ଫେଲ୍‌ ମାରିଲା ବସୁଧା ଯୋଜନା ; ଝରଣା ପାଣି ଭରସାରେ ଗାଁ

କନକ ବ୍ୟୁରୋ : ଗାଁ ଗୁଡ଼ିକର ବିକାଶ ପାଇଁ ସରକାରଙ୍କ ରହିଛି ଅନେକ ଯୋଜନା , ଏଥି ମଧ୍ୟରୁ ବସୁଧା ଯୋଜନା ଗୋଟିଏ । ବସୁଧା ଯୋଜନାରେ ଗାଁଙ୍କୁ ବିଶୁଦ୍ଧ ପାଣି ଯୋଗାଇବା ପାଇଁ କୋଟି କୋଟି ଖର୍ଚ୍ଚ କରାଯାଉଛି । ହେଲେ ପ୍ରାଶାସନିକ ଅବହେଳା ଯୋଗୁଁ ଆଜି ବି ଅନେକ ଦୁର୍ଗମ ଗାଁରେ ପାଣି ଟୋପେ ମିଳୁନି । ଆମେ କହୁଛୁ ମାଲକାନଗିରି ଜିଲ୍ଲା କାଲିମେଳା ବ୍ଲକର ଦୁର୍ଗମ ଅଞ୍ଚଳ ଭାବେ ପରିଚିତ କାନାଗୁଡ଼ା ଗାଁ । ଏହି ଗାଁରେ ବସୁଧା ଯୋଜନା ଫେଲ ମାରିଥିବା ବେଳେ ଝରଣା ପାଣି ଭରସାରେ ଦିନ କାଟୁଛନ୍ତି ଲୋକ । 

ପାହାଡ଼ିଆ ରାସ୍ତାରେ ଗରା ଧରି ଚାଲିଛନ୍ତି ମହିଳା । ଏମିତି ୧ କିମି ଚାଲିଲେ ପଡ଼ିବ ପାହାଡ଼ । ଏହାରି ତଳେ ଝରଣାରୁ ପାଣି ନେଲେ ମେଣ୍ଟିବ ଶୋଷ । ଆଉ ପୋଖରୀ ପାଣିରେ ହେବ ବାସନକୁସନ ଧୁଆ । ଝରଣା ପାଣି କେତେ ପାନୀୟ ଉପଯୋଗୀ ତା’ ବି ଦୁର୍ଗମ ମଣିଷକୁ ଜଣାନାହିଁ । ହେଲେ କିଛି ବିକଳ୍ପ ନପାଇ ଝରଣା ଉପରେ ଭରସା କରିଛନ୍ତି କାଲିମେଳା ବ୍ଲକର କାନାଗୁଡ଼ାର ୨ଶହରୁ ଅଧିକ କୋୟା ଜନଜାତିର ଲୋକ । 

ଅଧିକ ପଢ଼ନ୍ତୁ--‘ଓଡ଼ିଶା ଉପରେ ବଢ଼ୁଛି ସୁଧ ବୋଝ’;ଅତିରିକ୍ତ ବଜେଟ୍ ପରେ ବିଜେପିକୁ ନବୀନଙ୍କ ଟାର୍ଗେଟ୍

ଗାଁରେ ଥିବା ୬ଟି ନଳକୂପରୁ ୪ଟି ଖରାପ ହୋଇପଡ଼ିଥିବା ବେଳେ ୨ଟି ନଳକୂପରୁ ବାହାରୁଥିବା ପାଣି ପିଇବା ଉପଯୋଗୀ ନୁହେଁ । ୪ ବର୍ଷ ତଳେ ବସୁଧା ଯୋଜନାରେ ଲକ୍ଷାଧିକ ଟଙ୍କା ବ୍ୟୟରେ ୫ହଜାର ଲିଟର କ୍ଷମତା ବିଶିଷ୍ଟ ଏକ ସୋଲାର ପାନୀୟ ଜଳ ପ୍ରକଳ୍ପ ନିର୍ମାଣ କରାଯାଇଥିଲା । ଟ୍ୟାପ୍‌ ଯୋଗେ ପାଣି ଯୋଗାଇ ଦିଆଯାଉଥିଲା। ହେଲେ ଅଢ଼େଇ ମାସ ଧରି ଏହା ଅଚଳ । ଯାହା ଏଯାଏଁ ମରାମତି କରାଯାଇନି । ଫଳରେ ଗ୍ରାମବାସୀଙ୍କ ସହ ସ୍କୁଲ ଓ ଅଙ୍ଗନବାଡ଼ିକୁ ପାଣି ପାଇପାରୁନାହାନ୍ତି । ଅନ୍ୟପଟେ ଆର୍‌ଡବ୍ଲ୍ୟୁଏସ୍‌ ବିଭାଗର ସହକାରୀ ଯନ୍ତ୍ରୀ କହୁଛନ୍ତି, ମୋ ପାଖକୁ କିଛି ଅଭିଯୋଗ ଆସିନି। ଯଦି ସୋଲାର ଅଚଳ ହୋଇପଡ଼ିଛି ତାକୁ ଖୁବ ଶୀଘ୍ର ମରାମତି କରାଯିବ। ମାସ ମାସ ଧରି ଗାଁ ଜଳ ଯନ୍ତ୍ରଣା ଭୋଗୁଛି, ହେଲେ ବିଭାଗକୁ ଜଣାନାହିଁ । ଯାହା ବିଭାଗୀୟ ବାବୁଙ୍କ ପାରିବା ପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।