ବିଜୟ ହଜାରେ ଟ୍ରଫି : ଡେବ୍ୟୁ ମ୍ୟାଚରେ କମାଲ କଲେ ତାପସ, ୪ଓ୍ବିକେଟ ନେଇ ବନିଲେ ମ୍ୟାନ ଅଫ ଦି ମ୍ୟାଚ

କନକବ୍ୟୁରୋ :  ସୟଦ ମୁସ୍ତାକ ଅଲ୍ଲୀ ପରେ ଏବେ ଜାରି ରହିଛି ବିଜୟ ହଜାରେ ଟ୍ରଫି । ଗତକାଲିର ମ୍ୟାଚରେ ଓଡିଶା ମଣିପୁରକୁ ୯ ଓ୍ବିକେଟରେ ପରାସ୍ତ କରିଛି । ଆଉ ଏହି ମ୍ୟାଚରେ ଓଡିଶା ପକ୍ଷରୁ ଡେବ୍ୟୁ କରିଥିବା ତାପସ ଦାସଙ୍କ କମାଲ ଦେଖିବାକୁ ମିଳିଛି । ତାପସ ନିଜର ପ୍ରଥମ ମ୍ୟାଚରେ ମଣିପୁର ବିପକ୍ଷରେ ୪ ଓ୍ବିକେଟ ହାସଲ କରି ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଛନ୍ତି  । 

ଏହି ମ୍ୟାଚରେ ମଣିପୁର ପ୍ରଥମେ ବ୍ୟାଟିଂ କରିଥିଲା  । ହେଲେ ଓଡିଶା ବୋଲରଙ୍କୁ ସାମ୍ନା କରିପାରିନଥିଲେ ମଣିପୁର ବ୍ୟାଟର। ତାପସ ଓ ରାଜେଶଙ୍କ ଦୁର୍ଦ୍ଦଶ  ବୋଲିଂରେ ଧରାଶାୟୀ ହୋଇଯାଇଥିଲା ମଣିପୁର    ।   ଦଳ ପକ୍ଷରୁ ରାଜେଶ ମହାନ୍ତି ୧୪ ରନ ଦେଇ ୩   ଓ୍ବିକେଟ ନେଇଥିବା ବେଳେ ତାପସ ଦାସ ୧୭ ରନ ଦେଇ ୪ ଓ୍ବିକେଟ ହାସଲ କରିଥିଲେ  । ମଣିପୁର ୪୦ ଓଭର ଖେଳି ମାତ୍ର ୧୦୦ ରନ କରିବାରେ ସଫଳ ହୋଇ ପାରିଥିଲା   । 

୧୦୧ ରନର ବିଜୟ ଲକ୍ଷ୍ୟ ନେଇ ମୈଦାନକୁ ଓହ୍ଲାଇଥିବା ଓଡିଶା ଦଳ ୨୦ ଓଭରରେ ୧ ଓ୍ବିକେଟ ହରାଇ ବିଜୟ ଲକ୍ଷ୍ୟ ହାସଲ କରିଥିଲା ।  ଦଳ ପକ୍ଷରୁ ସ୍ବସ୍ତିକ ସାସମଲ ଅର୍ଦ୍ଧଶତକ  ହାସଲ କରିଥିଲେ  ।   ଏହି ମ୍ୟାଚରେ ତାପସ ଦାସ ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଛନ୍ତି । ତେବେ ଡେବ୍ୟୁ ମ୍ୟାଚରେ ଏଭଳି ପ୍ରଦର୍ଶନ ପରେ ଏବେ ତାପସଙ୍କ ଉପରେ ନଜର ରହିଛି  । 

ଓଡିଶା ଏହି ଟୁର୍ଣ୍ଣାମେଣ୍ଟରେ ଏବେ ଯାଏଁ ୪ମ୍ୟାଚ ଖେଳି ସାରିଛି । ୨ଟିରେ ପରାଜୟ ଲାଭ କରିଥିବା ବେଳେ ୨ଟି ମ୍ୟାଚରେ ବିଜୟୀ ହୋଇଛି ଦଳ ।