ଉପ-ରାଷ୍ଟ୍ରପତି ନିର୍ବାଚନ ପାଇଁ ଆରମ୍ଭ ହେଲା ପ୍ରକ୍ରିୟା ; ଖୁବ୍‌ଶୀଘ୍ର ଆସିବ ବିଧିବଦ୍ଧ ବିଜ୍ଞପ୍ତି

କନକ ବ୍ୟୁରୋ : ଉପରାଷ୍ଟ୍ରପତି ନିର୍ବାଚନ ପାଇଁ ଖୁବଶୀଘ୍ର ଜାରି ହେବ ବିଜ୍ଞପ୍ତି । ଏନେଇ ନିର୍ବାଚନ କମିସନରଙ୍କ ପକ୍ଷରୁ ପ୍ରକ୍ରିୟା ଆରମ୍ଭ ହୋଇଛି । ବିଜ୍ଞପ୍ତି ଜରିଆରେ ଖୁବ୍‌ଶୀଘ୍ର ତାରିଖ ଘୋଷଣା କରିପାରନ୍ତି ଭାରତୀୟ ନିର୍ବାଚନ ଆୟୋଗ । ନିକଟରେ ସ୍ବାସ୍ଥ୍ୟଗତ ସମସ୍ୟା କାରଣରୁ ଉପରାଷ୍ଟ୍ରପତି ପଦରୁ ଇସ୍ତଫା ଦେଇଛନ୍ତି ଜଗଦୀପ ଧନଖଡ଼ । ପରବର୍ତ୍ତୀ ଉପରାଷ୍ଟ୍ରପତି କିଏ ହେବ ତାକୁ ନେଇ ଚର୍ଚ୍ଚା ଆରମ୍ଭ ହୋଇଥିବା ବେଳେ ଖୁବଶୀଘ୍ର ନିର୍ବାଚନ ନେଇ ବିଜ୍ଞପ୍ତି ପ୍ରକାଶ ପାଇବା ସହ ତାରିଖ ଘୋଷଣା କରାଯିବ । 

ଉପରାଷ୍ଟ୍ରପତି ପଦରୁ ଧନଖଡ଼ଙ୍କ ଇସ୍ତଫା ସାମାନ୍ୟ ଦେଖାଯାଉଥିଲେ ବି ଏହା ପଛରେ ଅନେକ ରାଜନୈତିକ କାରଣ ରହିଥିବା କୁହାଯାଉଛି । ବିଶେଷ କରି ବିଜେପି ରାଷ୍ଟ୍ରୀୟ ଅଧ୍ୟକ୍ଷଙ୍କ ‘ଅପମାନିତ କରିବା ଭଳି ପଦକ୍ଷେପ’ ଯୋଗୁ ଧନଖଡ ଇସ୍ତଫା ଦେଇଥିବା ଚର୍ଚ୍ଚା । ବିହାର ନିର୍ବାଚନ ପାଇଁ ଧନଖଡଙ୍କ କାନ୍ଧରେ ବନ୍ଧୁକ ରଖି ବିଜେପି ଗୁଳି ଚଳାଇଥିବା ବି ଚର୍ଚ୍ଚା । ଧନଖଡ଼ ସମ୍ଭବତଃ ନୀତୀଶ କୁମାରଙ୍କ ପାଇଁ ପଥ ପରିଷ୍କାର କରିଛନ୍ତି । ଜେଡିୟୁ ସୁପ୍ରିମୋ ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ପରବର୍ତ୍ତୀ ଉପରାଷ୍ଟ୍ରପତି କରାଯିବା ଚର୍ଚ୍ଚା । ଏହାପରେ ବିଜେପି ରାଜ୍ୟ ବିଧାନସଭା ନିର୍ବାଚନ ଲଢ଼ିବାକୁ ଯୋଜନା କରୁଥିବା କୁହାଯାଉଛି ।