ଭାରତ-ଆମେରିକା ବାଣିଜ୍ୟ ଚୁକ୍ତିର ତଥ୍ୟ ପତ୍ରରେ ସଂଶୋଧନ କଲା ହ୍ୱାଇଟ୍ ହାଉସ୍

କନକ ବ୍ୟୁରୋ : ହ୍ୱାଇଟ୍ ହାଉସ୍ ଚୁପଚାପ୍ ଭାରତ-ଆମେରିକା ବାଣିଜ୍ୟ ଚୁକ୍ତିନାମାର ତଥ୍ୟ ପତ୍ର(ଫ୍ୟାକ୍ଟ ସିଟ୍)କୁ ସଂଶୋଧନ କରିଛି। ଏହା ପତ୍ରରୁ ଡାଲିର ଉଲ୍ଲେଖକୁ ହଟାଇ ଦିଆଯାଇଛି। ଭାରତର ପ୍ରସ୍ତାବିତ ୫୦୦ ବିଲିୟନ କ୍ରୟର ଶବ୍ଦକୁ ମଧ୍ୟ ପରିବର୍ତ୍ତନ କରାଯାଇଛି। ଆମେରିକାରୁ କ୍ରୟ କରିବାକୁ ଭାରତ ପ୍ରତିଶ୍ରୁତିବଦ୍ଧ ଶବ୍ଦକୁ ହଟାଇ ଏହା ସ୍ଥାନରେ ଆଗ୍ରହ ପ୍ରକାଶ କରିଥିବା ଶବ୍ଦର ପ୍ରୟୋଗ କରାଯାଇଛି। ସୋମବାର ମୂଳ ସଂସ୍କରଣ ସାର୍ବଜନୀନ ହେବା ପରେ ପ୍ରକାଶିତ ଅପଡେଟ୍ ତଥ୍ୟ ପତ୍ରରେ କୃଷି ଉତ୍ପାଦ ତାଲିକାରୁ କିଛି ନିର୍ଦ୍ଦିଷ୍ଟ ଡାଲିକୁ ବାଦ୍ ଦିଆଯାଇଛି। ଉତ୍ପାଦ କ୍ରୟ ତାଲିକାରୁ କୃଷି ଶବ୍ଦକୁ ମଧ୍ୟ ହଟାଇ ଦିଆଯାଇଛି ।

ସଂଶୋଧିତ ତଥ୍ୟ ପତ୍ର

ହ୍ୱାଇଟ୍ ହାଉସ୍ ବାଣିଜ୍ୟ ଚୁକ୍ତି ଉପରେ ଏକ ତଥ୍ୟ ପତ୍ର ଜାରି କରିଛି, ଯେଉଁଥିରେ ଚୁକ୍ତିର ପ୍ରମୁଖ ସର୍ତ୍ତାବଳୀ ଉଲ୍ଲେଖ କରାଯାଇଛି, ଯେଉଁଥିରେ ଭାରତ ସମସ୍ତ ଆମେରିକୀୟ ଶିଳ୍ପ ସାମଗ୍ରୀ ଓ ଶୁଖିଲା ଡିଷ୍ଟିଲର୍ସର ଶସ୍ୟ, ଲାଲ ଜୋଆର, ବିଭିନ୍ନ ପ୍ରକାର ବାଦାମ, କିଛି ଡାଲି, ସୋୟାବିନ୍ ତେଲ, ମଦ ଓ ସ୍ପିରିଟ୍ ସମେତ ବିଭିନ୍ନ ଆମେରିକୀୟ ଖାଦ୍ୟ ତଥା କୃଷି ଉତ୍ପାଦ ଉପରେ ଶୁଳ୍କ ଉଚ୍ଛେଦ କିମ୍ବା ହ୍ରାସ କରିବ ।

