ପର୍ଯ୍ୟଟକଙ୍କୁ ଗଜପତି ଜିଲ୍ଲାର ଜଳପ୍ରପାତ ମନା: ପାହାଡ଼ରେ ଅତ୍ୟଧିକ ବର୍ଷା ଯୋଗୁଁ ବଢୁଛି ଜଳସ୍ତର

କନକ ବ୍ୟୁରୋ: ପର୍ଯ୍ୟଟକଙ୍କୁ ଜଳପ୍ରପାତ ମନା । ଲଗାଣ ବର୍ଷାରେ ଗଜପତି ଜିଲ୍ଲାର ଅବସ୍ଥା ବେହାଲ୍ ହୋଇଯାଇଛି । ଉପରମୁଣ୍ଡରେ ଏବଂ ପାହାଡ଼ ଉପରେ ଅତ୍ୟଧିକ ବର୍ଷା ଯୋଗୁଁ ଜଳପ୍ରପାତ ଗୁଡ଼ିକରେ ଜଳସ୍ତର ବଢିଯାଇଛି । ତେଣୁ ପର୍ଯ୍ୟଟକଙ୍କୁ ଜଳପ୍ରପାତ ଭିତରକୁ ଯିବାକୁ ବାରଣ କରିଛି ଗଜପତି ଜିଲ୍ଲା ପ୍ରଶାସନ । ଏ ସମ୍ପର୍କରେ ଗଜପତି ଜିଲ୍ଲା ପର୍ଯ୍ୟଟନ ଅଧିକାରୀ ଚିଠି ଲେଖିଛନ୍ତି । ସୁରକ୍ଷା ଦୃଷ୍ଟିରୁ ପର୍ଯ୍ୟଟନ ବିଭାଗ ଏଭଳି ନିଷ୍ପତ୍ତି ନେଇଛି । ଗଜପତି ଏସପି, ପାରଳାଖେମୁଣ୍ଡି ବନଖଣ୍ଡ ଅଧିକାରୀ ଏବଂ ଜିଲ୍ଲାର ସମସ୍ତ ବିଡିଓଙ୍କୁ ଏନେଇ ଚିଠି କରାଯାଇଛି । 

ସେପଟେ ଗାଧୋଇବା ବେଳେ ଜଳପ୍ରପାତରେ ବୁଡ଼ିଗଲେ ଯୁବକ । କେନ୍ଦୁଝର ଜିଲ୍ଲା ଗୁଣ୍ଡିଚାଘାଗି ଜଳପ୍ରପାତରେ ଯୁବକ ନିଖୋଜ ହୋଇଛନ୍ତି । ଯୁବକ ଜଣଙ୍କ ହେଲେ ହରିଚନ୍ଦନପୁର ଥାନା ଦଲକି ଗାଁର ସତ୍ୟପ୍ରକାଶ ମହାନ୍ତ । ସେ ସାଙ୍ଗମାନଙ୍କ ସହ ଗାଧୋଉଥିବା ବେଳେ ତାଙ୍କ ଗୋଡ଼ ଖସିଯାଇଥିଲା । ମାସେ ଭିତରେ ଏହା ଦ୍ଵିତୀୟ ଘଟଣା। ପୂର୍ବରୁ ଆଉ ଜଣେ ଯୁବକ ନିଖୋଜ ହୋଇଥିଲେ ।