ଭକ୍ତିରେ ଭାଙ୍ଗିଯାଇଛି ପାଚେରି ; ସେପଟୁ ଭକ୍ତଙ୍କୁ ଚାହିଁଛନ୍ତି କାଳିଆ ସାଆନ୍ତେ

କନକ ବ୍ୟୁରୋ: ପାଚେରିର ଏ ଫାଙ୍କ ଦେଖିବାକୁ ଅତି ସାଧାରଣ । କିନ୍ତୁ ସେଇ ଫାଙ୍କ ମଧ୍ୟରୁ ଯେଉଁ ଦୁଇଟି ଆଖି ନିରବରେ ଝଲମଲ କରୁଛି, ସେ ଆଖି ଦୁଇଟି ସାରା ସଂସାରର ଦୁଃଖ କଷ୍ଟ ବୁଝୁଥିବା ଦୁଇଟି ଦୁର୍ଲଭ ଆଖି । କାରଣ ଏ ହେଉଛନ୍ତି ଆମ ଆରାଧ୍ୟ, ଆମ ଆତ୍ମା, ଆମ ନିଶ୍ବାସର ଅନ୍ୟ ନାଁ ବୋଲାଉଥିବା ମହାପ୍ରଭୁ ଜଗନ୍ନାଥଙ୍କ ଚକାଆଖି । ଯିଏ ସର୍ବବ୍ୟାପ୍ତ ତାଙ୍କୁ କିଏ ବା ଏ ପାଚେରି ଭିତରେ ବନ୍ଦ କରିପାରିବ? ସେଥିପାଇଁ ତ ଛୋଟିଏ ବିନ୍ଦୁର ବାଟ କାଢ଼ି ଦେଖୁନ କେମିତ କାଳିଆ ଆମକୁ କଣେଇ କଣେଇ ଚାହୁଁଛି । ଆଉ ଭକ୍ତଙ୍କୁ ବିକଳ ହୋଇ ଖୋଜୁଛି । ଲାଗୁଛି ଯେମିତି କାଳିଆ ପାଚେରି ସେପଟୁ ଭକ୍ତଙ୍କୁ କେମିତି ଅଛ ବୋଲି ପଚାରୁଛି ? ଦାରୁଦିଅଁ ବୋଲି ଚୁପ ରହିଲେ ବି ସବୁ ଦୁଃଖକୁ ପଢ଼ି ନେଉଛି । ସେଇ ବାଙ୍କ ଚାହାଣିରେ ଭରି ରହିଛି ଅପାର କରୁଣା, ଅସୀମ ଧୈର୍ଯ୍ୟ ଆଉ ଅମାପ ଭଲପାଇବା ।

ଏ ସ୍ବାର୍ଥପର ଦୁନିଆରେ ଆମେ ଅନେକ ପାଚେରି ତିଆରି କରିଦେଇଛୁ । ଧର୍ମର, ଜାତିର, ଅହଂକାରର, ଲୋଭର । ଆମେ ଭାବୁଛୁ ଏସବୁ ପାଚେରି ଆମକୁ ସୁରକ୍ଷା ଦେବ । କିନ୍ତୁ ମହାପ୍ରଭୁଙ୍କ ଏଇ ଗୋଟିଏ ଝଲକ ସେ ପାଚେରି ସବୁ ଭାଙ୍ଗିବାକୁ ଯଥେଷ୍ଟ । ସେଥିପାଇଁ ସେ ପାଚେରି ଫାଙ୍କରୁ ଦେଖି ଆମକୁ ଡ କହୁଛନ୍ତି ତୁମେ ଯଦି ମୋତେ ଥରେ ଡାକିବ ମୁଁ ତୁମ ପାଖକୁ ହଜାର ଥର ଦୌଡ଼ି ଆସିବି । ଏ ମନ୍ଦିର ଭିତରେ ସିନା ସେ ଚୁପଚାପ ବସିଛି କିନ୍ତୁ ତା ଦୁଇ ଆଖି ଆମକୁ କହୁଛି... ମଣିଷ ଭାବେ ତୁ ଭୁଲ କରିଛୁ କିନ୍ତୁ ଆଦୌ ଭୟ କରନି, ହାରିଯାଇଛୁ ଯଦି ଆଶା ଛାଡ଼େନି । ଯଦି ତୋତେ ସମସ୍ତେ ଛାଡ଼ିଦିଅନ୍ତି ତେବେ ତୋ ପାଇଁ ମୁଁ ଅଛି । ତୋ ଭକ୍ତିଭାବରେ ଭିଜାଇବାକୁ ବଡ଼ ଦେଉଳ ନୁହେଁ ତୋ ମନକୁ ହିଁ ମନ୍ଦିର କରିଦେ । 

ଏ ଖବର କେନ୍ଦୁଝରର ପ୍ରସିଦ୍ଧ ସିଦ୍ଧ ଜଗନ୍ନାଥ ମନ୍ଦିରର । ରାଜ ରଜୁଡ଼ା ଅମଳରରୁ ତିଆରି ଏହି ମନ୍ଦିରର ଏକ ବିଶେଷତ୍ବ ରହିଛି । ଏହି ମନ୍ଦିରରେ କେବଳ ଜଗନ୍ନାଥଙ୍କ ମୂର୍ତ୍ତି ରହିଛି । ଆଉ ଗରୁଡ଼ ସ୍ତମ୍ଭ ବଦଳରେ ରହିଛି ସିଦ୍ଧ ହନୁମାନଙ୍କ ସ୍ତମ୍ଭ । ମନ୍ଦିରର ମୁଖ୍ୟ ଦ୍ଵାର ବନ୍ଦ ରହିଥିଲେ ବି ମହାପ୍ରଭୁଙ୍କ ଦର୍ଶନ ଏହି ପାଚେରି ଫାଙ୍କରୁ କରି ହେଉଛି । ଆଉ ଯାହାକୁ ଦେଖି ଭାବୁକ ହୋଇପଡ଼ୁଛନ୍ତି ଭକ୍ତ ।