ଅଧିକ ପଢ଼ନ୍ତୁ---ଆମେରିକା ଉପରେ ଅସନ୍ତୋଷ ପ୍ରକାଶ କଲେ ଖ୍ବାଜା ଆସିଫ୍‌

ଭାରତ ଅଧିକ ଆମେରିକୀୟ ଉତ୍ପାଦ କିଣିବା ତଥା ଶକ୍ତି, ସୂଚନା ଓ ଯୋଗାଯୋଗ ପ୍ରଯୁକ୍ତିବିଦ୍ୟା, କୃଷି, କୋଇଲା ଓ ଅନ୍ୟାନ୍ୟ କ୍ଷେତ୍ରରେ ୫୦୦ ବିଲିୟନ ଆମେରିକୀୟ ଡଲାରରୁ ଅଧିକ ମୂଲ୍ୟର ଆମେରିକୀୟ ଉତ୍ପାଦ କ୍ରୟ କରିବାକୁ ମଧ୍ୟ ପ୍ରତିଶ୍ରୁତିବଦ୍ଧ ହୋଇଥିବା ଏଥିରେ ଦର୍ଶାଯାଇଛି । ଏଥିରେ ଉଲ୍ଲେଖ କରାଯାଇଛି, ବିଶ୍ୱର ଯେକୌଣସି ପ୍ରମୁଖ ଅର୍ଥନୀତି ତୁଳନାରେ ଆମେରିକା ଉପରେ ଭାରତ ସର୍ବାଧିକ ଶୁଳ୍କ ବଜାୟ ରଖିଛି। କୃଷି ଉତ୍ପାଦ ଉପରେ ହାରାହାରି ୩୭ ପ୍ରତିଶତ ପର୍ଯ୍ୟନ୍ତ ଶୁଳ୍କ ଓ କିଛି ଯାନବାହନ ଉପରେ ୧୦୦ ପ୍ରତିଶତରୁ ଅଧିକ ଶୁଳ୍କ ଲଗାଉଛି। ଭାରତ ମଧ୍ୟ ଅତ୍ୟନ୍ତ ସୁରକ୍ଷାବାଦୀ ଅଣ-ଶୁଳ୍କ ପ୍ରତିବନ୍ଧକ ଲଗାଇବାର ଇତିହାସ ରହିଛି। ଯାହା ଦ୍ବାରା ଭାରତ ଅନେକ ଆମେରିକୀୟ ରପ୍ତାନିକୁ ପ୍ରତିବନ୍ଧିତ କରିଛି ।

ଭାରତ ଡାଲି ଜାତୀୟ ଫସଲର ବିଶ୍ୱର ସର୍ବବୃହତ ଉତ୍ପାଦନକାରୀ। ଡାଲି ଜାତୀୟ ଫସଳ ମଧ୍ୟରେ ମସୁର, ଚଣା ଓ ଶୁଖିଲା ବିନ୍ସ ଅନ୍ତର୍ଭୁକ୍ତ। ଭାରତରେ ଡାଲି ଏକ ରାଜନୈତିକ ଦୃଷ୍ଟିକୋଣରୁ ସମ୍ବେଦନଶୀଳ କ୍ଷେତ୍ର। ଏହାର ଅପସାରଣ ଭାରତ ପାଇଁ ସମସ୍ୟା ସୃଷ୍ଟି କରିବ । ହ୍ୱାଇଟ୍ ହାଉସ୍ ଭାରତ ଡିଜିଟାଲ୍ ସେବା ଟିକସ ହଟାଇବ ବୋଲି ଦାବିକୁ ମଧ୍ୟ ହଟାଇ ଦେଇଛି। ସଂଶୋଧିତ ସଂସ୍କରଣରେ କେବଳ ଭାରତ ଡିଜିଟାଲ୍ ବାଣିଜ୍ୟ ନିୟମ ଉପରେ ଆଲୋଚନା କରିବାକୁ ପ୍ରତିଶ୍ରୁତିବଦ୍ଧ ବୋଲି କୁହାଯାଇଛି। ଭାରତ ପୂର୍ବରୁ ୧ ଏପ୍ରିଲ ୨୦୨୫ରୁ ଆର୍ଥିକ ବିଲ୍ ୨୦୨୫ ମାଧ୍ୟମରେ ଡିଜିଟାଲ୍ ବିଜ୍ଞାପନ ସେବା ଉପରେ ୬% ଶୁଳ୍କ ହଟାଇ ଦେଇଛି । ବାଣିଜ୍ୟ ଢାଞ୍ଚା ଘୋଷଣା ହେବାର ପ୍ରାୟ ୧୦ ମାସ ପୂର୍ବରୁ ଏହା ହୋଇଛି ।

