ରାଜଧାନୀରେ କଳା ପଲସର୍ ଆତଙ୍କ; ଦ୍ୱିପ୍ରହରରେ ଝାମ୍ପି ନେଲେ ସାଢେ ତିନି ଲକ୍ଷ

କନକ ବ୍ୟୁରୋ :  ଚନ୍ଦ୍ରଶେଖରପୁରର ପ୍ରଗତି ଏନକ୍ଲେଭ । ସମୟ ଦିନ ୨ଟା ବାଜି ୧୦ ମିନଟ । ପ୍ରତିମା ବେହେରା ଓ ତାଙ୍କ ଭାଇ ମୋଟର ସାଇକେଲ ଯୋଗେ ବ୍ୟାଙ୍କରୁ ଫେରୁଥିଲେ । ପ୍ଲଟ କାମ ଚାଲୁଥିବାରୁ ଫେଜ ୱାନ୍ ଏସବିଆଇ ବ୍ୟାଙ୍କରୁ ସାଢେ ୩ ଲକ୍ଷ ଟଙ୍କା ବ୍ୟାଗରେ ନେଇ ଆସୁଥିଲେ । ହଠାତ୍ କଳା ପଲସରରେ ପିଛା କରୁଥିଲେ ଲୁଟିଆ । ଦୀର୍ଘ ସମୟର ରେକି ପରେ, ପ୍ରଗତି ଏନକ୍ଲେଭ ସାମନାରେ ଭାଇ ଭାଇ ଭଉଣୀଙ୍କୁ ଘେରି ଯାଇଥିଲେ । କିଛି ବୁଝିବା ଆଗରୁ ପ୍ରତିମାଙ୍କ ଟଙ୍କା ଭର୍ତି ସ୍ଲିଙ୍ଗ ବ୍ୟାଗ୍ ଝାମ୍ପି ନେଲେ ଲୁଟେରା । ଆଉ ଆଖି ପିଛୁଳାକେ ଟଙ୍କା ବ୍ୟାଗ ଧରି ଛୁ ମାରିଲେ । କଳା ପଲସରରେ ଆସିବା ଆଉ ଲୁଟି ଫେରାର ହେବା ବେଳର ଚିତ୍ର ସିସିଟିଭିରେ କଏଦ ହୋଇଛି ।

ଅଭିଯୋଗକାରୀ ମାନେ ବ୍ୟାଙ୍କରୁ ଟଙ୍କା ଉଠାଣର ମାତ୍ର କେଇ ମିନିଟ ଭିତରେ ଲୁଟର ଶିକାର ହେଲେ । ଲୁଟେରା ମାନେ ଦୀର୍ଘ ସମୟ ଧରି ରେକି କରିବା ପରେ, ଏହି ଲୁଟରେ ସଫଳ ହୋଇ ଥାଇ ପାରନ୍ତି । କିନ୍ତୁ ଏହି ଘଟଣା ପରେ ବ୍ୟାଙ୍କ ଯାଉଥିବା ଗ୍ରାହକଙ୍କ ସୁରକ୍ଷାକୁ ନେଇ ସାଧାରଣରେ ପ୍ରଶ୍ନ ଉଠିଛି ।

ଦିନ ଦ୍ୱିପ୍ରହରରେ ରାଜଧାନୀ ଛାତିରୁ ଲୁଟ କରି ଲୁଟେରା ମାନେ କମିଶନରେଟ ପୁଲିସକୁ ଦେଇଛି ଖୋଲା ଚ୍ୟାଲେଞ୍ଜ । ଚନ୍ଦ୍ରଶେଖରପୁର ଭଳି ଏକ ବ୍ୟସ୍ତ ବହୁଳ ରାସ୍ତାରେ ଦୁର୍ବୁତ କେମିତି ଲୁଟପାଟ୍ କରି ଫେରାର ହୋଇଗଲେ ତାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି । କଳା ପଲସର ଆତଙ୍କ ଖେଳାଇ ଥିବା ଲୁଟେରାଙ୍କୁ ପୁଲିସ କେବେ କାବୁ କରୁଛି ତା ଉପରେ ସମସ୍ତଙ୍କ ନଜର ।