ବୁଲିବାକୁ ଯାଇ ଚାଲିଗଲା ଜୀବନ ; ଦେବଝରଣରେ ବୁଡିଗଲେ ବୁର୍ଲା ଭୀମସାରର ୨ଡାକ୍ତରୀ ଛାତ୍ରଛାତ୍ରୀ

କନକ ବ୍ୟୁରୋ : ସମ୍ବଲପୁର ଜୁଜୁମରା ଦେବଝରଣରେ ପୁଣି ଘଟିଛି ବଡ ଅଘଟଣ । ଝରଣାପାଣିରେ ଗାଧୋଇବା ଦୁଇ ଡାକ୍ତରୀ ଛାତ୍ର-ଛାତ୍ରୀଙ୍କ ପାଇଁ କାଳ ହୋଇଛି । ସାଙ୍ଗଙ୍କ ସହ ଗାଧୋଇବାବେଳେ ବୁଡ଼ି ଜଣେ ଡାକ୍ତରୀ ଛାତ୍ର ଓ ଆଉ ଜଣେ ଡାକ୍ତରୀ ଛାତ୍ରଙ୍କର ମୃତ୍ୟୁ ଘଟିଛି । ସନ୍ଦୀପ ନୂଆଦିଲ୍ଳୀର ନଜଫଗଡ଼ ଅଞ୍ଚଳର ହୋଇଥିବାବେଳେ ମୋନିକା ରାଜସ୍ଥାନର ମାଉଣ୍ଟଆବୁର । ସାଙ୍ଗମାନଙ୍କ ସହ ବୁଲି ଆସିଥିବାବେଳେ ଝରଣାରେ ବୁଡ଼ି ଉଭୟଙ୍କର ମୃତ୍ୟୁ ହୋଇଛି । ସୂଚନା ଅନୁସାରେ ବୁର୍ଲାରେ ପଢ଼ୁଥିବା ଏହି ଦୁଇ ଜଣ ଅନ୍ୟ ସାଙ୍ଗମାନଙ୍କ ସହ ଜୁଜୁମୁରା ସ୍ଥିତ ଦେବଝରଣ ଜଳପ୍ରପାତକୁ ବୁଲିବାକୁ ଆସିଥିଲେ । ପ୍ରାକୃତିକ ପରିବେଶ ମଧ୍ୟରେ କୁଳୁକୁଳୁ ଝରଣାରେ ଗାଧୋଇବେ ବୋଲି ବହୁତ ଖୁସି ଥିଲେ । ବର୍ଷାଦିନ ଯୋଗୁଁ ଏବେ ଝରଣାରେ ଜଳଧାରା ଅଧିକ ଥିବା ଏମାନେ ଜାଣିପାରି ନଥିଲେ । କୌଣସି କାରଣରୁ ସନ୍ଦୀପ ଓ ମୋନିକା ବୁଡ଼ିଯାଇଥିଲେ । ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଛନ୍ତି । 

ସମ୍ବଲପୁର ଜିଲ୍ଲାର ଅନ୍ୟତମ ଆକର୍ଷଣୀୟ ପର୍ଯ୍ୟଟନସ୍ଥଳ ହେଉଛି ଜୁଜୁମୁରା ଦେବଝରଣ ଜଳପ୍ରପାତ । ରାଜ୍ୟ ସରକାର ଏହାକୁ ପର୍ଯ୍ୟଟନ ମାନଚିତ୍ରରେ ସ୍ଥାନ ଦେଇଛନ୍ତି । ବଣଭୋଜି ପାଇଁ ଏଠାରେ ରାଜ୍ୟ ତଥା ରାଜ୍ୟ ବାହାରୁ ବହୁ ପର୍ଯ୍ୟଟକଙ୍କ ଭିଡ଼ ହୋଇଥାଏ । ସେହିସ୍ଥାନକୁ ଆଜି ବୁର୍ଲାର ୬ଡାକ୍ତରୀ ପିଲା ଯାଇଥିବାବେଳେ ଅଘଟଣ ଘଟିଛି । ସୂଚନା ପାଇଁ ପୁଲିସ ଘଟଣାସ୍ଥଳରେ ପହଁଚି ତଦନ୍ତ କରୁଛି । ଏପଟେ କୁଆଖାଇ ନଦୀରେ ଗାଧୋଇବାକୁ ଯାଇ ଏକ ଘରୋଇ ଶିକ୍ଷାନୁଷ୍ଠାନର ୪ଜଣ ଛାତ୍ର ଭାସି ଯାଇଥିଲେ । ସେମାନଙ୍କ ମଧ୍ୟରୁ ୩ଜଣ ଉଦ୍ଧାର ହୋଇଥିବାବେଳେ ଜଣଙ୍କର ମୃତ୍ୟୁ ହୋଇଛି ।