କନକ ବ୍ୟୁରୋ : କେଇ ମୁହୂର୍ତ୍ତର ଖୁସି ପାଇଁ ଜୀବନକୁ ବାଜିରେ ଲଗାଉଛନ୍ତି ଯୁବବର୍ଗ । ଜଳପ୍ରପାତରେ ଦୁଃସାହସ ଦେଖାଇ କିଏ ଜୀବନ ହାରୁଛି ତ ପୁଣି କିଏ ମାସ ମାସ ଧରି ନିଖୋଜ ଅଛି । ଗତ ଗୋଟିଏ ମାସର ୪ ଅଘଟଣ, ଜଳପ୍ରପାତର ସୁରକ୍ଷାକୁ ନେଇ ବଡ଼ ପ୍ରଶ୍ନଚିହ୍ନ ଛିଡ଼ା କରିଛି ।

Advertisment

କେନ୍ଦୁଝର ଓ ଅନୁଗୁଳ ଜିଲ୍ଲା ସୀମାନ୍ତ ଦୁର୍ଗମ ନଗୀରା ଗର୍ଜନ ଖଲ ଜଳପ୍ରପାତ । ଏହାର ସୌନ୍ଦର୍ଯ୍ୟ ୩ ବନ୍ଧୁଙ୍କୁ ନିଜ ଆଡ଼କୁ ଟାଣି ଆଣିଥିଲା । ଜଳପ୍ରପାତ ଭିତରେ ଗାଧୁଆ ସହ ଚାଲିଥିଲା ହସ ମଜା । କିନ୍ତୁ ହଠାତ୍ ସବୁକିଛି ଓଲଟପାଲଟ ହୋଇଯାଇଥିଲା । ୩ ବନ୍ଧୁଙ୍କ ହସଖୁସିରେ ଯେମିତି କାହାର ନଜର ଲାଗିଯାଇଥିଲା । ଜଳପ୍ରପାତରେ ଗାଧୋଉଥିବା ବେଳେ ଭାସିଗଲେ ବାଲରାଇ ଗାଁର ଲିପୁନ୍ କୁମାର ବେହେରା । ଗଭୀର ଜଳପ୍ରପାତ ଭିତରେ ଲିପୁନଙ୍କୁ ଖୋଜି ନିରାଶ ହୋଇଥିଲେ ଅନ୍ୟ ୨ ସାଙ୍ଗ । ପରେ ଖବର ପାଇ ବାଂଶପାଳ ଦମକଳ ବାହିନୀ ଓ ବମ୍ପ୍ରଡ଼ା ଓଡ୍ରାଫ୍‌ ଟିମ୍‌ ଖୋଜାଖୋଜି କରିଥିଲେ । ହେଲେ ଏଯାଏଁ ଲିପୁନଙ୍କର ପତ୍ତା ମିଳିନି । ପୁଲିସ ଘଟଣାସ୍ଥଳରେ ପହଞ୍ଚି ତନାଘନା ଆରମ୍ଭ କରିଛି ।

କେବଳ ଏହି ଗୋଟିଏ ଘଟଣା ନୁହେଁ ଗତ ଗୋଟିଏ ମାସ ଭିତରେ ଜଳପ୍ରପାତରେ ୪ଟି ଅଘଟଣ ସାମ୍ନାକୁ ଆସିଲାଣି । କିଏ ନିଖୋଜ ହେଉଛି ତ ପୁଣି କାହାର ଜୀବନ ଯାଉଛି ? ସତେ ଯେମିତି ଜଳପ୍ରପାତରେ ଛକି ରହିଛି ଯମ । ଜୁଲାଇ ୨୬, ସମ୍ବଲପୁର ଦେବଝରଣ ଜଳପ୍ରପାତରେ ଭାସିଯାଇ ୨ ଡାକ୍ତରୀ ଛାତ୍ରଛାତ୍ରୀଙ୍କ ମୃତ୍ୟୁ ହୋଇଥିଲା । ଅଗଷ୍ଟ ୨୩, କୋରାପୁଟ ଡୁଡ଼ୁମା ଜଳପ୍ରପାତରେ ଭିଡିଓ ସୁଟିଂ କରୁଥିବା ବେଳେ ବ୍ରହ୍ମପୁରର ସାଗର ଟୁଡୁ ଭାସିଯାଇ ନିଖୋଜ ହୋଇଥିଲେ । ସେହିପରି ଅଗଷ୍ଟ ୨୩, ସୁକିନ୍ଦା କୋଇଲୋ ଝରଣାରେ ଗାଧୋଉଥିବା ବେଳେ ଭାସିଯାଇ ଜଣେ ମୃତ, ଜଣେ ନିଖୋଜ ଥିଲେ  । ଯୁବବର୍ଗ ପହଁରା ନଜାଣି ମଧ୍ୟ ଜଳପ୍ରପାତ ଭିତରକୁ ପଶୁଛନ୍ତି । ଦୁର୍ଗମ ଅଞ୍ଚଳରେ ଥିବା ଜଳପ୍ରପାତକୁ ନଯିବାକୁ ବାରଣ କରିଛନ୍ତି ଅଗ୍ନିଶମ ଅଧିକାରୀ ।

ଜଳପ୍ରପାତରେ ବାରମ୍ବାର ଅଘଟଣ ପରେ ମଧ୍ୟ ଚେତୁନାହାନ୍ତି ଯୁବବର୍ଗ । ସେଲଫି ନିଶା କାହାକୁ ମୃତ୍ୟୁ ମୁହଁକୁ ଠେଲି ଦେଉଛି ତ ପୁଣି କିଏ ଜଳପ୍ରପାତର ବିପଦପୂର୍ଣ୍ଣ ସ୍ଥାନକୁ ଯାଇ ମୃତ୍ୟୁକୁ ଆମନ୍ତ୍ରଣ କରୁଛି । ହେଲେ ପ୍ରଶ୍ନ ଉଠୁଛି, ବାରମ୍ବାର ଅଘଟଣ ପରେ ମଧ୍ୟ ଜଳପ୍ରପାତ ନିକଟରେ କାହିଁକି ପ୍ରଶାସନ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରୁନି ?