କିଏ ହେବେ ଆଗାମୀ ଉପ-ରାଷ୍ଟ୍ରପତି? ଚର୍ଚ୍ଚାରେ ମନ୍ତ୍ରୀ, ମୁଖ୍ୟମନ୍ତ୍ରୀ ଏବଂ ଜଣେ କଂଗ୍ରେସ ନେତା

କନକ ବ୍ୟୁରୋ: କୁହାଯାଏ ରାଷ୍ଟ୍ରପତିଙ୍କ ପରେ ଉପ-ରାଷ୍ଟ୍ରପତି ହେଉଛନ୍ତି ଆମ ଦେଶର ଦ୍ୱିତୀୟ ନାଗରିକ । ଆଉ ଯେବେ ସ୍ୱାସ୍ଥ୍ୟଗତ କାରଣ ଦର୍ଶାଇ ହଠାତ୍ ଦେଶର ଉପ-ରାଷ୍ଟ୍ରପତି ନିଜ ପଦରୁ ଇସ୍ତଫା ଦେଉଛନ୍ତି, ସେତେବେଳେ ଚର୍ଚ୍ଚା ହେବା ସ୍ୱାଭାବିକ ଦେଶର ଏତେ ବଡ଼ ସାମ୍ବିଧାନିକ ପଦରେ ଆଗକୁ କିଏ ବସିବ? କିଏ ଦେଶର ନୂଆ ଉପ-ରାଷ୍ଟ୍ରପତି ହେବେ? କିଏ ଆଗକୁ ରାଜ୍ୟସଭାରେ ସାଂସଦମାନଙ୍କ ସଭାପତିତ୍ୱ କରିବେ? ତାକୁ ନେଇ ଏବେ ଦିଲ୍ଲୀରେ ଉଠୁଛିପଡ଼ୁଛି ରାଜନୀତି । କୁହାଯାଉଛି ଜଗଦୀପ ଧନଖଡ଼ ଇସ୍ତଫା ଦେବା ପରେ, ମୋଦୀ କ୍ୟାବିନେଟର ଜଣେ ମନ୍ତ୍ରୀଙ୍କ ସମେତ, ଜଣେ ମୁଖ୍ୟମନ୍ତ୍ରୀ ଏବଂ କଂଗ୍ରେସର ଜଣେ ନେତା ଏବଂ ଏନଡିଏର ଜଣେ ନେତା ମଧ୍ୟ ଉପ-ରାଷ୍ଟ୍ରପତି ହେବା ରେସରେ ଆଗରେ ରହିଛନ୍ତି ।

ଉପ-ରାଷ୍ଟ୍ରପତି: ଚର୍ଚ୍ଚାରେ କିଏ କିଏ?

ଜଗଦୀପ ଧନଖଡ଼ଙ୍କ ପରେ ଦେଶର ଉପ-ରାଷ୍ଟ୍ରପତି ପଦରେ କିଏ ବସିବେ, ତାହା ଏବେ ବଡ଼ ପ୍ରଶ୍ନ । ହେଲେ ଏହାରି ଭିତରେ ଦୁଇ, ଚାରୋଟି ନାମ କିନ୍ତୁ ସତ୍ତାର କରିଡରରେ ବେଶ ଚର୍ଚ୍ଚା ସୃଷ୍ଟି କରିଛି । କୁହାଯାଉଛି ଆଗକୁ ବିହାରରେ ବିଧାନସଭା ନିର୍ବାଚନକୁ ଅଛି, ଆଉ ସେଠାରେ ଏଥର ବିଜେପି ସତ୍ତା ଦଖଲ କରିବାକୁ ଜୋରସୋରରେ ଉଦ୍ୟମ କରୁଛି । ତେଣୁ ବିହାର ଫର୍ମୁଲାରେ ନୀତିଶ କୁମାରଙ୍କୁ ଉପ-ରାଷ୍ଟ୍ରପତି ପଦ ଦେଇ ମୁଖ୍ୟମନ୍ତ୍ରୀ ସିଟ୍ ଖାଲି କରିବାକୁ ଚାହୁଛି ବିଜେପି । ତେଣୁ ଏନଡିଏ ଖୁବଶୀଘ୍ର ନୀତିଶ କୁମାରଙ୍କୁ ଉପ-ରାଷ୍ଟ୍ରପତି ପ୍ରାର୍ଥୀ ଭାବେ ଘୋଷଣା କରିପାରେ ବୋଲି କୁହାଯାଉଛି ।