ତଥ୍ୟ ପତ୍ର ଅନୁଯାୟୀ, ଆଗାମୀ ସପ୍ତାହଗୁଡ଼ିକରେ, ଆମେରିକା ଓ ଭାରତ ଏହି ଢାଞ୍ଚାର କାର୍ଯ୍ୟାନ୍ୱୟନକୁ ତ୍ୱରାନ୍ୱିତ କରିବେ। ଆମେରିକୀୟ କର୍ମଚାରୀ ତଥା ବ୍ୟବସାୟ ପାଇଁ ଲାଭ ସୁନିଶ୍ଚିତ କରିବା ଉଦ୍ଦେଶ୍ୟରେ ଏକ ପାରସ୍ପରିକ ଲାଭଦାୟକ ଦ୍ୱିପାକ୍ଷିକ ବାଣିଜ୍ୟ ଚୁକ୍ତିନାମା ଚୂଡ଼ାନ୍ତ କରିବା ପାଇଁ ମଧ୍ୟବର୍ତ୍ତୀକାଳୀନ ଚୁକ୍ତି ଉପରେ କାର୍ଯ୍ୟ କରିବେ।
ଏଥିରେ ଉଲ୍ଲେଖ କରାଯାଇଛି, ଭାରତ ପ୍ରାଥମିକତା କ୍ଷେତ୍ରଗୁଡ଼ିକରେ ଦ୍ୱିପାକ୍ଷିକ ବାଣିଜ୍ୟକୁ ପ୍ରଭାବିତ କରୁଥିବା ଅଣ-ଶୁଳ୍କ ପ୍ରତିବନ୍ଧକଗୁଡ଼ିକୁ ଦୂର କରିବ। ଆମେରିକା ଓ ଭାରତ ଉଭୟ ଦେଶ ମୁଖ୍ୟତଃ ସହମତି ଭିତ୍ତିକ ଲାଭ ପ୍ରଦାନ କରିବା ନିଶ୍ଚିତ କରିବା ପାଇଁ ମୂଳ ନିୟମ ଉପରେ ଆଲୋଚନା କରିବେ। ତଥ୍ୟ ପତ୍ରରେ ହୋଇଥିବା ସଂଶୋଧନ ସମ୍ପର୍କରେ ହ୍ୱାଇଟ୍ ହାଉସ୍ ପକ୍ଷରୁ କୌଣସି ସ୍ପଷ୍ଟୀକରଣ ଦିଆଯାଇ ନାହିଁ।

ସୂଚନାଯୋଗ୍ୟ, ମଙ୍ଗଳବାର କଂଗ୍ରେସ ଚୁକ୍ତିରେ ଡାଲିକୁ ସାମିଲ କରିବା ନେଇ ସରକାରଙ୍କୁ ଟାର୍ଗେଟ କରିଥିଲା। ଦଳର ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ କହିଥିଲେ, ଫେବ୍ରୂଆରି ୯ ତାରିଖରେ ପ୍ରକାଶିତ ନୂତନ ହ୍ୱାଇଟ୍ ହାଉସ୍ ଫ୍ୟାକ୍ଟ ସିଟ୍‌ରେ ଡାଲିକୁ ଚୁପଚାପ୍ ଯୋଡାଯାଇଛି। ଏହା ୬ ଫେବ୍ରୁଆରିରେ ଜାରି ହୋଇଥିବା ଭାରତ-ଆମେରିକା ମିଳିତ ବିବୃତିର ଅଂଶ ନଥିଲା ।