ସତରେ କଣ, ୧୦ ଦିନ ଭିତରେ ଦିଲ୍ଲୀ ଦେଖିବ ନୂଆ ମୁଖ୍ୟମନ୍ତ୍ରୀ?

କନକ ବ୍ୟୁରୋ: ଦିଲ୍ଲୀରେ ବିଜେପିର ୨୭ ବର୍ଷର ବନବାସ ଶେଷ ହୋଇଛି । ୪୮ଟି ସିଟରେ ବମ୍ପର ବିଜୟ ସହ ଦିଲ୍ଲୀ ଅକ୍ତିଆର କରିଛି ଭାରତୀୟ ଜନତା ପାର୍ଟି । ଏଥିସହ ୧୧ ବର୍ଷ ଧରି ଦିଲ୍ଲୀ ସତ୍ତାରେ ରହିଥିବା ଆମ୍ ଆଦମୀ ପାର୍ଟି ସତ୍ତାରୁ ବେଦଖଲ ହୋଇଛି । ଏଥର ମାତ୍ର ୨୨ ସିଟରେ ଆଣ୍ଠେଇ ପଡିଛି କେଜ୍ରିଓ୍ୱାଲଙ୍କ ଦଳ । ତେବେ ଦିଲ୍ଲୀରେ ବିଜେପିର ବଡ଼ ବିଜୟ ପରେ ଏବେ ସିଏମ୍ କିଏ ହେବ, ତାକୁ ନେଇ ଆରମ୍ଭ ହୋଇଯାଇଛି ମାନସମନ୍ଥନ । ଗୋଟିଏ ପଟେ ବିଜେପି ଅଧ୍ୟକ୍ଷ ଏନେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କୁ ଭେଟିଥିଲାବେଳେ, ଅନ୍ୟପଟେ ଦିଲ୍ଲୀ ବିଜେପି ଅଧ୍ୟକ୍ଷ ବୀରେନ୍ଦ୍ର ସଚଦେବା ରବିବାର ପାର୍ଟିର ବୈଠକ ଡାକିଛନ୍ତି । ଯେଉଁଥିରେ ମୁଖ୍ୟମନ୍ତ୍ରୀ ଚେହେରାକୁ ନେଇ ଆଲୋଚନା ହୋଇପାରେ ବୋଲି ଜଣାପଡିଛି ।

Advertisment

ବିଶେଷ ସୂତ୍ରରୁ ମିଳିଥିବା ସୂଚନା ମୁତାବକ, ଦିଲ୍ଲୀ ବିଜେପି ଅଧ୍ୟକ୍ଷ ବୀରେନ୍ଦ୍ର ସଚଦେବା ଆଜି ସନ୍ଧ୍ୟାରେ ସମସ୍ତ ବିଜୟୀ ବିଜେପି ପ୍ରାର୍ଥୀଙ୍କୁ ଭେଟି ତାଙ୍କୁ ଧନ୍ୟବାଦ ଦେବା ସହ ବୈଠକ କରିବେ । ଯେଉଁଥିରେ କି, ବିଧାୟକ ଦଳ ନେତା ଚୟନ ନେଇ ରଣନୀତି ପ୍ରସ୍ତୁତ ହେବ । ତେବେ ଏହା ପୂର୍ବରୁ ବୀରେନ୍ଦ୍ର ସଚଦେବା କହିସାରିଛନ୍ତି ଯେ, ମୁଖ୍ୟମନ୍ତ୍ରୀ ଚୟନ କରିବାର ଅଧିକାର କେନ୍ଦ୍ରୀୟ ନେତୃତ୍ୱଙ୍କ ପାଖରେ ରହିଛି । ଏହାସହ ନବ ନିର୍ବାଚିତ ବିଧାୟକମାନେ ସେମାନଙ୍କର ନେତା ବାଛିବେ ବୋଲି ସେ କହିସାରିଛନ୍ତି ।

୧୦ ଦିନ ଭିତରେ ଦିଲ୍ଲୀରେ ନୂଆ ମୁଖ୍ୟମନ୍ତ୍ରୀ!

ଦିଲ୍ଲୀରେ ନୂଆ ମୁଖ୍ୟମନ୍ତ୍ରୀ କେବେ ଶପଥ ଗ୍ରହଣ କରିବେ, ସେନେଇ ତାରିଖ ଧାର୍ୟ୍ୟ ତ ହେଇନି । ହେଲେ ଶନିବାର ବଡ଼ ବିଜୟ ପରେ ଦିଲ୍ଲୀ ପ୍ରଭାରୀ ବୈଜୟନ୍ତ ପଣ୍ଡାଙ୍କ କହିବା ମୁତାବକ, ଆସନ୍ତା ୧୦ରୁ ୧୫ ଦିନ ଭିତରେ ଦିଲ୍ଲୀକୁ ନୂଆ ମୁଖ୍ୟମନ୍ତ୍ରୀ ମିଳିବ । ପାର୍ଟି ମୁଖ୍ୟମନ୍ତ୍ରୀ ଚୟନ ନେଇ ପୂରା ପ୍ରକ୍ରିୟା ପାଳନ କରିବ ବୋଲି ସେ କହିଛନ୍ତି । ଏହାସହ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଶପଥ ଗ୍ରହଣ ଉତ୍ସବରେ ଏନଡିଏର ନେତାମାନେ ସାମିଲ ହେବେ । ବିଜେପି ଶାସିତ ମୁଖ୍ୟମନ୍ତ୍ରୀଙ୍କ ସହିତ ଏନଡିଏର ନେତାମାନେ ଶପଥ ଗ୍ରହଣ ସମାରୋହରେ ସାମିଲ ହେବେ ବୋଲି ଜଣାପଡିଛି ।

ମୁଖ୍ୟମନ୍ତ୍ରୀ ରେସରେ କିଏ କିଏ?

