କେଉଁଠି ଲୁଚିଛି ବିକାଶ ? ଗାଁଠୁ ସହର କୁଆଡ଼େ ଦେଖାଯାଉନାହିଁ

କନକ ବ୍ୟୁରୋ : ଗାଁରୁ ସହର ଏବେ ଗୋଟିଏ ଅଭିଯୋଗ ହୋଇପାରୁନି ବିକାଶ କାମ । କେଉଁଠି ନିମ୍ନମାନର କାମ ହେଉଛି ତ ଆଉ କେଉଁଠି ଟେଣ୍ଡର ହେଉନି । ଅଧିକାଂଶ ସ୍ଥାନରେ ଟଙ୍କା ମଞ୍ଜୁର ହୋଇଥିଲେ ବି କାମ ଆରମ୍ଭ ହେଉନାହିଁ । ଯାହାକୁ ନେଇ ବିଜେପି ଉପରେ ବର୍ଷିଛି ବିଜେଡି । ସାମ୍ନାକୁ ଆସିଛି ମାହାଙ୍ଗାର ସମସ୍ୟା । ମାହାଙ୍ଗା ଉମର ପଞ୍ଚାୟତର ଗ୍ରାମ୍ୟ ଉନ୍ନୟନ ରାସ୍ତାରେ ନିମ୍ନମାନର କାମ ଅଭିଯୋଗ ହୋଇଛି । ରାସ୍ତାରୁ ପିଚୁ ଉଠିଯାଉଛି । ସେହିଭଳି ନିଶ୍ଚିନ୍ତକୋଇଲି ବ୍ଲକ ରାମକୃଷ୍ଣପୁରରେ ଗ୍ରାମ୍ୟ ଉନ୍ନୟନ ରାସ୍ତାରେ ନିର୍ମାଣ ହୋଇଥିବା ଗାର୍ଡୱାଲ ୫ ଦିନରେ ଭାଙ୍ଗିଯାଇଛି । ନିର୍ମାଣର ଅଳ୍ପ ଦିନ ମଧ୍ୟରେ ତରତ ଶାସନ ସହଦେବପୁର ପୂର୍ତ୍ତବିଭାଗ ରାସ୍ତାର ନିର୍ମାଣାଧୀନ ଢଳେଇ ହାତ ମାରୁ ମାରୁ ଭାଙ୍ଗିଯାଇଛି । ସେହିଭଳି ବ୍ୟାସନଗର ପୌର ପରିଷଦରେ ଆନ୍ଦୋଳନକୁ ଓହ୍ଲାଇଛନ୍ତି କଂଗ୍ରେସ ଓ ବିଜେଡି କାଉନସିଲର । ସେମାନଙ୍କ ଅଭିଯୋଗ ହେଲା କାଉନସିଲ ବୈଠକରେ ରିଜୋଲ୍ୟୁସନ ପାସ୍‌ ହୋଇଥିଲେ ବି ଉନ୍ନୟନମୂଳକ କାମ ହେଉନାହିଁ । ତେଣୁ ଶୀଘ୍ର ଟେଣ୍ଡର୍‌ ଡକାଯାଉ ।

ବିକାଶ କାମକୁ ରୋକୁଛି କିଏ?
କେବେ ଗଠନ ହେବ ଜିଲ୍ଲା ଯୋଜନା ବୋର୍ଡ?

ମାହାଙ୍ଗା ଓ ବ୍ୟାସନଗର ହେଉଛି ଦୁଇଟି ଉଦାହରଣ ମାତ୍ର । ରାଜ୍ୟର ବିଭିନ୍ନ ସ୍ଥାନରୁ ଏଭଳି ମାଳ ମାଳ ଅଭିଯୋଗ ଆସିଛି । ଗାଁ ଗାଁରେ ବିକାଶ ଠପ୍‌ ହୋଇଯାଇଛି । କେଉଁଠି କାର୍ଯ୍ୟାଦେଶ ହୋଇଥିଲେ ବି କାମ ଆରମ୍ଭ ହୋଇପାରୁନାହିଁ ତ ଆଉ କେଉଁଠି ନୂଆ ଟେଣ୍ଡର ହେଉନି । ଯାହାକୁ ନେଇ ମୁହାଁମୁହିଁ ହୋଇଛି ବିଜେଡି-ବିଜେପି । ନୂଆ ସରକାର ଆସିବା ପରେ ବର୍ତ୍ତମାନ ସୁଦ୍ଧା ରାଜ୍ୟ କିମ୍ବା ଜିଲ୍ଲା ଯୋଜନା ବୋର୍ଡ ଗଠନ ହୋଇନାହିଁ । ତେଣୁ ବିକାଶ କାମ ଆଗେଇ ପାରୁନି। ଆଉ ଏହାକୁ ପ୍ରସଙ୍ଗ କରି ସରକାରଙ୍କୁ ଘେରୁଛନ୍ତି ବିରୋଧୀ ।