ଇରାନ ସହ ସାଉଦି ଆରବର ଡବଲ ଗେମ୍: ବନ୍ଧୁପଣିଆ ଦେଖାଇ ଟ୍ରମ୍ପଙ୍କ ସହ ମିଳାଇଲା ହାତ

କନକ ବ୍ୟୁରୋ:  ଇରାନକୁ ନେଇ ମଧ୍ୟପ୍ରାଚ୍ୟରେ ବଢୁଥିବା ଉତ୍ତେଜନା ମଧ୍ୟରେ, ସାଉଦି ଆରବର ଭୂମିକା ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି । କ୍ରାଉନ ପ୍ରିନ୍ସ ମହମ୍ମଦ ବିନ୍ ସଲମାନ ଇରାନର ସାର୍ବଭୌମତ୍ୱକୁ ସମ୍ମାନ ଦେଇ ସମ୍ଭାବ୍ୟ ସାମରିକ କାର୍ଯ୍ୟାନୁଷ୍ଠାନକୁ ଖୋଲାଖୋଲି ବିରୋଧ କରୁଥିବା ବେଳେ, ସାଉଦି ପ୍ରତିରକ୍ଷା ମନ୍ତ୍ରୀ ଓ ତାଙ୍କ ଭାଇ ପ୍ରିନ୍ସ ଖାଲିଦ ବିନ୍ ସଲମାନ ଆମେରିକାକୁ ଏକ ସମ୍ପୂର୍ଣ୍ଣ ଭିନ୍ନ ବାର୍ତ୍ତା ପଠାଉଛନ୍ତି । ଏକ ରିପୋର୍ଟ ଅନୁଯାୟୀ, ଖାଲିଦ ବିନ୍ ସଲମାନ ଆମେରିକାରେ ଏକ ରୁଦ୍ଧଦ୍ୱାର ବୈଠକରେ କହିଥିଲେ ଯେ, ଯଦି ଆମେରିକା ଇରାନ ଉପରେ ଆକ୍ରମଣ ନକରେ, ତେବେ ଇରାନ ଶାସନ ଆହୁରି ଶକ୍ତିଶାଳୀ ହେବେ । ଏହି ବିବୃତି ସାଉଦି ଆରବର ସାର୍ବଜନୀନ ଦୃଷ୍ଟିକୋଣ ସହିତ ମେଳ ଖାଉନାହିଁ । କାରଣ ସାଉଦି ଆରବ ଗତ କିଛି ସପ୍ତାହ ଧରି ଲଗାତାର ଭାବରେ କହିଆସିଛି ଯେ, ଆମେ ଇରାନ ସହିତ ଉତ୍ତେଜନା ଚାହୁଁନାହୁଁ ।

ଇରାନ ସହିତ ଡବଲ ଗେମ୍ ଖେଳୁଛି କି ସାଉଦି ଆରବ
ଇରାନ ରାଷ୍ଟ୍ରପତିଙ୍କ ସହ ସମ୍ପ୍ରତି ହୋଇଥିବା ଆଲୋଚନାରେ ମହମ୍ମଦ ବିନ୍ ସଲମାନ ସ୍ପଷ୍ଟ କରିଥିଲେ ଯେ, ସାଉଦି ଆରବ ଇରାନ ବିରୋଧରେ ଆକ୍ରମଣ ପାଇଁ ନିଜର ଆକାଶ ସୀମା ବ୍ୟବହାର କରିବାକୁ ଦେବ ନାହିଁ । ସାଉଦି ସରକାର ଏହା ମଧ୍ୟ କହିଥିଲେ, ଆମେ ଇରାନର ସାର୍ବଭୌମତ୍ୱକୁ ସମ୍ମାନ କରୁ ଓ ଏକ କୂଟନୈତିକ ସମାଧାନ ଚାହୁଁଛୁ । ଏହି ସମୟରେ, ଆମେରିକାରେ ଖାଲିଦ ବିନ୍ ସଲମାନଙ୍କ ବିବୃତି ଏହି ନୀତି ଉପରେ ପ୍ରଶ୍ନ ଉଠାଇଛି । ରିପୋର୍ଟ ଅନୁଯାୟୀ, ଖାଲିଦ ବିନ୍ ସଲମାନ ଆମେରିକୀୟ ଅଧିକାରୀ ଓ ଥିଙ୍କଟ୍ୟାଙ୍କ ବିଶେଷଜ୍ଞମାନଙ୍କୁ କହିଛନ୍ତି ଯେ, ଯଦି ଟ୍ରମ୍ପ ତାଙ୍କର ବାରମ୍ବାର ଧମକରୁ ଓହରି ଯାଆନ୍ତି, ତେବେ ଏହା ଇରାନକୁ ଲାଭ ଦେବ । ସେ କହିଛନ୍ତି, ଯେକୌଣସି ଆକ୍ରମଣ ସମଗ୍ର ଅଞ୍ଚଳର ପରିସ୍ଥିତିକୁ ଆହୁରି ଖରାପ କରିପାରେ, କିନ୍ତୁ ଯଦି ଆମେରିକା ଏବେ କାର୍ଯ୍ୟାନୁଷ୍ଠାନ ଗ୍ରହଣ ନ କରେ, ତେବେ ଇରାନ ଏହାକୁ ଏକ ବିଜୟ ବୋଲି ବିବେଚନା କରିବ । ଖାଲିଦ ବିନ୍ ସଲମାନ ଆମେରିକାର ରଣନୀତିକୁ ପ୍ରଭାବିତ କରିବା ପାଇଁ ଅନେକ ଗୁରୁତ୍ୱପୂର୍ଣ୍ଣ ବୈଠକରେ ଯୋଗ ଦେଇଥିଲେ ।

