ? ବିଶ୍ୱ ଯୋଗ ଦିବସରେ ଜାଣନ୍ତୁ ଯୋଗର ମହତ୍ତ୍ୱ

କନକ ବ୍ୟୁରୋ: ଯୋଗ ଆଧ୍ୟାତ୍ମିକ, ଅନୁଶାସନ, ବିଜ୍ଞାନ । ଯୋଗ ସହ ମନ ମସ୍ତିଷ୍କ ଓ ଶରୀରର ସାମଞ୍ଜସ୍ୟ ଅଛି । ଯୋଗ ଆମ ପ୍ରାଚୀନ ପରମ୍ପରା ଓ ସସ୍କୃତି ସହ ଜଡ଼ିତ । ଏ କଥା କେବଳ ଆମେ କହୁନୁ ସାରା ବିଶ୍ୱ କହୁଛି । ଯୋଗ କଲେ ରୋଗ ଯିବ ଦୂରେଇ, ଅବସାଦ ପାଖ ମାଡ଼ିବନି । ମନ ଶାନ୍ତ ରହିବ, ଶରୀରର ସୁସ୍ଥ ରହିବ । 

ଆଜି ଅନ୍ତର୍ଜାତୀୟ ଯୋଗ ଦିବସ । ସାରା ବିଶ୍ୱରେ ବୟସ୍କଙ୍କଠାରୁ ଆରମ୍ଭ କରି ଯୁବପିଢ଼ିଙ୍କର ଯୋଗ ପ୍ରତି ଆଗ୍ରହ ରହିଛି । ଅନ୍ତର୍ଜାତୀୟ ଯୋଗ ଦିବସ ପାଳନ କରିବାର ମୁଖ୍ୟ ଉଦ୍ଦେଶ୍ୟ ହେଉଛି ଯୋଗର ଉପକାରିତା ବିଷୟରେ ଲୋକଙ୍କୁ ସଚେତନ କରିବା । ଆଜିର ବ୍ୟସ୍ତବହୁଳ ଜୀବନରେ, ଅନେକ ଲୋକ ଶାରୀରିକ ଏବଂ ମାନସିକ ଚାପ ସହିତ ସଂଘର୍ଷ କରୁଛନ୍ତି, ଏପରି ପରିସ୍ଥିତିରେ ଯୋଗ କରିବା ସେମାନଙ୍କ ପାଇଁ ଲାଭଦାୟକ ହୋଇପାରେ । ଏହା ଅନେକ ପ୍ରକାରର ରୋଗକୁ ରୋକିବା, ଶରୀରକୁ ସକ୍ରିୟ ରଖିବା ଏବଂ ଚାପ ହ୍ରାସ କରିବାରେ ସାହାଯ୍ୟ କରିଥାଏ । 

ଆଜିକାଲି, ଆମ ସମସ୍ତଙ୍କ ଜୀବନଶୈଳୀ, ଖାଦ୍ୟପେୟ ଠିକ୍ ନ ଥିବାରୁ, ଆମକୁ ବିଭିନ୍ନ ପ୍ରକାରର ରୋଗର ସମ୍ମୁଖୀନ ହେବାକୁ ପଡ଼େ । ଏଥିମଧ୍ୟରେ, ହୃଦରୋଗ ବିଶେଷ ଭାବରେ ଦେଖାଯାଏ, ଯଦି ଆମେ ଆମର ବ୍ୟସ୍ତବହୁଳ ଜୀବନଶୈଳୀରୁ କିଛି ସମୟ ବାହାର କରି ଯୋଗ କରିବାରେ ବିତାଉ । ତେବେ ଆମେ ନିଜକୁ ବହୁତ ପରିମାଣରେ ସୁସ୍ଥ ରଖିପାରିବା । ଆମେ ପୂର୍ବରୁ ଜାଣୁ ଯେ ଯୋଗ ସ୍ୱାସ୍ଥ୍ୟ ପାଇଁ କେତେ ଲାଭଦାୟକ । କିନ୍ତୁ ଏକ ଅଧ୍ୟୟନ ଅନୁସାରେ, ଯୋଗ ଆମର ସାମଗ୍ରିକ ସ୍ୱାସ୍ଥ୍ୟ ପାଇଁ ମଧ୍ୟ ଲାଭଦାୟକ ହୋଇପାରେ । ଏମିତି କି ଡାକ୍ତରମାନେ ବି ଯୋଗ କରିବାକୁ ପରାମର୍ଶ ଦେଉଛନ୍ତି । 

