କନକ ବ୍ୟୁରୋ: ସ୍କିମାଟିକ ଶିକ୍ଷକଙ୍କୁ ଧକ୍କା । ୫ ଦିନ ମଧ୍ୟରେ ନିଷ୍ପତ୍ତି ପ୍ରତ୍ୟାହାର କରିଛି ଗଣଶିକ୍ଷା ବିଭାଗ । ଫଳରେ ୧୬ ହଜାର ଶିକ୍ଷକ ନିରାଶ ହେଇଛନ୍ତି । ହଠାତ କାହିଁକି ନିଷ୍ପତ୍ତି ବଦଳିଲା ତାହା ଚର୍ଚ୍ଚାର ବିଷୟ ହୋଇଛି । ରାଜ୍ୟର ବିଭିନ୍ନ ସ୍ଥାନରେ ଶିକ୍ଷକ ଅଭାବ ଓ ବଦଳିକୁ ଛାତ୍ରଛାତ୍ରୀ ବିରୋଧ କରୁଛନ୍ତି । ତୁରନ୍ତ ଶିକ୍ଷକ ପଦବୀ ପୂରଣ ସହ ବଦଳି ବାତିଲ ପାଇଁ ଦାବି ହେଉଛି। ଏତିକିବେଳେ ଗଣଶିକ୍ଷା ବିଭାଗର ଚିଠି ଅସନ୍ତୋଷକୁ ବଢ଼ାଇ ଦେଇଛି। 

Advertisment

୨ ତାରିଖରେ ଗଣଶିକ୍ଷା ବିଭାଗର ଚିଠିରେ ୪୪ ହାଜରରୁ  ଅଧିକ ଶିକ୍ଷକ ନିଯୁକ୍ତି ସାଙ୍ଗକୁ  ସମସ୍ତ ବର୍ଗର ଶିକ୍ଷକମାନଙ୍କ ନିୟମିତ ନିଯୁକ୍ତି ଓ ଗ୍ରେଡ ପ ବୃଦ୍ଧି ପାଇଁ  ପ୍ରସ୍ତାବ ରହିଥିଲା ।  ନିଷ୍ପତ୍ତି  ଆଇନ ବିଭାଗ , ଅର୍ଥ ବିଭାଗ ଓ ଗଣଶିକ୍ଷା ବିଭାଗର ମୋହର ବାଜି ଅନୁମୋଦିତ ହୋଇଥିଲା । ଏବେ ୫ ଦିନ ମଧ୍ୟରେ ପ୍ରତ୍ୟାହାର ହୋଇଛି  ସୁପାରିଶ । କାରଣ ଦର୍ଶଯାଇଛି ପ୍ରସ୍ତାବଟି ଏଯାଏଁ ଉପଯୁକ୍ତ ସ୍ତରରେ ଅନିମୋଦିତ ହୋଇନାହିଁ । ହଠାତ କାହିଁକି  ନିଷ୍ପତ୍ତି ବଦଳିଲା ତାହା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଓଡିଶା କନିଷ୍ଠ ଶିକ୍ଷକ ସଂଘ ଏ ନେଇ ସରକାରଙ୍କଠାରୁ ଉତ୍ତର ମାଗିଛି । ଆଗକୁ ପ୍ରସ୍ତାବ ଉପରେ ସରକାର ନିଷ୍ପତ୍ତି ନ ନେଲେ ଆନ୍ଦୋଳନ କରିବ ବୋଲି ସଂଘ କହିଛି । 

ସରକାରଙ୍କ ଏହି ନିଷ୍ପତ୍ତି ଫଳରେ ସ୍କିମାଟିକ ଶିକ୍ଷକଙ୍କ ଚାକିରି ନିୟମିତ ହେବାର ଆଶା ମଉଳିଯାଇଛି । ୨ ତାରିଖରେ ସ୍କିମାଟିକ ପଦକୁ ଉଚ୍ଛେଦ କରାଯାଇ ମାଧ୍ୟମିକ ଶିକ୍ଷକଙ୍କ ଭଳି ନିୟମିତ ପ୍ରାଥମିକ ଶିକ୍ଷକ ନିଯୁକ୍ତି ପାଇଁ  ପ୍ରସ୍ତାବ ରହିଥିଲା । ଏବେ ସେହି ଆଶା ମଉଳିଯାଇଛି। ବିଧାନସଭାରେ ୬ ସେପ୍ଟେମ୍ବର ୨୦୨୪ର ତଥ୍ୟ ଅନୁସାରେ ରାଜ୍ୟରେ ଖାଲିପଡିଛି ୩୦ ହଜାର ୫୪୦ ପ୍ରାଥମିକ ଶିକ୍ଷକ ପଦବୀ । ୧ଲକ୍ଷ ୩୫ହଜାର ୬୫୬ ମଞ୍ଜୁରୀପ୍ରାପ୍ତ ଶିକ୍ଷକ ପଦବୀ ରହିଥିବା ବେଳ ଏତିକି ଖାଲି ପଡିଛି । ଗଞ୍ଜାମ ଜିଲ୍ଲାରେ ସର୍ବାଧିକ ୪ ହଜାର ୨୮୩ ପଦବୀ ଖାଲି ଅଛି । ଯଦିଓ କିଛି ପଦ ପୂରଣ ପାଇଁ ପ୍ରକ୍ରିୟା ଚାଲିଛି ।  

ପ୍ରଶ୍ନ ଉଠୁଛି, କାହା ନିର୍ଦ୍ଦେଶରେ ଜାରି ହୋଇଥିଲା ଚିଠି? କାହା ନିର୍ଦ୍ଦେଶରେ ନିଷ୍ପତ୍ତି ପ୍ରତ୍ୟାହାର ହେଲା? ଗଣଶିକ୍ଷା ବିଭାଗରେ କାହିଁକି ବାରମ୍ବାର ହେଉଛି ଏଭଳି ତ୍ରୁଟି?