କୁନି ପାଦର କାଉଡିଆ ଭାରର ଯନ୍ତ୍ରଣା ବୁଝିବ କିଏ? ଏବେ ପ୍ରଶ୍ନ ପିଲାଙ୍କୁ କାଉଡିଆ ସଜାଇବା କେତେଦୂର ଠିକ ?

କନକବ୍ୟୁରୋ :  ଶ୍ରାବଣ ମାସ ଆସିଲେ ଶିବାଳୟରେ ବଢେ ଶିବ ଭକ୍ତଙ୍କ ଭିଡ  ।  ମହାଦେବଙ୍କୁ ଜଳାଭିଷେକ କରିବା ପାଇଁ ବାହାରିପଡନ୍ତି କାଉଡିଆ ।  ପିଲାଠୁ ବୟସ୍କ ସଭିଏଁ ଖାଲି ପାଦରେ ଶିବାଳୟ ଯାଉଛନ୍ତି ।  କିନ୍ତୁ କୁନି କୁନି ପିଲାଙ୍କ କାଉଡି ଯାତ୍ରାକୁ ନେଇ ଉଠିଛି ପ୍ରଶ୍ନ । କାଉଡି ଯାତ୍ରା ପାଇଁ ସ୍ୱତନ୍ତ୍ର ଗାଇଡଲାଇନ ଆଣିବା ପାଇଁ ହେଲାଣି ଦାବି ।  ରାସ୍ତାରେ ଚାଲୁଛନ୍ତି କାଉଡିଆ। କାନ୍ଧରେ ବାହୁଁଙ୍ଗୀ ଧରି ଶିବାଳୟକୁ ବାହାରିଛନ୍ତି ଭକ୍ତ । ଆଉ ଏହି ଭିଡ଼ ଭିତରେ ନଜର ଆସୁଛନ୍ତି କୁନି କୁନି ପିଲା ।  ମହାଦେବଙ୍କ ନାଁକୁ ଭିନ୍ନ ଭିନ୍ନ ଢଙ୍ଗରେ ଉଚ୍ଚାରଣ କରୁଛନ୍ତି ।

ଏପରିକି ଅଶ୍ଳୀଳ ଶବ୍ଦ ମଧ୍ୟ ବ୍ୟବହାର କରୁଛନ୍ତି । ଅନେକ ନିଶା ସେବନରେ ବ୍ୟସ୍ତ ।  ଧର୍ମ ସଂସ୍କୃତି ନାଁରେ ହେଉଥିବା ଏହି ଅପସଂସ୍କୃତିରେ କୌଣସି କଟକଣା ନାହିଁ  ।   ତେଣୁ ଏବେ କାଉଡ଼ି ଯାତ୍ରା ନେଇ ଉଭୟ ରାଜ୍ୟ ଓ କେନ୍ଦ୍ର ସରକାର ସ୍ବତନ୍ତ୍ର ଗାଇଡଲାଇନ୍‌ ଆଣନ୍ତୁ ବୋଲି ଦାବି ଉଠିଛି  ।  କାଉଡ଼ି ଯାତ୍ରାରେ ଅନେକ ମହିଳାଙ୍କ ସଂଖ୍ୟା ବି ବଢ଼ିଛି  ।   କିଏ ପରିବାର ସହ ଯାଉଛନ୍ତି ତ ଆଉ କିଏ ସାଙ୍ଗସାଥିଙ୍କ ସହ ।  

ଏହାରି ଭିତରେ କୁନି ଝିଅମାନେ ବି ପାଣି ଭାର ଧରି ଶିବ ମନ୍ଦିର ବାହାରିଛନ୍ତି ।  ଅଧିକାଂଶ ସମୟରେ ଭିଡ଼ ଭିତରେ ଝିଅମାନେ ଅସଦାଚରଣର ଶିକାର ହେଉଥିବା ଅଭିଯୋଗ ବି ଆସୁଛି । କିନ୍ତୁ ଏନେଇ ଥାନାରେ ଅଭିଯୋଗ ହେଉନଥିବାରୁ, କେହି ଦୃଷ୍ଟି ଦେଉନଥିବା କହିଛନ୍ତି ଶିଶୁ ଅଧିକାର କର୍ମୀ  ।  ଧର୍ମ ଆଳରେ ପ୍ରତିବର୍ଷ ଏଭଳି ହଜାର ହଜାର କୁନି କୁନି ପିଲା ଉଭୟ ମାନସିକ ଓ ଶାରିରୀକ ନିର୍ଯାତନାର ଶିକାର ହେଉଛନ୍ତି ।  କିନ୍ତୁ ଏସମ୍ପର୍କରେ କେଉଁଠି ବି ମାମଲା ହେଉନାହିଁ ।  ସରାକର ଏଦିଗରେ ଦୃଷ୍ଟି ଦେବାକୁ ଦାବି ଉଠିଛି ।