ବଜେଟରେ କେଉଁ ବିଭାଗକୁ ମିଳିବ କେତେ ଟଙ୍କା ? ଓଡ଼ିଶାକୁ ମିଳିପାରେ କି ଅଧିକ ଅନୁଦାନ

କନକବ୍ୟୁରୋ : ମୋଦୀ ସରକାରଙ୍କ ତୃତୀୟ ପାଳିର ପ୍ରଥମ ବଜେଟ। ଆଉ ମାତ୍ର କିଛି ସମୟ ପରେ ଆସିବ ପୂର୍ଣ୍ଣାଙ୍ଗ ବଜେଟ୍। ଦିନ ୧୧ଟା ବେଳେ ସଂସଦରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ୨୦୨୫-୨୬ ଆର୍ଥିକ ବର୍ଷ ପାଇଁ ବଜେଟ୍ ଉପସ୍ଥାପନ କରିବେ। ବଜେଟରେ କାହାକୁ କ’ଣ ମିଳିବ? ମଧ୍ୟବିତ୍ତଙ୍କ ଉପରେ ଟିକସ ବୋଝ କମିବ ନା ନିମ୍ନ ଆୟ ବର୍ଗଙ୍କ ପାଇଁ କ'ଣ ବିଶେଷ ରହିବ ?  ସାଧାରଣ ଲୋକଙ୍କଠାରୁ ଆରମ୍ଭ କରି କର୍ପୋରେଟ ଜଗତ ପର୍ଯ୍ୟନ୍ତ ଏନେଇ ଉତ୍ସୁକତାର ସହ ଅପେକ୍ଷା କରିଛନ୍ତି। ବଜେଟରେ ମହଙ୍ଗା ନିୟନ୍ତ୍ରଣ ନେଇ ଆସିବ ବଡ଼ ପଦକ୍ଷେପ। ସରକାର ମୁଦ୍ରାସ୍ଫୀତି ଓ ଟିକସ କ୍ଷେତ୍ରରେ ଲୋକଙ୍କ ପାଇଁ ବଡ଼ ଘୋଷଣା କରିପାରନ୍ତି। ସବୁଠାରୁ ବଡ ଉପହାର ସ୍ବରୂପ ଟିକସ ରିହାତି ଆକାରରେ ମିଳିବାର ସମ୍ଭାବନା ରହିଛି ।

ବଜେଟ୍‌  ହେଉଛି ଦେଶର ଗୋଟିଏ ବର୍ଷରେ ଆୟ ଏବଂ ବ୍ୟୟର  ହିସାବ ଦେଶକୁ ଚଳେଇ ବିଶ୍ୱରେ ଏକ ବିକଶିତ ରାଷ୍ଟ୍ର  ଭାବରେ ପ୍ରତିଷ୍ଠିତ କରିବା ପାଇଁ ସରକାରଙ୍କୁ ଆବଶ୍ୟକ  ହୋଇଥାଏ ପ୍ରଚୁର ଅର୍ଥ  । ଭାରତୀୟ ସମ୍ବିଧାନ ଧାରା  ୧୧୪(୩) ଅନୁସାରେ ସଂସଦର ବିନାନୁମତିରେ  ସରକାର ଗୋଟିଏ ପଇସା ମଧ୍ୟ ଖର୍ଚ୍ଚ କରିପାରନ୍ତି  ନାହିଁ । ତେଣୁ ସମ୍ବିଧାନ ଧାରା ୧୧୨ ଅନୁସାରେ ପ୍ରତିବର୍ଷ  ସଂସଦରେ ବଜେଟ୍‌ ଉପସ୍ଥାପନ ଏବଂ ଅନୁମୋଦନର  ନିୟମ ରହିଛି ।

ଗୋଟିଏ ବର୍ଷରେ ସରକାରଙ୍କର  ସମୁଦାୟ ଆୟ ଏବଂ ସମୁଦାୟ ବ୍ୟୟକୁ ଯଦି ଗୋଟିଏ  ଗୋଟିଏ ଟଙ୍କା ଧରାଯାଏ ତାହେଲେ ସେ ଟଙ୍କା କେଉଁ  ସ୍ରୋତରୁ ଆସିବ ଏବଂ କେଉଁ ବାବଦର ଖର୍ଚ୍ଚ ହେବ  ତାହାର ବିବରଣୀ ହିଁ ବଜେଟ୍‌ ।  ଯେହେତୁ ବଜେଟ୍‌ ବ୍ୟକ୍ତିଗତ ଆୟ ଠାରୁ ଆରମ୍ଭ  କରି ଦେଶର ଆୟ ଏବଂ ବ୍ୟୟ ଦେଖାଏ, ଏହା ସାଧାରଣ  ଲୋକ, କର୍ପୋରେଟ ଜଗତ, ବଡ଼ ଓ ସାନ ଦୋକାନୀ  ଏବଂ କ୍ଷୁଦ୍ର ବ୍ୟବସାୟୀଙ୍କୁ ପ୍ରଭାବିତ  କରେ ।  ତେଣୁ ବଜେଟରୁ ଦେଶବାସୀ  ବହୁତ କିଛି ଆଶା କରନ୍ତି । ୨୦୨୫- ୨୬ ବଜେଟରୁ ସାଧାରଣ ଲୋକ ଓ  ଅର୍ଥନୈତିକ ବିଶାରଦ ଯାହା ଆଶା କରନ୍ତି  ତାହା ଆଲୋଚନା ସାପେକ୍ଷ ।

ବଜେଟ୍‌  ଉପରେ ସବୁଠୁ ବେଶୀ ଆଶା ଥାଏ  ଆୟକର ଦାତାଙ୍କର । ଦେଶରେ ଦରଦାମ  ବୃଦ୍ଧି, ଉଚ୍ଚ ସୁଧହାର, ବିନିର୍ମାଣ କ୍ଷେତ୍ରରେ  ଉତ୍ପାଦନ ହ୍ରାସ ଏବଂ ପ୍ରତିକୂଳ  ବୈଶ୍ୱିକ ପରିସ୍ଥିତି ଯୋଗୁଁ  ଦେଶର ଅଭିବୃଦ୍ଧି ହାର ହ୍ରାସ ଯୋଗୁଁ ସାଧାରଣ ଲୋକ  ବିଶେଷ କରି ମଧ୍ୟବିତ୍ତ ଶ୍ରେଣୀ ହାତରେ  ଅର୍ଥ କମ୍‌  ।  ତେଣୁ କ୍ରୟଶକ୍ତି ଓ କିଣାକିଣି କମ୍‌ ।  ଚାହିଦା କମ୍‌ ହେଲେ  ଯୋଗାଣ କମ୍‌ ହେବ । ଉତ୍ପାଦନ ହ୍ରାସ ସ୍ୱାଭାବିକ ।  ସରକାର ଏଥିପ୍ରତି ଯତ୍ନବାନ ହୋଇ କର ହାରରେ ହ୍ରାସ  ଓ ଉତ୍ପାଦନ ବୃଦ୍ଧି ପାଇଁ ବ୍ୟବସ୍ଥା କରିପାରନ୍ତି  ।