ଯୋଗର ଅର୍ଥ କେବଳ ଶାରୀରିକ ବ୍ୟାୟାମ ନୁହେଁ ବରଂ ସମଗ୍ର ଶରୀରର ଚିକିତ୍ସା । ଯୋଗ ମାଧ୍ୟମରେ ଶାରୀରିକ ଏବଂ ମାନସିକ ସ୍ୱାସ୍ଥ୍ୟ ହାସଲ କରାଯାଏ । ଆମେ ଯୋଗ ମାଧ୍ୟମରେ ଆମର ଶରୀରକୁ ଆଭ୍ୟନ୍ତରୀଣ ଭାବରେ ମଧ୍ୟ ଶୁଦ୍ଧ କରିପାରିବା । ଜଣେ ବ୍ୟକ୍ତି ଯୋଗ ମାଧ୍ୟମରେ ସମ୍ପୂର୍ଣ୍ଣ ସ୍ୱାସ୍ଥ୍ୟ ପ୍ରାପ୍ତ ଲାଭ କରିପାରେ । ଯୋଗ କେବଳ ଆଜିଠାରୁ ନୁହେଁ ବରଂ ବିଶ୍ୱ ସୃଷ୍ଟି ହେବା ଦିନଠାରୁ ରହିଛି, କିନ୍ତୁ ଏହି ଜ୍ଞାନକୁ ଋଷି ଏବଂ ସନ୍ଥମାନେ ଗୁପ୍ତ ରଖିଥିଲେ । ଆମେ ସମସ୍ତେ ଜାଣୁ ଯେ, ପୂର୍ବ କାଳରେ, ଋଷି ଏବଂ ସନ୍ଥମାନେ ବହୁ ବର୍ଷ ଧରି ବଞ୍ଚିଥିଲେ, ଆଉ ଏହା ଥିଲା ଯୋଗ ଜ୍ଞାନର ପ୍ରଭାବ । 

ଭାରତରେ ଅନ୍ତର୍ଜାତୀୟ ଯୋଗ ଦିବସକୁ ବଡ଼ ଆକାରରେ ପାଳନ କରାଯାଏ, ଯେଉଁଥିରେ ପ୍ରଧାନମନ୍ତ୍ରୀ ନିଜେ ଅଂଶଗ୍ରହଣ କରନ୍ତି । ପ୍ରତିବର୍ଷ ଏହି ଦିନରେ ସ୍କୁଲ, କଲେଜ, କାର୍ଯ୍ୟାଳୟ, ପାର୍କ ଏବଂ ସାମୁଦାୟିକ ସ୍ଥାନରେ ଯୋଗ ଶିବିର, କର୍ମଶାଳା ଏବଂ କାର୍ଯ୍ୟକ୍ରମ ଆୟୋଜନ କରାଯାଏ । ଲକ୍ଷ ଲକ୍ଷ ଲୋକ ଏକାଠି ହୋଇ ଯୋଗ କରନ୍ତି । 

୨୭ ସେପ୍ଟେମ୍ବର ୨୦୧୪ରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜାତିସଂଘ ସାଧାରଣ ସଭାରେ ତାଙ୍କ ଭାଷଣରେ ଅନ୍ତର୍ଜାତୀୟ ଯୋଗ ଦିବସ ପାଳନ କରିବାକୁ ପରାମର୍ଶ ଦେଇଥିଲେ । ତାଙ୍କ ପଦକ୍ଷେପକୁ ୧୭୭ଟି ଦେଶର ସମର୍ଥନ ମିଳିଥିଲା । ୧୧ ଡିସେମ୍ବର ୨୦୧୪ରେ, ମିଳିତ ଜାତିସଂଘ ପ୍ରତିବର୍ଷ ୨୧ ଜୁନକୁ ଅନ୍ତର୍ଜାତୀୟ ଯୋଗ ଦିବସ ଭାବରେ ପାଳନ କରିବାକୁ ଘୋଷଣା କରିଥିଲା । ଏହା ପରେ, ପ୍ରଥମ ଥର ପାଇଁ ୨୦୧୫ ଜୁନ୍ ୨୧ ତାରିଖରେ ଅନ୍ତର୍ଜାତୀୟ ଯୋଗ ଦିବସ ପାଳନ କରାଯାଇଥିଲା । 

ତେବେ ଆପଣଙ୍କ ମନରେ ନିଶ୍ଚୟ ପ୍ରଶ୍ନ ଆସୁଥିବ ଏଥିପାଇଁ ୨୧ ଜୁନ୍ ତାରିଖ କାହିଁକି ବଛାଗଲା? ପଛରେ କାରଣ ହେଉଛି ଯେ ୨୧ ଜୁନ୍ ବର୍ଷର ସବୁଠାରୁ ଲମ୍ବା ଦିନ । ଏହି ଦିନ ସୂର୍ଯ୍ୟକିରଣ ପୃଥିବୀ ଉପରେ ଦୀର୍ଘ ସମୟ ପର୍ଯ୍ୟନ୍ତ ରହିଥାଏ । ଯୋଗ ପରମ୍ପରା ଅନୁସାରେ, ଏହା ବିଶ୍ୱାସ କରାଯାଏ ଯେ ଭଗବାନ ଶିବ, ଯାହାଙ୍କୁ ଆଦିଯୋଗୀ ବୋଲି କୁହାଯାଏ, ଏହି ଦିନଠାରୁ ତାଙ୍କ ଶିଷ୍ୟମାନଙ୍କୁ ଯୋଗର ଜ୍ଞାନ ପ୍ରଦାନ କରିବା ଆରମ୍ଭ କରିଥିଲେ । ତେବେ ଆସନ୍ତୁ ଏକାଠି ହେବା ଯୋଗ କରିବା, ଯୋଗ ଶିଖାଇବା । ରୋଗ ଅବସାଦରରୁ ଶରୀର ଓ ମନକୁ ସୁସ୍ଥ ରଖିବା ।