କନକ ବ୍ୟୁରୋ : ପଶ୍ଚିମବଙ୍ଗର ରାଜନୀତିରେ ଉଷ୍ମତା ବୃଦ୍ଧି ପାଇଛି । ଟିଏମ୍‌ସି ପକ୍ଷରୁ ଆୟୋଜିତ ବାର୍ଷିକ 'ଶହୀଦ ଦିବସ' ରାଲିକୁ ନେଇ ଶାସକ ଓ ବିରୋଧୀ ବିଜେପି ମଧ୍ୟରେ ବାକ୍‌ଯୁଦ୍ଧ ତେଜିଛି । ୧୯୯୩ ମସିହାରେ ପୁଲିସ ଗୁଳିରେ ପ୍ରାଣ ହରାଇଥିଲେ ୧୩ ଜଣ ଯୁବ କଂଗ୍ରେସ କର୍ମୀ । ସେମାନଙ୍କ ସ୍ମୃତିରେ ଏହି ରାଲି ପ୍ରତିବର୍ଷ ଜୁଲାଇ ୨୧ ତାରିଖରେ ପାଳନ କରାଯାଏ । ସେତେବେଳେ ମମତା ବାନାର୍ଜୀ ଯୁବ କଂଗ୍ରେସର ନେତ୍ରୀ ଥିଲେ । ବର୍ତ୍ତମାନ ଏହି ରାଲି ଟିଏ୍‌ମସିର ସବୁଠାରୁ ବଡ଼ ରାଜନୈତିକ କାର୍ଯ୍ୟକ୍ରମ ପାଲଟିଛି ଏବଂ ଏହାକୁ ୨୦୨୬ ବିଧାନସଭା ନିର୍ବାଚନ ପାଇଁ ଦଳର ପ୍ରଚାର ଅଭିଯାନର ଶୁଭାରମ୍ଭ ବୋଲି କୁହାଯାଉଛି ।  

Advertisment

ଚଳିତ ବର୍ଷର ରାଲିରେ ମୁଖ୍ୟମନ୍ତ୍ରୀ ମମତା ବାନାର୍ଜୀ 'ବଙ୍ଗୀୟ ଗର୍ବ' ବା "ବେଙ୍ଗଲୀ ଅସ୍ମିତା"କୁ ମୁଖ୍ୟ ପ୍ରସଙ୍ଗ କରିଛନ୍ତି । ସେ ଅଭିଯୋଗ କରିଛନ୍ତି ଯେ ବିଜେପି ଶାସିତ ରାଜ୍ୟଗୁଡ଼ିକରେ ବଙ୍ଗୀୟ ଭାଷାଭାଷୀ ପ୍ରବାସୀ ଶ୍ରମିକମାନଙ୍କୁ ଚିହ୍ନଟ କରାଯାଇ ସେମାନଙ୍କୁ ହଇରାଣ କରାଯାଉଛି । ବେଆଇନ ଅନୁପ୍ରବେଶକାରୀ କହି ଆକ୍ଷେପ କରାଯାଉଛି । ଏହାକୁ "ଭାଷାଗତ ଭେଦଭାବ" ବୋଲି କହି ମମତା ବିଜେପିକୁ ତୀବ୍ର ସମାଲୋଚନା କରିଛନ୍ତି । ରାଲିରେ ଲକ୍ଷ ଲକ୍ଷ ସମର୍ଥକଙ୍କୁ ସମ୍ବୋଧିତ କରି ସେ କହିଛନ୍ତି ଯେ "ବଙ୍ଗାଳୀ ହେବା ଏବେ ବିଜେପି ଶାସିତ ରାଜ୍ୟରେ ଏକ ଅପରାଧ ପାଲଟିଛି । ସେମାନେ ଭାବୁଛନ୍ତି ପ୍ରତ୍ୟେକ ବଙ୍ଗାଳୀ ବାଂଲାଦେଶର । ଆମେ ଏହି ଅପମାନ ସହିବୁ ନାହିଁ।" ଟିଏମ୍‌ସିର ଏହି ରଣନୀତିକୁ ୨୦୨୧ ବିଧାନସଭା ନିର୍ବାଚନରେ ବିଜେପିର ହିନ୍ଦୁତ୍ୱ ଲହରକୁ ପ୍ରତିହତ କରିବାରେ ସାହାଯ୍ୟ କରିଥିବା "ବଙ୍ଗୀୟ ପରିଚୟ" ପ୍ରସଙ୍ଗର ପୁନରାବୃତ୍ତି ବୋଲି ଦେଖାଯାଉଛି । ଏହି ରାଲିରେ ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବ ମଧ୍ୟ ଯୋଗ ଦେଇଥିଲେ । କେନ୍ଦ୍ରରେ ଥିବା ବିଜେପି ସରକାର ଅସ୍ଥିର ଏବଂ ଖୁବ୍ ଶୀଘ୍ର ଭାଙ୍ଗିଯିବ ବୋଲି ଦାବି ମଧ୍ୟ କରିଥିଲେ ।

ବିଜେପିର ପାଲଟା ଆକ୍ରମଣ

ଅନ୍ୟପଟେ, ବିଜେପି ଟିଏମ୍‌ସିର ଏହି ଅଭିଯୋଗକୁ ରାଜନୈତିକ ଉଦ୍ଦେଶ୍ୟପ୍ରଣୋଦିତ ବୋଲି କହି ଖଣ୍ଡନ କରିଛି । ବିଜେପି କହିଛି ଯେ ମମତା ବାନାର୍ଜୀ ଅନୁପ୍ରବେଶକାରୀମାନଙ୍କୁ ସୁରକ୍ଷା ଦେବା ପାଇଁ ଏବଂ ବେଙ୍ଗଲର ପରିଚୟକୁ ନେଇ ରାଜନୀତି କରୁଛନ୍ତି । ବିଜେପି ନେତାମାନେ ଅଭିଯୋଗ କରିଛନ୍ତି ଯେ ଟିଏମ୍‌ସି ସରକାର ନାଗରିକତା ଏବଂ ଭୋଟ୍‌ର ଡକ୍ୟୁମେଣ୍ଟେସନ୍‌କୁ ସୁବ୍ୟବସ୍ଥିତ କରିବାରେ ବିଫଳ ହୋଇଥିବାରୁ ଏହି ଦ୍ୱନ୍ଦ୍ୱ ସୃଷ୍ଟି ହୋଇଛି ।

ଏହି ପ୍ରସଙ୍ଗରେ ବିଜେପିର ପଶ୍ଚିମବଙ୍ଗ ସହ-ପ୍ରଭାରୀ ଅମିତ ମାଲବୀୟ ଏକ କଟାକ୍ଷ କରି କହିଛନ୍ତି, "ମମତା ବାନାର୍ଜୀ ୨୧ ଜୁଲାଇରେ ଶହୀଦ ଦିବସ ପାଳନ କରୁଛନ୍ତି । କିନ୍ତୁ ପଶ୍ଚିମବଙ୍ଗର ଲୋକମାନେ ୨୦୨୬ରେ ତାଙ୍କୁ ରାଜନୈତିକ ଭାବେ 'ଶହୀଦ' କରିଦେବେ ।" ଏହି ଏହା ଆଗାମୀ ବିଧାନସଭା ନିର୍ବାଚନକୁ ନେଇ ରାଜନୈତିକ ମାହୋଲକୁ ଆହୁରି ସରଗରମ କରିଦେଇଛି ।