ସେହିପରି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଧ୍ୟ ଦେଶର ଆଗାମୀ ଉପ-ରାଷ୍ଟ୍ରପତି ହୋଇପାରନ୍ତି ବୋଲି ଗୋଟିଏ ପକ୍ଷ ଦାବି କରୁଛନ୍ତି । କାହିଁକି ନା, ୨୦୨୨ରେ ଯେତେବେଳେ ଉପ-ରାଷ୍ଟ୍ରପତି ନିର୍ବାଚନ ହେଲା, ସେତେବେଳେ ଭେଙ୍କୟା ନାଇଡୁଙ୍କ ପରେ ରାଜନାଥ ସିଂହ ଉପ-ରାଷ୍ଟ୍ରପତି ହେବେ ବୋଲି ଅନେକ ଚର୍ଚ୍ଚା ହେଇଥିଲା । ହେଲେ ସେତେବେଳେ କିନ୍ତୁ ଜଗଦୀପ ଧନଖଡ଼ ବାଜି ମାରିନେଇଥିଲେ । ଆଉ ଏବେ ଯେତେବେଳେ ପୁଣିଥରେ ସେହିଭଳି ସ୍ଥିତି ଉତ୍ପନ୍ନ ହୋଇଛି । ସେତେବେଳେ ରାଜନାଥ ସିଂହ ହିଁ ଉପ-ରାଷ୍ଟ୍ରପତି ହୋଇପାରନ୍ତି ବୋଲି ଚର୍ଚ୍ଚା ହେଉଛି ।

ତେବେ ଏହି ଦୁଇ ନେତାଙ୍କ ଭିତରେ ବର୍ତ୍ତମାନ ରାଜ୍ୟସଭାର ଉପାଧ୍ୟକ୍ଷ ଥିବା ଜେଡିୟୁ ଏମପି ହରିବଂଶ ନାରାୟଣ ସିଂହ ମଧ୍ୟ ଉପ-ରାଷ୍ଟ୍ରପତି ରେସରେ ଆଗରେ ଅଛନ୍ତି । ଯେହେତୁ ଆଗକୁ ବିହାରରେ ବିଧାନସଭା ନିର୍ବାଚନ ଅଛି, ତେଣୁ ହରିବଂଶ ନାରାୟଣ ସିଂହଙ୍କୁ ଉପ-ରାଷ୍ଟ୍ରପତି କରି ବଡ଼ ଗେମ୍ ଖେଳିବାକୁ ଲକ୍ଷ୍ୟ ରଖିଛି ବିଜେପି । ଯଦି ନୀତିଶ କୁମାର ଉପ-ରାଷ୍ଟ୍ରପତି ନ ହୁଅନ୍ତି, ତେବେ ତାଙ୍କ ପରେ ବିହାରରୁ ହରିବଂଶ ନାରାୟଣ ସିଂହ ହିଁ ଉପ-ରାଷ୍ଟ୍ରପତି ହୋଇପାରନ୍ତି ବୋଲି ପାଓ୍ୱାର୍ କରିଡରରେ ଚର୍ଚ୍ଚା ହେଉଛି ।

ଆପଣଙ୍କୁ ସବୁଠୁ ଆଶ୍ଚର୍ଯ୍ୟ କରିବ, ଉପ-ରାଷ୍ଟ୍ରପତି ରେସରେ ଥିବା ଚତୁର୍ଥ ଚେହେରା । ସେ ହେଉଛନ୍ତି କଂଗ୍ରେସ ଏମପି ଶଶୀ ଥରୁର । କିଛି ରାଜନୈତିକ ବିଶେଷଜ୍ଞଙ୍କ କହିବା କଥା ହେଲା, ଉପ-ରାଷ୍ଟ୍ରପତି ରେସରେ ସମସ୍ତଙ୍କ ଅଗୋଚରରେ ଶଶୀ ଥରୁର ମଧ୍ୟ ଅଛନ୍ତି । ଗଲା କିଛି ଦିନ ହେଲା, ଶଶୀ ଥରୁର ଏବଂ କଂଗ୍ରେସ ଭିତରେ ତୁ ତୁ ମେଁ ମେଁ ଚାଲିଛି । ଆଉ ଏହାରି ଭିତରେ ସେ ଲଗାତାର ବିଜେପି ନେତାଙ୍କ ସମ୍ପର୍କରେ ମଧ୍ୟ ଅଛନ୍ତି । ତେଣୁ କିଛି ଲୋକଙ୍କ କହିବା କଥା ହେଲା, ଶଶୀ ଥରୁର ମଧ୍ୟ ଉପ-ରାଷ୍ଟ୍ରପତି ହେବା ରେସରେ ଅଛନ୍ତି ।

