କନକ ବ୍ୟୁରୋ : ଦେଶରେ ଏବେ ଭୋଟ୍ ଚୋରି ମାମଲାକୁ ନେଇ ରାଜନୈତିକ ଉତ୍ତେଜନା ବଢ଼ିବାରେ ଲାଗିଛି । ବିରୋଧୀ ଦଳର ନେତା ରାହୁଲ ଗାନ୍ଧୀ ଭୋଟର ତାଲିକାରେ ତ୍ରୁଟିକୁ ନେଇ ଗୁରୁତର ଅଭିଯୋଗ କରିଛନ୍ତି । ଏହାକୁ ନେଇ ଆଜି ବିରୋଧୀ ସାଂସଦମାନେ ସଂସଦର ମକର ଦ୍ୱାରଠାରୁ ନିର୍ବାଚନ ଆୟୋଗଙ୍କ କାର୍ଯ୍ୟାଳୟ ପର୍ଯ୍ୟନ୍ତ ପ୍ରତିବାଦ କରୁଛନ୍ତି । ଏହି ସମୟରେ ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀଙ୍କ ସମେତ ଅନେକ ବିରୋଧୀ ସାଂସଦଙ୍କୁ ପୁଲିସ ଗିରଫ କରିଛି । ପୁଲିସ ସାଂସଦମାନଙ୍କ ପ୍ରତିବାଦକୁ ନିର୍ବାଚନ କମିସନଙ୍କ ପାଖକୁ ଯିବାକୁ ଅନୁମତି ଦେଇନଥିଲା । ଏହା ସତ୍ତ୍ୱେ ବିରୋଧୀ ସାଂସଦମାନେ ପ୍ରତିବାଦ କରୁଥିଲେ, ଯାହା ପରେ ପୁଲିସ କାର୍ଯ୍ୟାନୁଷ୍ଠାନ ନେଇଛି ।

Advertisment

ସେପଟେ ନିର୍ବାଚନ କମିସନଙ୍କ ବାହାରେ ଦିଲ୍ଲୀ ପୁଲିସ ସହିତ ପାରାମିଲିଟାରୀ ଫୋର୍ସର ଯବାନଙ୍କୁ ମୁତୟନ କରାଯାଇଛି । ବ୍ୟାରିକେଡିଂ କରି ପ୍ରତିବାଦକୁ ଅଟକାଯାଇଛି । ଅନେକ ସାଂସଦ ବ୍ୟାରିକେଡ୍ ଉପରେ ଚଢ଼ି ଡେଇଁଥିଲେ । ଅଖିଳେଶ ଯାଦବ ବ୍ୟାରିକେଡରୁ ଡେଇଁଥିଲେ । ଟିଏମସି ସାଂସଦ ସାଗରିକା ଘୋଷ ଏବଂ ମହୁଆ ମୋଇତ୍ରା ବ୍ୟାରିକେଡ୍ ଉପରେ ଚଢ଼ିଥିଲେ । ଏନେଇ ରାହୁଲ ଗାନ୍ଧୀ କହିଛନ୍ତି, ‘ସତ କଥା ହେଉଛି ସେମାନେ କିଛି କହିପାରିବେ ନାହିଁ । ଦେଶ ସାମ୍ନାରେ ସତ୍ୟ ଅଛି । ଏହା କୌଣସି ରାଜନୈତିକ ଲଢ଼େଇ ନୁହେଁ । ଏହା ସମ୍ବିଧାନ ବଞ୍ଚାଇବାର ଲଢ଼େଇ । ଏହା ଜଣେ ବ୍ୟକ୍ତି, ଗୋଟିଏ ଭୋଟର ଲଢ଼େଇ । ଆମେ ଏକ ସ୍ୱଚ୍ଛ ଭୋଟର ତାଲିକା ଚାହୁଛୁ ।’ ସେହିପରି ପ୍ରିୟଙ୍କା ଗାନ୍ଧୀ କହିଛନ୍ତି, ‘ସରକାରର ଲୋକମାନେ ଭୟଭୀତ ଅଛନ୍ତି । ଏ ସରକାର ଡରୁଆ ।’ ସେହିପରି ଜୟରାମ ରମେଶ କହିଛନ୍ତି ଯେ କେବଳ ୩୦ ନୁହେଁ ସମସ୍ତ ବିରୋଧୀ ନିର୍ବାଚନ ଆୟୋଗଙ୍କ ପାଖକୁ ଯିବେ । ଏହା ଉପରେ ଅଖିଳେଶ କହିଛନ୍ତି ଯେ ଯେତେ ଲୋକଙ୍କୁ ଛାଡ଼ିବେ ଆମେ ଯିବା ପାଇଁ ପ୍ରସ୍ତୁତ ଅଛୁ । ପୁଲିସ ଛାଡ଼ିଲେ ଆମେ ନିର୍ବାଚନ ଆୟୋଗଙ୍କ ପାଖକୁ ଯିବା ପାଇଁ ପ୍ରସ୍ତୁତ ଅଛୁ । ପୁଲିସ ଯିବାକୁ ଦେଉନାହିଁ । ପୁଲିସ ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀଙ୍କ ସମେତ ଅନେକ ସାଂସଦଙ୍କୁ ଗିରଫ କରିଛି । ସମସ୍ତଙ୍କୁ ବସରେ ବସାଇ ନେଇଯାଇଛନ୍ତି ।