ଅଧିକ ପଢନ୍ତୁ: ମଧ୍ୟପ୍ରାଚ୍ୟ ଆକାଶରେ ପୁଣି ଯୁଦ୍ଧର କଳା ବାଦଲ : ଆମେରିକା-ଇରାନ ମଧ୍ୟରେ ବଢ଼ିଲା ଯୁଦ୍ଧ ଆଶଙ୍କା

ବାଧ୍ୟବାଧକତା ଦ୍ୱାରା ପରିଚାଳିତ ସାଉଦି
ବିଶେଷଜ୍ଞମାନଙ୍କ ଅନୁସାରେ ସାଉଦି ଆରବର ରଣନୀତି ଏବେ ବାଧ୍ୟବାଧକତା ଦ୍ୱାରା ପରିଚାଳିତ ହୋଇପାରେ। ପୂର୍ବରୁ, ସାଉଦି ଅଧିକାରୀମାନେ ଆମେରିକାକୁ ଆକ୍ରମଣ ଏଡାଇବାକୁ ଅନୁରୋଧ କରିଥିଲେ,କିନ୍ତୁ ବର୍ତ୍ତମାନ ଟ୍ରମ୍ପ ପ୍ରଶାସନ ଉପସାଗରରେ ନିଜର ସାମରିକ ଉପସ୍ଥିତି ବୃଦ୍ଧି କରିଥିବାରୁ, ସାଉଦି ନେତୃତ୍ୱ ଆକ୍ରମଣର ସମ୍ଭାବନାକୁ ଗ୍ରହଣ କରିଥିବା ପରି ମନେ ହେଉଛି। ସାଉଦି ଆରବ ସାର୍ବଜନୀନ ଭାବରେ ଶାନ୍ତି ପାଇଁ ସମର୍ଥନ କରି ବନ୍ଦ ଦ୍ୱାର ପଛରେ ଆମେରିକାର କାର୍ଯ୍ୟକୁ ସମର୍ଥନ କରୁଥିବା ବିଶେଷଜ୍ଞ ମତପୋଷଣ କରୁଛନ୍ତି ।

ଇରାନକୁ ଏକ ଆଞ୍ଚଳିକ ଶକ୍ତି ହେଉ ଚାହୁଁନି ସାଉଦି
ଉପସାଗରୀୟ ଦେଶଗୁଡ଼ିକର ଅଧିକାରୀମାନେ ଏହି ଉତ୍ତେଜନାକୁ ଗମ୍ଭୀର ଭାବରେ ଦେଖୁଛନ୍ତି। ସେମାନଙ୍କ ଅନୁସାରେ ଆମେରିକାର ଆକ୍ରମଣ ସମଗ୍ର ଅଞ୍ଚଳରେ ଅସ୍ଥିରତା ସୃଷ୍ଟି କରିପାରେ। କିନ୍ତୁ ଆକ୍ରମଣ ନ କରିବା ଦ୍ୱାରା ଇରାନ ମଜବୁତ ହେବ। ସାଉଦି ଆରବ ସତର୍କ ରହିଛି, ସିଧାସଳଖ ମୁକାବିଲାକୁ ଏଡ଼ାଇ ଯାଉଛି, କିନ୍ତୁ ଇରାନକୁ ଏକ ଆଞ୍ଚଳିକ ଶକ୍ତି ହେବାକୁ ମଧ୍ୟ ଚାହୁଁନାହିଁ ।