ଜଗଦୀପ ଧନଖଡ଼ ଛାଡ଼ିଲେ ପଦ

ଗତକାଲି ହଠାତ୍ ଉପ-ରାଷ୍ଟ୍ରପତି ଜଗଦୀପ ଧନଖଡ଼ ନିଜ ପଦରୁ ଇସ୍ତଫା ଦେଇଥିଲେ । ରାଷ୍ଟ୍ରପତିଙ୍କ ପାଖକୁ ପତ୍ର ଲେଖି ସେ ନିଜର ଇସ୍ତଫା ସମ୍ପର୍କରେ ଜଣାଇବା ସହିତ ସମସ୍ତଙ୍କୁ ଧନ୍ୟବାଦ ଜଣାଇଥିଲେ । ତେବେ ସଂସଦର ମୌସୁମୀ ଅଧିବେଶନ ପ୍ରଥମ ଦିନରେ ଭଲ ଭାବେ କାର୍ଯ୍ୟ କରିଥିଲେ ବି, ରାତିରେ କାହିଁକି ସେ ସ୍ୱାସ୍ଥ୍ୟଗତ କାରଣ ଦର୍ଶାଇ ଇସ୍ତଫା ଦେଲେ ତାକୁ ନେଇ ଏବେ ଚର୍ଚ୍ଚା ବଢ଼ିଛି । ଖାସ୍ କରି ବିରୋଧୀମାନେ ଏହାକୁ ସାମାନ୍ୟ ବୋଲି ଗ୍ରହଣ କରିବାକୁ ଅରାଜି । ଜାଣିଶୁଣି ଉପ-ରାଷ୍ଟ୍ରପତିଙ୍କୁ ଇସ୍ତଫା ଦେବାକୁ ବାଧ୍ୟ କରାଯାଇଛି ବୋଲି କଂଗ୍ରେସର ନେତା ଦାବି କରୁଛନ୍ତି । ଅନ୍ୟପଟେ ବିଜେପି ନେତା ମଧ୍ୟ ସେମାନଙ୍କୁ କାଉଣ୍ଟର କରିବାକୁ ପଛେଇ ନାହାଁନ୍ତି ।

କେମିତି ହୁଏ ନିର୍ବାଚନ?

ଉପରାଷ୍ଟ୍ରପତିଙ୍କ ନିର୍ବାଚନରେ ଲୋକସଭା ଓ ରାଜ୍ୟସଭାର ସାଂସଦମାନେ ଅଂଶଗ୍ରହଣ କରନ୍ତି । ଲୋକସଭାର ସମସ୍ତ ନିର୍ବାଚିତ ସଦସ୍ୟ (୫୪୩) ଏବଂ ରାଜ୍ୟସଭାର ସମସ୍ତ ସଦସ୍ୟ ଏହି ନିର୍ବାଚନରେ ଭାଗ ନିଅନ୍ତି । ଲୋକସଭାର ୫୪୩ ଜଣ ସାଂସଦ ଏବଂ ରାଜ୍ୟସଭାର ୨୫୦ ଜଣ ସାଂସଦଙ୍କୁ ମିଶାଇ ସମସ୍ତ ସଦସ୍ୟ ଉପରାଷ୍ଟ୍ରପତି ନିର୍ବାଚନରେ ଭାଗ ନେଇଥାଆନ୍ତି । ତେବେ ସାମ୍ବିଧାନିକ ନିୟମ ଅନୁସାରେ ଇସ୍ତଫା ଦେବାର ୬୦ ଦିନ ଭିତରେ ହିଁ ନିର୍ବାଚନ ହେବା ଆବଶ୍ୟକ । ତେଣୁ ଠିକ୍ ଦୁଇ ମାସ ଭିତରେ ଦେଶ ନୂଆ ଉପ-ରାଷ୍ଟ୍ରପତି ଦେଖିବା ଏକପ୍ରକାର ପକ୍କା । ହେଲେ ଏହି ପଦରେ ଆଗକୁ କିଏ ବସିବେ, ତାକୁ ନେଇ ଚର୍ଚ୍ଚା ବଢ଼ିଛି...