ଏହା ପୂର୍ବରୁ ଆଜି ନିର୍ବାଚନ ଆୟୋଗ ବିରୋଧୀ ଦଳର ୩୦ ଜଣିଆ ପ୍ରତିନିଧି ଦଳକୁ ସାକ୍ଷାତ ପାଇଁ ଡାକିଥିଲେ । ନିର୍ବାଚନ ଆୟୋଗ ଦ୍ୱିପ୍ରହର ୧୨ ଟାରେ ସାକ୍ଷାତ କରିବା ପାଇଁ ୩୦ ଜଣ ଲୋକଙ୍କୁ ଡାକିଥିଲେ । ଭାରତ ନିର୍ବାଚନ ଆୟୋଗ ସଚିବାଳୟ କଂଗ୍ରେସ ସାଂସଦ ଜୟରାମ ରମେଶଙ୍କୁ ଚିଠି ଲେଖି ଦ୍ୱିପ୍ରହର ୧୨ ଟାରେ କଥାବାର୍ତ୍ତା ପାଇଁ ସମୟ ଦେଇଥିଲେ । ଏହା ଉପରେ ବିରୋଧୀ କହିଛନ୍ତି ଯେ ନିର୍ବାଚନ ଆୟୋଗ ସମସ୍ତେ ଯିବେ ନହେଲେ କେହି ବି ଯିବେ ନାହିଁ । ତେବେ ବର୍ତ୍ତମାନ ଭୋଟର ତାଲିକାରେ ତ୍ରୁଟିକୁ ନେଇ ସଂଗ୍ରାମ ଜାରି ରହିଛି । ରାହୁଲଙ୍କ ସମେତ ସମସ୍ତ ବିରୋଧୀ ନେତା ନିର୍ବାଚନ ଆୟୋଗ ଉପରେ ଅନେକ ପ୍ରକାରର ପ୍ରଶ୍ନ ଉଠାଉଛନ୍ତି । ରାହୁଲ ସିଧାସଳଖ ନିର୍ବାଚନ ଆୟୋଗ ଉପରେ ଭୋଟ୍ ଚୋରିର ଅଭିଯୋଗ ଲଗାଇଛନ୍ତି । ଏହାକୁ ନେଇ ଗତକାଲି ସେ ଏକ ଅଭିଯାନ ଆରମ୍ଭ କରିଛନ୍ତି । ଯେଉଁଥିପାଇଁ ରାହୁଲ ଏକ ୱେବସାଇଟ୍ ମଧ୍ୟ ଲଞ୍ଚ୍ କରିଛନ୍ତି । ଏହା ସହିତ ଲୋକମାନଙ୍କୁ ଏହି ଅଭିଯାନରେ ଯୋଡ଼ି ହେବା ପାଇଁ ଅପିଲ୍ କରିଛନ୍ତି ।