ହ୍ବାଟ୍ସଆପରେ ଆସିଲା ବିବାହ କାର୍ଡ : ଲିଙ୍କ୍ ଖୋଲିବାରୁ ଉଡ଼ିଗଲା ୨ ଲକ୍ଷ

କନକ ବ୍ୟୁରୋ : ଆଜିର ସମୟରେ ଲୋକଙ୍କ ପାଖରେ କିଛି ଥାଉ କି ନଥାଉ କିନ୍ତୁ ହାତରେ ଖଣ୍ଡିଏ ମୋବାଇଲ୍ ନିହାତି ଥିବ । ସମୟ ହିଁ ସେମିତି ହୋଇଗଲାଣି ସ୍ମାର୍ଟଫୋନ୍ ନ ଧରିଲେ କିଛି କାମ ହୋଇପାରୁନି । କେବେ କେବଳ କଥାବାର୍ତ୍ତା ପାଇଁ ବ୍ୟବହାର ହେଉଥିବା ସ୍ମାର୍ଟଫୋନ୍ ଏବେ କିଣାକିଣି କରିବାଠାରୁ ଆରମ୍ଭ କରି ଫଟୋ ଉଠାଇବା ପାଇଁ ମଧ୍ୟ ଦରକାର ପଡୁଛି । ଫୋନରେ ଥିବା ଅନେକ ଆପ୍ ସବୁ ସୁବିଧା ଉପଲବ୍ଧ କରାଇ ଦେଉଛି । ହ୍ବାଟ୍ସଆପ୍ , ଫେସବୁକ୍ , ଇନଷ୍ଟାଗ୍ରାମ୍ , ଫୋନ୍ ପେ ଆପ୍ ର ଆବଶ୍ୟକତା ସବୁବେଳେ ଦରକାର ପଡ଼ିଥାଏ । କିନ୍ତୁ ଏହି ଆପ୍ ଜରିଆରେ ମଧ୍ୟ ଠକ ଲୋକଙ୍କୁ ଠକାମୀର ଶିକାର ବନାଇଥା’ନ୍ତି । ବର୍ତ୍ତମାନ ସମୟରେ ସାଇବର୍ କ୍ରାଇମର ଠକେଇ ବିଷୟରେ ଆପଣ ପ୍ରତିଦିନ ଶୁଣୁଥିବେ । ହ୍ବାଟ୍ସଆପରେ ମଧ୍ୟ ଲିଙ୍କ୍ ପଠାଇ ଅନେକ ଲୋକ ଠକାମୀର ଶିକାର ହୋଇଛନ୍ତି । କିନ୍ତୁ ବର୍ତ୍ତମାନ ବିବାହ କାର୍ଡ ପଠାଇ ୨ ଲକ୍ଷ ଟଙ୍କା ଠକିଦେବା ଖବର ସମସ୍ତଙ୍କୁ ବିଚଳିତ କରିଛି । 

