କନକ ବ୍ୟୁରୋ: ୨୦୧୪ ରୁ ଦେଶରେ ବିଜେପିର ଶାସନ ଚାଲିଛି । ଆଉ ସେବେଠୁ ପ୍ରଧାନମନ୍ତ୍ରୀ ମୋଦୀ ହିଁ ପିଏମ୍‌ ଅଛନ୍ତି । ମୋଦୀଙ୍କ ପ୍ରତି ଜନତାଙ୍କ ଦୃଢ ସମର୍ଥନ ରହିଛି ଏଥିରେ କୌଣସି ସନ୍ଦେହ ନାହିଁ । ହେଲେ ଏବେ ଯଦି ନିର୍ବାଚନ ହୁଏ ତେବେ ଜନତା କାହାକୁ ପିଏମ୍‌ ଭାବରେ ଦେଖିବାକୁ ଚାହୁଛନ୍ତି ତାହାକୁ ନେଇ ଜାତୀୟ ଗଣମାଧ୍ୟମରେ ଏକ ସର୍ଭେ ହୋଇଥିଲା । ସର୍ଭେର ରିପୋର୍ଟ ଅନୁସାରେ, ମୋଦୀଙ୍କ ପରେ ବର୍ତ୍ତମାନ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ ସର୍ବାଧିକ ଲୋକ ପିଏମ୍‌ ଭାବରେ ଦେଖିବାକୁ ଚାହୁଥିବା ସ୍ପଷ୍ଟ ହୋଇଛି । କାରଣ ଅମିତ ଶାହଙ୍କୁ ପ୍ରାୟ ୨୮ ପ୍ରତିଶତ ଜନତା ସର୍ଭେରେ ଭୋଟ୍‌ ଦେଇଥିବା ଚର୍ଚ୍ଚା ହେଉଛି । ଖାଲି ଶାହ ନୁହେଁ ବରଂ କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡ଼କରି ଓ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନାଁକୁ ନେଇ ବି ଚର୍ଚ୍ଚା ହେଉଛି । ତେବେ ଜାଣନ୍ତୁ କେଉଁ ନେତା କାହିଁକି ଚର୍ଚ୍ଚାରେ…

ନରେନ୍ଦ୍ର ମୋଦୀ

Advertisment

ଗୁଜରାଟର ମୁଖ୍ୟମନ୍ତ୍ରୀ ରହିବା ପରେ ୨୦୧୪ରୁ ଦେଶର ପ୍ରଧାନମନ୍ତ୍ରୀ ଅଛନ୍ତି  ନରେନ୍ଦ୍ର ମୋଦୀ । ମୋଦୀଙ୍କ ନିଷ୍ପତ୍ତି ଓ କାମ କରିବାର ଶୈଳୀକୁ ଲୋକ ବେଶ୍‌ ପସନ୍ଦ କରୁଛନ୍ତି ।  ମୋଦୀଙ୍କ ନେତୃତ୍ୱରେ ବିଜେପି ପୂର୍ଣ୍ଣ ଆତ୍ମବିଶ୍ୱାସରେ ବି ରହିଛି । ସେ ନିଜର ବିଭିନ୍ନ ବିକାଶମୂଳକ ଯୋଜନା, ଜାତୀୟତାବାଦ ଏବଂ ଦୃଢ଼ ନେତୃତ୍ୱକୁ ନେଇ ଜନସାଧାରଣଙ୍କ ମଧ୍ୟରେ ପ୍ରଚାର କରୁଛନ୍ତି । ୨୦୧୪ ଏବଂ ୨୦୧୯ ରେ ବିପୁଳ ବିଜୟ ପରେ, ମୋଦୀଙ୍କ ଲୋକପ୍ରିୟତା ଏବେ ବି ଅତୁଟ ରହିଛି । ଖାସ୍‌ କରି ପ୍ରଧାନମନ୍ତ୍ରୀ ଆବାସ ଯୋଜନା, ଉଜ୍ଜ୍ବଳା ଯୋଜନା, ଜନଧନ ଯୋଜନା ଆଦିକୁ ନେଇ ବିଜେପି ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରୁଛି । ରାମ ମନ୍ଦିର ନିର୍ମାଣ ଏବଂ ଧାରା ୩୭୦ ଉଚ୍ଛେଦ ଭଳି ନିଷ୍ପତ୍ତି ମୋଦୀ ସରକାରଙ୍କ ବଡ଼ ସଫଳତା ଭାବେ ଦେଖାଯାଉଛି ।

