କମୁଛି ପାଣି, ବଢୁଛି ଦୁର୍ଦ୍ଦଶା ; ତଳିଆ ଅଞ୍ଚଳରୁ ପାଣି ନିଷ୍କାସନ ପାଇଁ ଲାଗିବ ସମୟ

କନକ ବ୍ୟୁରୋ : ରାଜ୍ୟର ୭ଟି ଜିଲ୍ଲାରେ ସୃଷ୍ଟି ହୋଇଛି ବନ୍ୟା ପରିସ୍ଥିତି । ବାଲେଶ୍ବର, ଯାଜପୁର, ଭଦ୍ରକ, କେନ୍ଦୁଝର, ମୟୂରଭଞ୍ଜ, ଦେବଗଡ଼, ସୁନ୍ଦରଗଡ଼ ଜିଲ୍ଲାର ଅନେକ ବ୍ଲକ ଜଳବନ୍ଦୀ ହୋଇଯାଇଛି । ତଳିଆ ଅଞ୍ଚଳରେ ପାଣି ପଶି ଲୋକ ହନ୍ତସନ୍ତ ହେଉଛନ୍ତି । ଜୀବନ ଜୀବିକା ସବୁ କିଛି ପ୍ରଭାବିତ ହୋଇଛି । କାହା ଘର ବୁଡ଼ିଯାଇଛି ତ ଆଉ କାହାର ଫସଲ ଉଜୁଡ଼ିଯାଇଛି । ଅଣ୍ଟାଏ ପାଣିରେ ପଶି ଲୋକ ଯାତୟାତ କରୁଛନ୍ତି । ବିଦ୍ୟାଳୟରେ ପାଣି ପଶିବାରୁ ପିଲା ପାଠ ପଢ଼ିବାକୁ ଯାଇପାରୁନାହାନ୍ତି । ଚିକିତ୍ସା ପାଇଁ ରୋଗୀଙ୍କୁ ଖଟିଆ କି ଭାରରେ ବୁହା ହେଉଥିବାର ଦୃଶ୍ୟ ବି ଦେଖିବାକୁ ମିଳୁଛି । କେବେ ପାଣି ଛାଡ଼ିବ ଜୀବନ ବଞ୍ଚିବା ସ୍ବାଭାବିକ ହେବ ତାକୁ ଅନେଇ ବସିଛନ୍ତି ବନ୍ୟା ବିପନ୍ନ । 

ବାଲେଶ୍ବର ଜିଲ୍ଲାର ୪ଟି ବ୍ଲକ, ଭୋଗରାଇ, ବସ୍ତା, ବାଲିଆପାଳ, ଜଳେଶ୍ବରର ବିଭିନ୍ନ ଗାଁ ପାଣି ଘେରରେ ରହିଛି । ଯାଜପୁର ଜିଲ୍ଲାର ଦଶରଥପୁର, କୋରେଇ, ଯାଜପୁର ବ୍ଲକର କିଛି ଗାଁରେ ପାଣି ପଶି ଯାଇଛି । ଭଦ୍ରକ ଜିଲ୍ଲାର ଦୁଇଟି ବ୍ଲକ ପ୍ରଭାବିତ ହୋଇଛି । ଧାମନଗର ଓ ଭଣ୍ଡାରୀପୋଖରୀରେ ବନ୍ୟା ସ୍ଥିତି ଉପୁଜିଛି । ସେହିଭଳି କେନ୍ଦୁଝର ଜିଲ୍ଲାର ହାଟଡିହି, ଆନନ୍ଦପୁର, ଘଷିପୁରା ଓ ତେଲକୋଇ ବ୍ଲକ ବି ପ୍ରଭାବିତ। ମୟୂରଭଞ୍ଜ ଜିଲ୍ଲାର ସର୍ବାଧିକ ୯ଟି ବ୍ଲକର ବିଭିନ୍ନ ଗାଁରେ ପାଣି ପଶିଛି । ରାସଗୋବିନ୍ଦପୁର, ମୋରଡ଼ା, ଉଦଳା, କପ୍ତିପଦା, ବେତନଟୀ, ବଡ଼ସାହି, ଖୁଣ୍ଟା, ଗୋପବନ୍ଧୁନଗର ଓ ବାଙ୍ଗିରିପୋଷି ବ୍ଲକର ଅନେକ ଗାଁରେ ବନ୍ୟା ପାଣି ପଶିଛି । ଚାଷ ଜମି ସବୁ ବୁଡ଼ି ରହିଛି । ସେହିଭଳି ସୁନ୍ଦରଗଡ଼ ଜିଲ୍ଲାର ଲହୁଣିପଡ଼ା, କୋଇଡ଼ା ଓ ବଣାଇ ବ୍ଲକ ଏବଂ ଦେବଗଡ଼ ଜିଲ୍ଲାର ବାରକୋଟ୍ ବ୍ଲକ ମଧ୍ୟ କେତେକାଂଶରେ ପ୍ରଭାବିତ ହୋଇଛି ।