ପ୍ରବେଶ ବର୍ମା

ଦିଲ୍ଲୀ ମୁଖ୍ୟମନ୍ତ୍ରୀ ରେସ୍‌ରେ ଆଗରେ ପ୍ରବେଶ ବର୍ମା
ଅରବିନ୍ଦ କେଜ୍ରିୱାଲଙ୍କୁ ହରାଇ ନୂଆଦିଲ୍ଲୀ ଆସନରୁ ବିଜୟୀ
ଦିଲ୍ଲୀରେ ଆପ୍‌କୁ ହରାଇବାରେ ତୁଲାଇଛନ୍ତି ପ୍ରମୁଖ ଭୂମିକା

ବାଂଶୁରୀ ସ୍ୱରାଜ

ମୁଖ୍ୟମନ୍ତ୍ରୀ ଦୌଡ଼ରେ ପ୍ରମୁଖ ଦାବିଦାର ବାଂଶୁରୀ ସ୍ୱରାଜ
ପ୍ରଥମ ନିର୍ବାଚନରେ ବିଜୟୀ ହୋଇ ନୂଆଦିଲ୍ଲୀରୁ ହୋଇଛନ୍ତି ସାଂସଦ
ମା ସୁଷମା ସ୍ବରାଜଙ୍କ ଭଳି ନିର୍ଭୀକ ଓ ସ୍ପଷ୍ଟବାଦୀ ନେତ୍ରୀ

ସ୍ମୃତି ଇରାନୀ

ବିଜେପିର ପରିଚିତ ମହିଳା ଚେହେରା
ସଂସଦରେ ସ୍ମୃତିଙ୍କ ଭାଷଣ ବେଶ ପ୍ରଭାବଶାଳୀ
ନିର୍ବାଚନ ପ୍ରଚାରରେ ତୁଲାଇଛନ୍ତି ସକ୍ରିୟ ଭୂମିକା

ମୋହନ ବିଷ୍ଟ

ଦଳର ଅନ୍ୟତମ ଟାଣୁଆ ନେତା
ମୁସ୍ତାଫାବାଦ ଆସନରୁ ବିପୁଳ ଭୋଟରେ ବିଜୟୀ
ମୁସଲମାନ ବହୁଳ ଆସନରେ ଦଳ ପାଇଁ ସାଜିଲେ ଟ୍ରମ୍ପକାର୍ଡ

ମନୋଜ ତିୱାରୀ

ଦିଲ୍ଲୀ ପ୍ରଦେଶ ବିଜେପିର ସକ୍ରିୟ ନେତା
ଉତ୍ତରପୂର୍ବ ଦିଲ୍ଲୀ ଆସନରୁ ତିନି ତିନି ଥରର ସାଂସଦ
ଦିଲ୍ଲୀ ବିଜେପିର ସଭାପତି ଭାବେ ତୁଲାଇଥିଲେ ଦାୟିତ୍ବ

ବୀରେନ୍ଦ୍ର ସଚଦେବା

ବର୍ତ୍ତମାନ ଦିଲ୍ଲୀ ବିଜେପିର ସଭାପତି
ଶୀର୍ଷ ନେତୃତ୍ୱଙ୍କ ନିକଟତର
ସାଂଗଠନିକ ଦକ୍ଷତା ଓ ଅଭିଜ୍ଞ ରାଜନେତା

ଜାଣିରଖିବା ଉଚିତ୍ ଯେ, ଦିଲ୍ଲୀ ବିଧାନସଭାର ମୋଟ ୭୦ ଆସନ ମଧ୍ୟରୁ ଏଥର ବିଜେପି ୪୮ ଆସନରେ ବାଜିମାତ୍ କରିଛି । ସେହିପରି ଆପ୍ ୨୨ଟି ଆସନରେ ବାଜିମାତ୍ କରିଛି । ତେବେ ଏହା ପୂର୍ବରୁ ୧୯୯୩ ମସିହାରେ ଦିଲ୍ଲୀରେ ବିଜେପି ପ୍ରଥମ କରି ସରକାର ଗଢିଥିଲା । ଏହାପରେ ୧୯୯୮ ମସିହା ଦିଲ୍ଲୀ ନିର୍ବାଚନରେ ବିଜେପିର ପରାଜୟ ସହ, କଂଗ୍ରେସ ସରକାରକୁ ଫେରିଥିଲା । ଏହାପରେ ଲଗାତାର ୧୯୯୮ ମସିହାରୁ ଦିଲ୍ଲୀରେ ରାଜ୍ କରିଥିଲା କଂଗ୍ରେସ । ହେଲେ ଏହାପରେ ଆପ୍ ଦଖଲକୁ ଆସିଥିଲା ଦିଲ୍ଲୀ । ଏହାପରଠୁ ଲଗାତାର ଆପ୍ ଦିଲ୍ଲୀ ଅକ୍ତିଆର କରିବାରେ ସମର୍ଥ ହେଇଥିଲା । ଆଉ ୨୦୨୫ରେ ଦୀର୍ଘ ବର୍ଷର ବନବାସ ଶେଷ କରି ସତ୍ତା ଦଖଲ କରିଛି ଭାରତୀୟ ଜନତା ପାର୍ଟି ।