ଅମିତ ଶାହ

ଗୃହମନ୍ତ୍ରୀ ଅମିତ ଶାହା ବିଜେପିର ଚାଣକ୍ୟ ଭାବେ ପରିଚିତ । ସେ ନିର୍ବାଚନ ରଣନୀତି ପ୍ରସ୍ତୁତ କରିବାରେ ଏବଂ ସଙ୍ଗଠନକୁ ମଜବୁତ କରିବାରେ ମୁଖ୍ୟ ଭୂମିକା ଗ୍ରହଣ କରନ୍ତି । ତାଙ୍କର ନିର୍ବାଚନ ପରିଚାଳନା ଦକ୍ଷତା ଏବଂ ବୁଥସ୍ତରରୁ କାର୍ଯ୍ୟକର୍ତ୍ତାଙ୍କୁ ସକ୍ରିୟ କରିବାର କୌଶଳ ବିଜେପି ପାଇଁ ବେଶ୍ ଗୁରୁତ୍ୱପୂର୍ଣ୍ଣ । ଶାହ ମଧ୍ୟ ଦେଶର ବିଭିନ୍ନ ସ୍ଥାନରେ ରାଲି ଓ ସାଧାରଣ ସଭା କରି ସରକାରଙ୍କ ସଫଳତାକୁ ଲୋକଙ୍କ ନିକଟରେ ପହଞ୍ଚାଉଛନ୍ତି ।

ଯୋଗୀ ଆଦିତ୍ୟନାଥ

ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ବିଜେପିର ଅନ୍ୟତମ ଲୋକପ୍ରିୟ ଚେହେରା । ତାଙ୍କର କଠୋର ଶାସନ ଏବଂ ହିନ୍ଦୁତ୍ୱ ଭାବନା ତାଙ୍କୁ ଉତ୍ତର ଭାରତରେ ଜଣେ ଶକ୍ତିଶାଳୀ ନେତା ଭାବେ ପ୍ରତିଷ୍ଠିତ କରିଛି । ୟୁପିରେ ଆଇନଶୃଙ୍ଖଳା ପରିସ୍ଥିତିରେ ଉନ୍ନତି ଆଣିଥିବା ସହ ରାଜ୍ୟର ବିକାଶ ପାଇଁ ଅନେକ ପଦକ୍ଷେପ ନେଇଛନ୍ତି । ଲୋକସଭା ନିର୍ବାଚନରେ ସେ ଉତ୍ତର ପ୍ରଦେଶରେ ବିଜେପି ପାଇଁ ଏକ ପ୍ରମୁଖ ପ୍ରଚାରକ ଭାବେ କାର୍ଯ୍ୟ କରିଛନ୍ତି ।

ରାହୁଲ ଗାନ୍ଧୀ 

କଂଗ୍ରେସ ନେତା ରାହୁଲ ଗାନ୍ଧୀ "ଭାରତ ଯୋଡୋ ଯାତ୍ରା" ପରେ ଜଣେ ପରିପକ୍ୱ ନେତା ଭାବେ ଉଭା ହୋଇଛନ୍ତି । ତାଙ୍କର ଭାରତ ଯୋଡୋ ନ୍ୟାୟ ଯାତ୍ରା ମାଧ୍ୟମରେ ସେ ଦେଶର ବିଭିନ୍ନ ଅଞ୍ଚଳରେ ପହଞ୍ଚି ମୋଦୀ ସରକାରଙ୍କ ବିଫଳତାକୁ ଲୋକଙ୍କ ନିକଟରେ ଉପସ୍ଥାପନ କରୁଛନ୍ତି । ବେରୋଜଗାରୀ, ମୁଦ୍ରାସ୍ଫୀତି, ଏବଂ କୃଷକ ସମସ୍ୟା ଭଳି ପ୍ରସଙ୍ଗକୁ ସେ ପ୍ରାଥମିକତା ଦେଉଛନ୍ତି । 

ଲୋକସଭା ନିର୍ବାଚନର ମୁଡ୍

ଲୋକସଭା ନିର୍ବାଚନରେ ବିଜେପି ଯେତିକି ଆସନରେ ବିଜୟ ହେବାର ସ୍ବପ୍ନ ଦେଖିଥିଲା ଅବଶ୍ୟ ସେତିକି ଆସନରେ ବିଜୟ ହୋଇପାରିନଥିଲା । ହେଲେ ବି ସରକାର ଗଢ଼ିବାରେ କୌଣସି ଅସୁବିଧାର ସାମ୍ନା କରିନି । ଆଗାମୀ ନିର୍ବାଚନରେ ପୁଣି ଥରେ ଲୋକଙ୍କ ବିଶ୍ବାସ ଜିତି ସରକାର ଗଢ଼ିବାକୁ ରଣନୀତି ପ୍ରସ୍ତୁତ କରୁଛି ଏନ୍‌ଡିଏ । ହେଲେ ଏବେ ଦେଶର ରାଜନୀତିରେ ବଡ଼ ଲକ୍ଷ୍ୟ ହାସଲ କରିବା ଏତେ ସହଜ ନୁହେଁ ବୋଲି ବି ଚର୍ଚ୍ଚା ହେଉଛି । ତେବେ ସମୟ କହିବ କେଉଁ ଦଳକୁ ବିଶ୍ବାସକୁ ନେଉଛନ୍ତି ଭୋଟର ।