ପଶ୍ଚିମବଙ୍ଗ କୋର୍ଟଙ୍କ ଐତିହାସିକ ରାୟ, 'ଡିଜିଟାଲ୍ ଆରେଷ୍ଟ' ମାମଲାରେ ୯ ଜଣଙ୍କୁ ଆଜୀବନ କାରାଦଣ୍ଡ

କନକ ବ୍ୟୁରୋ:  ସାଇବର ଅପରାଧ ବିରୋଧରେ ଏକ ଯୁଗାନ୍ତକାରୀ ରାୟ ପ୍ରକାଶ କରିଛନ୍ତି  ପଶ୍ଚିମବଙ୍ଗର  କୋର୍ଟ ।  'ଡିଜିଟାଲ୍ ଆରେଷ୍ଟ' ମାଧ୍ୟମରେ ଠକେଇ କରିଥିବା ଏକ ଗ୍ୟାଙ୍ଗର ୯ ଜଣ ସଦସ୍ୟଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି କୋର୍ଟ । ଦେଶରେ 'ଡିଜିଟାଲ୍ ଆରେଷ୍ଟ' ମାମଲାରେ ଏହା ପ୍ରଥମ ଦୋଷୀ ସାବ୍ୟସ୍ତ ଏବଂ ଦଣ୍ଡବିଧାନ ବୋଲି କୁହାଯାଉଛି, ଯାହା ଏହି ପ୍ରକାରର ଅତ୍ୟାଧୁନିକ ଅପରାଧକୁ ରୋକିବା ଦିଗରେ ଏକ ମାଇଲଖୁଣ୍ଟ ସାବ୍ୟସ୍ତ ହୋଇଛି । ନଦିଆ ଜିଲ୍ଲାର କଲ୍ୟାଣୀ କୋର୍ଟ ଶୁକ୍ରବାର ଦିନ ଏହି ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି । ଏହି ମାମଲାରେ ଜଣେ ଅବସରପ୍ରାପ୍ତ କୃଷି ବୈଜ୍ଞାନିକଙ୍କୁ ଟାର୍ଗେଟ କରାଯାଇ ତାଙ୍କଠାରୁ ପ୍ରାୟ ୧ କୋଟି ଟଙ୍କା ଠକି ନିଆଯାଇଥିଲା।  ଅଦାଲତ ସରକାରୀ ଓକିଲଙ୍କ ଯୁକ୍ତିକୁ ଗ୍ରହଣ କରି ଏହି ଅପରାଧକୁ "ଆର୍ଥିକ ଆତଙ୍କବାଦ" ବୋଲି ଅଭିହିତ କରିଛନ୍ତି । 

କ'ଣ ଏହି 'ଡିଜିଟାଲ୍ ଆରେଷ୍ଟ' ଠକେଇ?
'ଡିଜିଟାଲ୍ ଆରେଷ୍ଟ' ହେଉଛି ଏକ ଅତ୍ୟାଧୁନିକ ସାଇବର ଠକେଇ । ଏଥିରେ ଅପରାଧୀମାନେ ନିଜକୁ ପୁଲିସ୍, ସିବିଆଇ କିମ୍ବା ଅନ୍ୟ କୌଣସି ଆଇନ ପ୍ରଣୟନକାରୀ ସଂସ୍ଥାର ଅଧିକାରୀ ଭାବରେ ପରିଚୟ ଦିଅନ୍ତି । ସେମାନେ ପୀଡିତଙ୍କୁ ଭିଡିଓ କଲ୍ କରି କୌଣସି ଏକ ସାଂଘାତିକ ଅପରାଧରେ, ଯେପରିକି ମନି ଲଣ୍ଡରିଂରେ ସମ୍ପୃକ୍ତ ଥିବା ନେଇ ମିଥ୍ୟା ଅଭିଯୋଗ କରନ୍ତି ।  ନିଜ କଥାକୁ ସତ ବୋଲି ପ୍ରମାଣିତ କରିବା ପାଇଁ ସେମାନେ ନକଲି ଗିରଫ ପରୱାନା, ପରିଚୟ ପତ୍ର ଏବଂ ଅନ୍ୟାନ୍ୟ ଜାଲ୍ କାଗଜପତ୍ର ଦେଖାନ୍ତି।  ଏହାପରେ ପୀଡିତଙ୍କୁ ମାନସିକ ଚାପରେ ରଖି ଘରୁ ବାହାରିବାକୁ ବା କାହା ସହିତ ଯୋଗାଯୋଗ କରିବାକୁ ବାରଣ କରନ୍ତି, ଯାହାକୁ ସେମାନେ 'ଡିଜିଟାଲ୍ ଗିରଫ' ବୋଲି କୁହନ୍ତି । ପରେ ମାମଲା ରଫାଦଫା କରିବା ନାଁରେ ମୋଟା ଅଙ୍କର ଟଙ୍କା ବିଭିନ୍ନ ବ୍ୟାଙ୍କ ଆକାଉଣ୍ଟକୁ ପଠାଇବାକୁ ବାଧ୍ୟ କରାଯାଏ ।  

