ସେନାର ଗୁଳିରେ ଚିତପଟାଙ୍ଗ ସମୁଦ୍ର ଚାଚା : ଯାହାକୁ ଆତଙ୍କବାଦୀମାନେ ଡାକୁଥିଲେ ‘ହ୍ୟୁମାନ୍ ଜିପିଏସ୍’

କନକ ବ୍ୟୁରୋ : ଭାରତୀୟ ସେନାକୁ ବଡ଼ ସଫଳତା । ଆତଙ୍କବାଦୀଙ୍କ ଟପ୍ ଗାଇଡ୍ ବାଗୁ ଖାନ ଓରଫ୍ ସମୁଦ୍ର ଚାଚାକୁ ଏନକାଉଣ୍ଟରରେ ମାରି ଗଡ଼ାଇଛି ସେନା । ସମୁଦ୍ର ଚାଚାର ଏନକାଉଣ୍ଟରକୁ ଆତଙ୍କବାଦୀମାନଙ୍କ ପାଇଁ ଶକ୍ତ ଧକ୍କା ବୋଲି କୁହାଯାଉଛି । ଅଧିକାରୀମାନଙ୍କ କହିବା ଅନୁସାରେ ବାଗୁ ଖାନ ୧୯୯୫ ମସିହାରୁ ୧୦୦ ରୁ ଅଧିକ ଅନୁପ୍ରବେଶକାରୀଙ୍କୁ ଭାରତରେ ଅନୁପ୍ରବେଶ କରିବା ଚେଷ୍ଟାରେ ସାହାଯ୍ୟ କରିଥିଲା । ସେନା ଗୁରୁବାର ଉତ୍ତର କାଶ୍ମୀରର ବାନ୍ଦିପୋରାର ଗୁରେଜ ସେକ୍ଟରରେ ମୋଷ୍ଟ ୱାଣ୍ଟେଡ୍ ବାଗୁ ଖାନ ଓରଫ୍ ସମୁଦ୍ର ଚାଚାକୁ ମାରି ଗଡ଼ାଇଛି । ସୂଚନା ଅନୁସାରେ ପହଲଗାମ ଆତଙ୍କବାଦୀ ଆକ୍ରମଣକୁ ସଫଳ କରିଥିବା ଆତଙ୍କୀ ମଧ୍ୟ ସୀମାପାରରୁ ହିଁ ଆସିଥିଲେ । ସମୁଦ୍ର ଚାଚାକୁ ଆତଙ୍କବାଦୀମାନେ ଚଳନ୍ତା ହ୍ୟୁମାନ ଜିପିଏସ୍ ବୋଲି କହୁଥିଲେ । ସେ ବିଗତ ୨୫ ବର୍ଷରେ ୧୦୦ ରୁ ଅଧିକ ଆତଙ୍କବାଦୀଙ୍କୁ ଭାରତରେ ପ୍ରବେଶ କରାଇବାରେ ସାହାଯ୍ୟ କରିଥିଲା । ତେବେ ବାଗୁ ଖାନର ଏନକାଉଣ୍ଟରକୁ ନେଇ ସେନା ପକ୍ଷରୁ ଏପର୍ଯ୍ୟନ୍ତ ଅଧିକାରିକ ବୟାନ ଜାରି ହୋଇନାହିଁ । 

ସୂତ୍ର ଅନୁସାରେ ଯେଉଁ ୨ ଜଣ ଆତଙ୍କୀଙ୍କୁ ସେନା ମାରି ଗଡ଼ାଇଛି ସେମାନଙ୍କ ମଧ୍ୟରେ ସମୁଦ୍ର ଚାଚା ମଧ୍ୟ ସାମିଲ ଅଛି । ସୂତ୍ର ଅନୁସାରେ ୨୮ ଅଗଷ୍ଟ ରାତିରେ ସେ ନୌଶେରା ନର ଅଞ୍ଚଳରେ ଆତଙ୍କୀଙ୍କୁ ଅନୁପ୍ରବେଶ ପାଇଁ ସାହାଯ୍ୟ କରୁଥିଲା । ସେହି ସମୟରେ ଭାରତୀୟ ସେନା ତା’କୁ ଘେରିଗଲେ । ଜଣେ ଅଧିକାରୀ କହିଛନ୍ତି ଯେ ମୃତ ୨ ଆତଙ୍କୀଙ୍କ ପାଖରୁ ଜଣଙ୍କ ପାଖରେ ପରିଚୟ ପତ୍ର ମିଳିଥିଲା । ଯେଉଁଥିରେ ଉକ୍ତ ଆତଙ୍କୀର ନାଁ ମୁଜାଫରବାଦ ନିବାସୀ ବାଗୁ ଖାନ୍ ବୋଲି ଲେଖାଯାଇଥିଲା । ସମୁଦ୍ର ଚାଚା ନାମକ ଜଣେ ବ୍ୟକ୍ତି ବିଗତ ୨୫ ବର୍ଷ ହେଲା ଅନୁପ୍ରବେଶକାରୀମାନଙ୍କୁ ରାସ୍ତା ଦେଖାଇବା ଅଭିଯୋଗରେ ସେନାର ନଜରରେ ଥିଲା । ତେବେ ଏହି ଅପରେସନରେ ନିହତ ହୋଇଥିବା ଅନ୍ୟ ଜଣେ ଆତଙ୍କୀର ପରିଚୟ ଏଯାଏଁ ମିଳିପାରିନାହିଁ । ସମୁଦ୍ର ଚାଚା ପିଓକେରେ ରହୁଥିଲା , ଯାହାର ମୁଖ୍ୟ କାମ ଆତଙ୍କବାଦୀମାନଙ୍କ ଅନୁପ୍ରବେଶରେ ସାହାଯ୍ୟ କରିବା ଥିଲା ।