ଆଧୁନିକ ସମୟରେ ଡିଜିଟାଲ୍ ୱେଡିଂ କାର୍ଡର ସିଜନ୍ ଚାଲିଛି । ଲୋକ ବିବାହ କାର୍ଡ ନ କରି ଡିଜିଟାଲ୍ ୱେଡିଂ କାର୍ଡ କରିବାକୁ ପସନ୍ଦ କରୁଛନ୍ତି । ମହାରାଷ୍ଟ୍ରର ହିଙ୍ଗୋଲୀ ଜିଲ୍ଲାରେ ଜଣେ ସରକାରୀ କର୍ମଚାରୀଙ୍କ ପାଖକୁ ଏମିତି ହିଁ ଏକ ବିବାହ କାର୍ଡ ଆସିଥିଲା କିନ୍ତୁ ହ୍ବାଟ୍ସଆପରେ । ସାଧାରଣ ଡିଜିଟାଲ୍ ୱେଡିଂ କାର୍ଡ ଦେଖି ବ୍ୟକ୍ତିଜଣକ ଲିଙ୍କ୍ ଖୋଲିଦେଇଥିଲେ ଯାହା (.apk)ର ଗୋଟିଏ ଫାଇଲ୍ ଥିଲା । ଚାହୁଁ ଚାହୁଁ ବ୍ୟକ୍ତିଙ୍କ ଖାତାରୁ ୨ ଲକ୍ଷ ଟଙ୍କା ଉଡ଼ିଗଲା । ପୀଡ଼ିତ ବ୍ୟକ୍ତିଜଣକ ସୋସିଆଲ୍ ମିଡିଆରେ ପୋଷ୍ଟ୍ କରି ନିଜ ସହ ହୋଇଥିବା ଠକେଇକୁ ନେଇ ୟୁଜର୍ସଙ୍କୁ ସଚେତନ କରିଥିଲେ । ସେ କହିଥିଲେ ତାଙ୍କୁ ଅଜଣା ନମ୍ବରରୁ ମେସେଜ୍ ଆସି ଏକ ଡିଜିଟାଲ୍ ୱେଡିଂ କାର୍ଡ ଆସିଲା । କାର୍ଡ ଖୋଲିଲା ବେଳକୁ ଫୋନରେ ଏକ ମାଲୱେୟାର୍ ଇନଷ୍ଟଲ୍ ହୋଇଯାଇଥିଲା ଏବଂ ମାତ୍ର କିଛି ମିନିଟ୍ ଭିତରେ ୨ ଲକ୍ଷ ଟଙ୍କା ଖାତାରୁ ଉଡ଼ିଗଲା । ଏଭଳି ଘଟଣା କେବଳ ଜଣେ ବ୍ୟକ୍ତିଙ୍କ ପାଇଁ କ୍ଷତିକାରକ ସାବ୍ୟସ୍ତ ହୋଇଛି ତାହା ନୁହେଁ । ବର୍ତ୍ତମାନ ସମସ୍ତେ ହ୍ବାଟ୍ସଆପର ବ୍ୟବହାର କରୁଛନ୍ତି ଏବଂ ପ୍ରାୟତଃ ଲୋକ ଡିଜିଟାଲ୍ ୱେଡିଂ କାର୍ଡକୁ ଓପନ୍ କରୁଛନ୍ତି । ହେଲେ ଏଭଳି ଘଟଣା ଘଟିବ ବୋଲି କେହିବି ବିଶ୍ବାସ କରିନଥିବେ । 

ଆଜିର ସମୟରେ ସାଇବର୍ ଅପରାଧୀ ଏତେ ସ୍ମାର୍ଟ ତରିକା ଆପଣାଉଛନ୍ତି ଯେ ସାଧାରଣ ଲୋକଟିର ଝାଳବୁହା ଧନ ଚୁଟକିରେ ଉଡ଼ିଯାଉଛି । କେବେ ବିବାହ କାର୍ଡ , କେବେ ଅଫର୍ ତ କେବେ ଅଫିସିଆଲ୍ ନୋଟିସ୍ ହୋଇ ସ୍କାମର ଜାଲ ବୁଣୁଛନ୍ତି ସାଇବର୍ ଠକ । ଏଭଳି ସ୍ଥିତିରେ ଅସାବଧାନତା ଅବଲମ୍ବନ କଲେ ସର୍ବସ୍ବାନ୍ତ ହେବା ସୁନିଶ୍ଚିତ । ତେଣୁ କିଛି ବି ଲିଙ୍କ୍ ଉପରେ କ୍ଲିକ୍ କରିବା ପୂର୍ବରୁ ଏହାର ସତ୍ୟତା ଜାଣିରଖନ୍ତୁ କିମ୍ବା ଅଜଣା ନମ୍ବରରେ ଲିଙ୍କ୍ ଖୋଲିବାର ଭୁଲ୍ କରନ୍ତୁ ନାହିଁ ।