ଗତ ବର୍ଷ ଅକ୍ଟୋବର ମାସରେ ଘଟିଥିବା ଏହି ଘଟଣାରେ ରାଣାଘାଟ ଅଞ୍ଚଳର ଜଣେ ୭୦ ବର୍ଷୀୟ ଅବସରପ୍ରାପ୍ତ ବୈଜ୍ଞାନିକ ଏହି ଠକେଇର ଶିକାର ହୋଇଥିଲେ ।  ନଭେମ୍ବର ୬, ୨୦୨୪ ରେ ସେ ପୋଲିସରେ ଅଭିଯୋଗ କରିଥିଲେ ।  ଠକମାନେ ନିଜକୁ ମୁମ୍ବାଇର ଅନ୍ଧେରୀ ପୋଲିସ ଷ୍ଟେସନର ସବ-ଇନ୍ସପେକ୍ଟର ବୋଲି ପରିଚୟ ଦେଇ ତାଙ୍କୁ ହ୍ଵାଟ୍ସଆପ୍‌ରେ କଲ୍ କରିଥିଲେ ଏବଂ ଏକ ଆର୍ଥିକ ଠକେଇରେ ଫସାଇ ଦେବାର ଧମକ ଦେଇଥିଲେ ।   ସେମାନେ ବୈଜ୍ଞାନିକଙ୍କୁ ପ୍ରାୟ ୭ ଦିନ ଧରି 'ଡିଜିଟାଲ୍ ଆରେଷ୍ଟ'ରେ ରଖି ତାଙ୍କଠାରୁ ପାଖାପାଖି ୧ କୋଟି ଟଙ୍କା ଠକି ନେଇଥିଲେ ।  

ପୋଲିସର ତଦନ୍ତ ଓ କୋର୍ଟଙ୍କ ରାୟ
ଅଭିଯୋଗ ପାଇବା ପରେ ପୋଲିସ ତଦନ୍ତ ଆରମ୍ଭ କରି ଏକ ବଡ଼ ଅନ୍ତଃରାଜ୍ୟ ଗ୍ୟାଙ୍ଗକୁ ଠାବ କରିଥିଲା । ପୋଲିସ ମହାରାଷ୍ଟ୍ର, ବିହାର, ଝାଡଖଣ୍ଡ, ଗୁଜୁରାଟ ଏବଂ ପଶ୍ଚିମବଙ୍ଗର ବିଭିନ୍ନ ସ୍ଥାନରେ ଚଢ଼ାଉ କରି ୯ ଜଣଙ୍କୁ ଗିରଫ କରିଥିଲା । ପୋଲିସ ତଦନ୍ତକାରୀ ଦଳ ଘଟଣାର ୮ ମାସ ମଧ୍ୟରେ ୨,୬୦୦ ପୃଷ୍ଠାର ଚାର୍ଜସିଟ୍ ଦାଖଲ କରିଥିଲା, ଯାହା ଏକ ରେକର୍ଡ ଅଟେ ।